محمد عبد الرحمن : « كوميديا سياسية» في مكتب الرئيس

* ابداعات
* البداية
أي تشابه بين الأحداث والواقع يتحمل مسئوليته القارئ
الشخصيات : الرئيس محمد منسي – المتحدث الرسمي جاسر علي – المستشار السياسي صافيناز الشهاوي – أم يمنى – سكرتير أول وسكرتير ثان من الذين عملوا مع الرئيس السابق تبارك (يجلسان في أقصى ركن بالغرفة )
---------
مكتب الرئيس بالقصر الجمهوري – ليل داخلي
تصل من خارج القصر بوضوح الضوضاء الصاخبة التي يسببها حصار مواطنون غاضبون للقصر الجمهوري بشكل شبه يومي واشتباكات متقطعة مع رجال الأمن
يدخل الرئيس إلى مكتبه ليتلقي بالحاضرين لبحث كيفية الخروج من الأزمة الراهنة
الرئيس منسي : السلام عليكم
الجميع يرد في نفس واحد : وعليكم السلام يا ريس، بما فيهم أم يمنى التي تتطلع إلى ما يجري عبر الشباك وترد السلام دون أن تنظر خلفها حتى لحظة وصول الرئيس .
يجلس الرئيس منسي على مكتبه ويوجه كلامه معظم الوقت لجاسر علي وصافيناز الشهاوي
منسي : هنعمل ايه يا جماعة، فكرتوا؟
جاسر :بدأنا نجهز كلمة لحضرتك تطلع تقولها الليلة أو بكرة الصبح بالكتير
منسى : هو انا كل شوية هطلع أتكلم؟ انا مش اتكلمت من أسبوعين وفرضت حظر تجول ومحدش التزم بيه؟
صافيناز :لازم يا ريس تطلع لان المعارضة وشباب التويتر عمالين يقولوا منسي فين منسي فين كأنك عيل تايه – تدرك أنها نادت الرئيس باسمه مجردا واستخفت به - فتكمل وهي تعتذر بشكل غير مباشر
صافيناز : وكمان ياريس انت الريس فلا يصح أن نكتفي فقط بتغريدات التويتر
منسي متعجبا : يعني ايه تغريدات التويتر ؟
ينظر سكرتير 1 إلى سكرتير 2 ويضحك في صمت
جاسر علي : دة موقع من مواقع التواصل ياريس والفريق بتاعنا هنا بيكتب كلام فيه على لسان حضرتك والحمدلله عامل شغل كويس
يتعمد جاسر عدم النظر للجالسين وهو يقول هذه الجملة لأنه يعرف أنهم يعرفون أنه يكذب
منسي : كويس أوي حكاية التويتر دي اكيد بتفرق مع الشباب اللي عامل فيها ثورجي
صافيناز الشهاوي تبدو دائما متمسكة بمهامها كمستشار سياسي فخافت من تراجع الرئيس عن الكلمة فقاطعته
صافيناز :برضو لازم تخرج وتتكلم يا ريس
منسي :وهقول ايه جديد هدعو للحوار محدش هيجي ما هما عارفين اننا بنشتغلهم، هفرض حظر تجول حولين القصر، الشعب كله هيجي هنا
جاسر: الدكتورة صافيناز وصلت لفكرة جديدة يا ريس، هنحرج بيها بتوع جبهة الابتزاز.
منسي :طب والله كويس خير يا دكتورة
صافيناز : حضرتك هتطلع تدعوهم للحوار
تظهر الدهشة على وجه منسي وكأنه شاهد القردة زوزو في اعلان فريسكا لكن صافيناز تتجاهل رد فعله
تكمل : ويكون الهدف من الحوار هو الحوار حول أسباب رفضهم الحوار الأولاني وبكدة مش هيكون ليهم حجة، احنا مش بنقولهم تعالوا نتحاور، احنا بنقولهم تعالوا نتحاور في أسباب عدم حضوركم الحوار الاولاني
ينظر منسي لجاسر ويقول :فاهم حاجة يا جاسر؟
جاسر :طبعا رأي سليم يا ريس والخطاب جاهز أهو على الاي باد
يلاحظ منسي أن الأي باد جديد فيسأل عن سبب تغيير القديم ويجيب جاسر فيما معناه أن الجديد من طراز أفضل
سكرتير 2 لسكرتير 1 هامسا :محدش قادر يقول له ان الاي باد الأولاني باظ من ساعة ما كان بيبل الشاشة بصباعه
منسي : والكلام اللي انا هقول له مضبوط دستوريا ولا بتوع التوك شو هيمسكوها عليا انا مش ناقص كفاية فضايح كل يوم جمعة مع اسمه ايه دة بسام يونس
صافيناز :نسخة الدستور معانا اهو وراجعنا الخطاب كويس ..وتحاول بعينها البحث عن النسخة حتى يصدقها الرئيس دون جدوى
منسي :لا انا كدة قلقت رجعتوا للدستور ولا لا
يبدأ الجميع، جاسر وصافيناز وسكرتير 1 وسكرتير 2 البحث عن نسخة الدستور في كل مكان من حولهم ماعدا أم يمنى التي لاتزال تنظر من الشباك .
فجأة يكتشف جاسر علي أنه كان جالسا على النسخة
منسي ساخرا منه : وانا اقول انت قاعد مستقر كدة ليه تطلع قاعد على الدستور اللي طلع عينينا عشان نمشيه؟
جاسر بخجل :الدستور في قلوبنا يا ريس مش في الورق هو حد كان قراه اصلا؟
منسي يضحك وهو يعرف ما يقصده جاسر ويغير الحوار إلى أم يمني
منسي : ما تحضرينا يا أم يمني هتفضلي واقفة كدة في الشباك؟
أم يمنى لا ترد ويبدو عليها التركيز الشديد وكأنها تشاهد فيلما ساخنا
فجأة تحدث ضوضاء أكبر أسفل القصر وكأن الباب يفتح ويدخل منه أحد فيصاب كل من في المكتب بالرعب رغم علمهم بأن الأمن يحمي كل ثغرة في سور القصر .
منسي : هو في ايه تحت
جاسر : دقيقة يا ريس هخرج أشوف .
وفعلا بعد أقل من دقيقة يعود ياسر وقد تهللت أساريره
جاسر :مفيش حاجة يا ريس دة عمران إبن حضرتك كان راجع من الشيفت
منسي :ويرجع متأخر كدة دي الساعة داخلة على 7 والشغل جنب البيت
جاسر : ما هو ريس للاسف عشان ياخد المرتب اللي الكل باصص له فيه دة لازم يقعد 10 ساعات بدلا من 8 واجازة 3 أيام بس في الاسبوع
صافيناز :ربنا يلخيهولك يا ريس ويبعد عنه العين
منسى : طب نرجع لمرجعونا يا جماعة
سكرتير 1 لسكرتير 2 : هو احنا مجتمعين ليه اصلا؟
جاسر :الخطاب جاهز يا ريس تحب نعلن أنك هتقوله بعد قليل بحيث سيادتك تظهر كمان 3 ساعات مثلا؟
صافيناز : ونقول لفريق تويتر يسخن شوية
سكرتير 2 لسكرتير 1 :قصدها الرئيس يغلس عليكم بعد قليل
منسي : تمام وكويس ان الخطاب على صفحة واحدة مش لازم اقلب صفحات الاي باد، ويكمل : يبق زي ما اتفقنا دعوة للحوار حول أسباب رفض الحوار صح؟
جاسر وصافيناز :صح يا فندم ..وبينما تكمل صافيناز شرح احد فقرات الخطاب يرن الهاتف الخاص بالريس منسى شخصيا ونسمع الحوار لكن من طرف منسى فقط
منسي : أهلا يا خيري
منسي : انت لحقت عرفت اني هخطب ؟
منسي : خلاص طالما انت شايف كدة
منسي :مع الف سلامة
ينظر منسي براحة لمن يجلسون معه : انا شايف نأجل الخطاب شوية ونشوف الاحداث هتوصل لايه من هنا لبكرة الصبح
جاسر وصافيناز في نفس واحد :عين العقل يا ريس
يغادر الجميع الغرفة فيما لاتزال أم يمنى تنظر من الشباك .
انتهي
Tags:
* كوميديا سياسية
* محمد عبد الرحمن
مصدر الخبر : البداية