شد وجذب

إعلام السفالة والردح والتحرش

لن أدافع عن اي اعلامي سافل بعد اليوم حتي لو كان صديقي لأنني مؤمن تماما ان سبب كارثة مصر هو الانفلات الاعلامي والضحك علي عقول الشعب
تقول سفالة.. ماشي.. تقول جهل وقلة أدب.. ممكن.. تقول انحطاط وخيانة للامانة.. يجوز.. أية اللي احنا عايشين فية ده.. يانهار اسود.. ايه اللي حصل للإعلام المصري.. معقول شوية مذيعين بالصدفة يقتحمون بيوتنا ويجبرونا علي مشاهدة وسماع وصلة ردح وسفالة وقلة أدب واستعراض قوة وفي الاخر كل واحد يقول للتاني ملفاتك عندي وتاريخك الأسود وفديوهاتك.. طب بالذمة ليكم وش تطلعوا تقابلو الناس تاني ازاي علي شاشات التليفزيون.. ومين المحترم اللي ممكن يصدقكم تاني او يصدق اي حاجة ممكن تقولوها.. اللي انا مبسوط منه ان وجهكم الحقيقي انكشف للجميع وما ينفعش حد منكم يطّلع يقول تاني علشان خاطر مصر وشعبها.. مصر بريئة من أشكالكم أصلا ومايشرفش شعبها ان ده يبقي اعلام بلده اللي المفروض ينقل الحقائق للرأي العام ويعمل عملية تعبئة علشان الناس تلتف حوالين البلد في الظروف الطين اللي احنا عيشنها.. وبعدين كل شوية واحد يطّلع يقولك أصل الرئيس السيسي بيقول ويدعي أنه قريب من صانع القرار وانا متأكد ان الرئيس السيسي مايشرفوش ان اعلام بلده يوصل لهذا المستوي المتدني.. وكمان الراجل قال مليون مرة انا لا ليا شلة ولا حد محسوب عليا وكل هدفي الشعب الغلبان اللي اخترني علشان نعبر مع بعض مرحلة الخطر.. علي فكرة الحالة اللي وصل اليها الاعلام المصري دي نتاج تدني مستوي المعدين في البرامج.. كل من هب ودب تقوله بتشتغل أيه يقولك معد برامج او رئيس تحرير برنامج وأصلا لا عنده فكر ولا خبرة ولا اي حاجة.. علشان كدة الواحد مستغرب من مستوي البرامج.. تحس كدة ان رئيس تحرير البرنامج عمال يسخن في المذيع ويخليه يقعد يتكلم ساعتين في الفارغ ويعمل شوية مداخلات ويفجر كأم قضية شخصية او ورآها مصلحة.. هو ده حال الاعلام في مصر ولو حد هاجمهم يبقوا ما يصدقوا وكأنهم مسكوا عظمة ويفضلوا يدغدغوا فيها مش علشان حاجة الا مصلحتهم.. احد المذيعين قاعد للفضائح والتسخين وتحويل القضايا الهايفة إلي قضايا رأي عام علشان السوق عاوز كده وبس.. تسأل عن برنامج ديني هادف ومحترم علشان نغير الخطاب الديني ونلحق شبابنا من الانضمام للارهابيين ما تلاقيش.. تشوف برنامج يحفز الشباب علي العمل والبناء علشان نقدر نعيش بدل ما احنا قاعدين نهلل للمعونات اللي بتجينا مفيش.. نشوف برنامج يشجع أهل الخير علي مساعدة الغلابة او مناشدة المدرسين يرحموا أولياء الأمور من الدروس الخصوصية او حملات لمواجهة الفساد والبيروقراطية اللي ودت البلد في مليون داهية يقولك ده مش في قاموس البرامج.. طب أنتم عاوزين ايه.. عاوزين طول النهار تتكلموا عن فلان اتحرش بفلانة او فلان طلع شاذ او فلانة مصاحبة فلان.. ايه القرف ده والله العظيم حرام تاخدوا ملاليم مش ملايين وأنتم طول النهار قاعدين تضحكوا علي الشعب الغلبان وكل واحد فيكم عنده بدل القصر اتنين وتلاتة واكتر ناس بتداري علي الفاسدين انتم بس شاطرين لما تقعوا في بعض تهددوا بعض بالسيديهات والصور والفيديوهات وتدعوا أنكم اصحاب الفضل علي الشعب وكل واحد فيكم عدد المشاهدين بتوعه بالملايين.. جاتكم ستين وكسة عليكم وعلي رجال الاعمال اللي مشغالينكم وعمالين يغسلوا ماضيهم الأسود علي حساب الشعب الغلبان وكل واحد فيهم جايب واحد بيدعي أنه مذيع وشغال يطبل لصاحب المحطة وده يقولك رجل البر والتقوي والتاني الراجل صاحب الايادي البيضاء وفي الاخر يوصل بينا الحال ان احنا نبقي أسوأ اعلام في الوطن العربي علشان احنا نجحنا نعلم الشعب أنه يتفرج علي. الهيافة.. يعني لو ما اتفرجناش علي المحطات المصرية نقلب نلاقي الجزيرة عمالة تبخ سمومها في مصر وشعبها ومش فارقة كتير عن الاعلام المصري الاتنين بيكذبوا بس الفارق الوحيد ان احنا عارفين ان الجزيرة كدابة والمفروض ان اعلامنا المصري محترم ومش بيكذب ولا بيضلل الشعب ولا بيهتم بقضايا هايفة زي اللي بيقدموه علي حساب الوطن.. مش بنكر ان في إعلاميين محترمين بس مع الأسف من الممكن حصرهم علي أصابع اليد فقط.. وعلشان كده انا بسأل.. هو امتي هيرجع التليفزيون المصري ويحتل الريادة ويخلصنا من الأشكال الضالة دي.؟ انا شخصيا أطالب المعلنين ان يتخذوا قرارات سريعة بمنع إعلاناتهم من البرامج السافلة وان يتوقفوا عن دعم المذيعين الذين يسيئون لمصر وشعبها واطالب الشعب المحترم ان يمتنع عن مشاهدة هؤلاء الخونة الذين يستغلون دخولهم بيوتنا بدون رؤية محترمة تسمح لهم ان يستحوذوا علي جزء من وقت المصريين... واعتقد ان الأيام القادمة ستكشف لنا عن رواتب اصحاب الملايين من الاعلاميين وعن توجهات اصحاب القنوات الذين يتهمهم البعض بغسيل اموالهم في غسالات الفضائيات علي حساب الشعب الغلبان.. دلوقتي بس انا عرفت ليه اصحاب الفضائيات مش عاوزين يتحدوا ويعملوا قناة تتحدث للغرب لتنقل لهم حقيقة ما يدور في مصر.. عارفين لية.. لأنهم متاكدين ان فلوسهم هتضيع في الارض لان مستوي المذيعين اللي عندنا مع الأسف لا يصلح الا لفضائيات بير السلم.. لك الله يا مصر.