عكس عكاس | الرقص على الحبال

الرقص ع الحبال مش تهمة عموما ...لكنه وصف حال ...وهو نوع من المهارة صاحبها يشكر في أغلب الأحوال خاصة إذا كان شغّال في سيرك
فما بالك اذا كان شغال معد في برنامج تلفزيوني ؟
أولاً أنا متعاطف جداً مع أغلب الزملا ومقدر ظروفهم ....والورطة اللي هم فيها خاصة مع انتشار البرامج والفضائيات والجهات اللي بتحرّض أو بتمنع أو بتدفع أو ...
زمان قبل كام سنة كان فيه حبل واحد أو حبلين بس ، أقصد جهة واحدة ولا اتنين بس ممكن تاخد منهم تعليمات أو تحذيرات أو يوجهوك على مسارات معينة ...هم اتنين تلاتة ظباط من لاظوغلي بيتابعوا البرامج اللي من قلتها بقت العلاقة مظبوطة مع الزملا المعدين وكل واحد عارف مهامه ومناطق الخطر اللي ممنوع الاقتراب منها ...وضيف على كده تليفون ممكن ييجي كل كام أسبوع لأسباب معينة من الأمن القومي (اللهم اجعل كلامنا خفيف على الجميع )
ده غير تعليمات وتوجيهات صاحب المحطة والجهات المعلنة ودي مقدور عليها
وضيف على كل دول أمراض النجم المذيع النفسية اللي لابد تتعامل معاها بكل حنكة واقتدار ...ماتخليهوش يسوق في عبطه وأوهامه وفي نفس الوقت تحسسه انه نجم النجوم وكل اللي بيقوله صح
بس دلوقتي الظروف اختلفت ....
علشان كده الزملاء صعبانين عليا ....
وعايز الناس تقدّر الظروف الصعبة اللي بيشتغلوا فيها ومايتسرعوش في مهاجمتهم ..
تخيل نفسك انت معد يوم كلمة السيسي مع الجماعة بتوع تمثيل المجتمع ...تخيل كده .؟
هتجيب مين يتكلم في الاستوديو ...وتتفق مع مين ع التليفون ....وتكتب ايه للنجم المذيع يقوله ...وهتمشي ع الحبال ازاي ؟
وازاي تتفادى السلوك العريانة علشان متتكهربش وتقع على جدور رقبتك ؟
قدروا ظروف الزملا من فضلكم ...خاصة المناضلين اللي كانوا منورين الدنيا بكلامهم الكبير في الجرانين ولقوا نفسهم مضطرين يرفعوا الايريال لغاية ماضرب في سقف الكونترول روم
كان الله في العون