إقرار ارتباط.. ادفعى لنفسك يا هانم!

اقر انا/
نية الارتباط ب /
لمدة/ بداية من تاريخه/
وعلي ذلك اتعهد واقر بالآتي:
- دفع حسابي الخاص في أي مطعم لأن انا مش الكفيل الخاص بالطرف الاخر.
واذا طلب أي طرف من الاخر دفع الحساب يكون الرد لفظي بصيغة "ادفعي لنفسك يا هانم"...مش لدوافع مادية..
- الأخطاء المتعمدة سواء الظاهرة أو بين السطور. يتم معاقبتها سواء ببطلان هذا الاقرار أو باي طريقة يقررها الطرف المتضرر..
- اتعهد باني هجيب هديتين بس...عيد الميلاد وعيد الحب. الذكريات السنوية دي بتفكرني أن بقالنا سنة بنفس الحالة متطورناش..وده مش مدعاة للاحتفال..انتي بتتخني وانا بقرب من البطالة أكتر وامك نفسها تلاقي عريس جاهز...الوضع مش حلو...
يستثني من ذلك 6 أكتوبر والاعياد الوطنية ممكن هدايا بسيطة "ده عشان مصر
- الغيرة مسموح بيها في الحدود اللطيفة اللي هيا بتتحل بكلمتين وشوية تلزيق..اكتر من كدة يبطل الاقرار.
-التجسس ممنوع..وبالتالي ممنوع طلب باسووردات أي اكاونتات لاي حاجة. وفي حالة الشك والخناقات يسمح بالاطلاع على محادثات معينة.
- ممنوع احضار الاقارب لاي خروجة..اخوكي اللي في رابعة ابتدائي مش محرم...ومش هيمنع أي شيء محتمل.
- ممنوع اقحام الاقارب في أي خناقة..امك مش صاحبتنا.
- ممنوع تسجيل الطرف الاخر على الموبايل "ام العيال/ أبو العيال"..واللى يخالف يبطل الاقرار.
- كلمة "حب" مش صفة..يعني "يا حب" بيخليني اتخيلك الفنانة يسرا في رائعة "والله احنا ما لينا غيره" وتقع تلك الكلمة في بند السابق.
- محدش فينا baby.
- اللي فات لا يسأل عنه أحد..يعني ميهمنيش مين اتقدملك وميهمكيش انا كنت مصاحب مين. اظن أن احنا مع بعض عشان فشلنا في اللي فات. فا دي مش ماتريال للفخر أو حتى دفاتر قديمة.
- مفيش فرق بين الرجل والست كدة استعمال الجنس كأفضلية أو ميزة ممنوع..و استحضر قول الفنان محمد هنيدي في ليلة دخلته "ليه؟ انتي اتشليتي؟"
- العلاقة مش مدعاة للفخر..مش محتاجين نحكي لاطراف خارجية أي تفاصيل.
-تغير التوقيت من شتوى وصيفى والعكس مايغيرش بنا العادات والتقاليد
توقيع الطرف الأول/ توقيع الطرف التاني/