عكس عكاس | النجومية حظ ...مش موهبة

من كام سنة قال لي الفنان الجميل فتحي عبد الوهاب ان حد من كبار النجوم نصحه مايركزش أوي في التمثيل ..!! علشان ينجح وقتها فهّمه إن أغلب النجوم الكبار معندهمش مواهب حقيقية وبيتضايقوا أوي لما بيلاقوا ممثل بجد يقف قدامهم فيكشفهم
فتحي ظهرت موهبته من أول دور عمله في فيلم سارق الفرح مع المخرج الكبير داود عبد السيد ...وبعدها بدأ يشق طريقه وكان من أهم أدواره بالنسبة لي فيلم فرحان ملازم آدم ...لكن يبدو ان فتحي مطبقش النصيحة بحذافيرها لأنه فعلا فنان موهوب ..وعلشان كده مخدش حقه اللي يساوي موهبته حتى الآن ...
وليد فوّاز تقريباً قال لي حاجة شبه كده
وبرضه لسه مخدش حقه اللي يساوي موهبته حتى الآن ...
كلام في سرّك ...الحكاية حظ وبس ...
لأن أهم أهم ممثل عدّى على الشاشة المصرية كان بيتعب المخرجين معاه لعدم قدرته على تجسيد الدور أو المشهد زي ماهم عايزين ...وسبحان الله ...كان بطل أهم أفلام في تاريخ السينما ..شباب امرأة والبوسطجي وغيرها من الأفلام المهمة ....وسبحان الله ...نفس الوش ونفس الشخصية اللي مش بتتغير الا في ظروف مختلفة لو المخرج من النوع الجبّار زي صلاح ابوسيف فيعرف يطلّع منه شخصية شباب امرأة مثلا..
لكن شوفه كده في فيلم ( الستات مايعرفوش يكدبوا )
فريد شوقي على سبيل المثال ...الحظ لما يلعب بجد ...ويحوّل ممثل عادي امكانياته بسيطة وأداؤه محدود لنجم النجوم بل وأغلى ممثل عربي في الوقت ده
وقت ما كان فيه محمود المليجي مثلا ...وده لوحده عملاق بس حظه قليل
ممكن نفتكر مسرحية مدرسة المشاغبين ...ونفتكر سعيد صالح وعادل امام كل واحد وصل لغاية فين
كريم عبد العزيز مثلاً كمثال على الحظ اليومين دول ...سبحان الله ..نفس الأداء ونفس الايفيهات اللي الجمهور بيبقى متوقعها اصلا ...وحظه ماشي وبيعمل كل سنة فيلم ...عن نفسي مش بالاقي فرق بين أدواره في حرامية في كي جو تو ولا تايلاند ولا أبو علي ولا فاصل ونعود ولا ....
الكلام ده ينطبق على مي عز الدين وياسمين عبد العزيز واحمد السقا .....وغيره وغيره وغيره ( وكان أحمد حلمي قبل ما يستخدم ذكاؤه ويعدّي المرحلة دي )
خلونا نراجع كده أكثر الممثلين موهبة من أيام الأبيض واسود واحنا نعرف قد ايه الحظ كان أهم من الموهبة والقدرة على التقمص ...وقد ايه شروط النجم اللي بيتصدر وياخد بطولات مختلفة خالص عن شروط الفن نفسه ....للجمهور كلمة ...وللقبول كلمتين ....وللحظ باقي الكلام