الازدواجية صنعة

فى مجتمعاتنا العربية، الأزدواجية صنعة!! يعنى بنعمل الحاجة وعكسها فى نفس ذات اللحظة بس قبل ما نتعمق تعالوا نعرف يعنى ايه ازدواجية وبعدها نتوغل فى تفاصيلها الموجودة فى حياتنا بصفة شبه دائمة، الازدواجية فى المجتمع بتكون متركز مفهومها فى الحكم على الاشياء، وهو بيتصنف من ضمن الامراض النفسية المنتشرة فى المجتمع، وبتكون اساس المشكلة ان الافراد ما بيحطوش نفسهم مكان الاخرين فى مواقف معينة بتحدث للاخر، فبالتالى الحكم بيكون سلبى، رغم انه لو لفت الايام واتحطوا فى نفس الموقف ممكن يكون رد فعلهم اسوأ من الاخر، بالبلدى يعنى بيحرم على الناس اللى بيحلله على نفسه!! شوفت فلان عمل ايه، بلاش قلة أدب؟ وهو فى أوضته الضلمة بيعمل اسوء من كدا بكتير، بس المهم انه قدام الناس صاغ سليم وانضف من الصينى بعد غسيله، قدام نفسى مش مشكلة، نفسى مننا وعلينا، وده الدارج المباشر، فى بقى الدارج الغير مباشر وبيحصل بشكل شبه يومى، زى مثلا بنكره ناس عشان نجاحها مش سلوكها؟! اه والله ده بيحصل، بتحس بقمة الازدواجية تبقى قاعد بين الناس تقول انا احسن حاجة فيا طيبتى، قلبى ده مفيش اطيب منه، بس يا حج القلب الطيب مبيكرهش اصلا لكن انت بقى بتكره الناجح دى فعلا اللى غريبه، ده لسه كمان انواع من الاذواجيه، زى مثلا الشاب اللى بيخرج مع البنت اللى بيحبها ويجبلها هدايا، وقافل على أخته بالضبة والمفتاح، ده غير بقى انه لا بيبقى حنين عليها ولا بيخرجها طيب فيها ايه طالما انت شايف نفسك دكر وانت اللى تخرج مع بنت وتخرجها وتفسحها بس اختك لا، بحجة، لا انا أختى محترمة، طيب البنت اللى بتخرج معاك دى قليلة الادب!، فى الحالة دى الازدواجية بيكون ليها أكتر من إجابة، الاجابة الاولى، هو انتى شوفتينى اتجوزتها دى تفاريح، طيب ترضى ان حد يعمل تفاريح مع اختك، الرد السريع الايام دى، اخرجى من دماغ امى، الرك على البيت اللى معرفش يربى!!!، الازدواجية التانية بقى لو الشاب متربى شويه، هيرد يقولى، بصى انا ضامن نفسى بس مش ضامن باقى الشباب، مممممممممم، طيب قبل ما نتنقل على امثلة تانيه، واقف فى زورى سؤال، طيب ليه مع البنت اللى بتحبها، صوتك بيبقى واطى، وكيوت، ومع اختك، اكويلى الهدوم، حطيلى اكل، على فكرة اختك بتلجأ فى سن صغير انها تعرف شاب مش قلة أدب منها، لا، دى عايزة تحس بالامان عايزة تحس انها محبوبة وفى حد بيهتم بيها، يعنى فيها اية لما تدلع أختك !!!تجبلها هدية تاخدها وتخرجها، تلاقى الرد سريع، اه ماشى انا ممكن اعمل كل اللى فات الا تاخدها وتخرجوا دى، ليه ؟!!! لان الناس هتفتكر ان اختى ماشية مع واحد نعمممممممممممممممم؟؟؟؟ ناس مين دول يخرب بيت الازدواجيه، ما اللى يكلم يكلم طالما احنا صح، فى بقى ازدواجية منتشرة فى مجتمعتنا، وهى ان مينفعش نتريق على حد، مينفعش نقلل من شأن حد، ونحس بالانكسار لو حد عمل فينا كده ونلوم.
واول ما تيجى الفرصة، بتلاقيك بتتريق على خلق الله التخين والرفيع اللى بيتكلم بسرعة واللى بيتهته، اللى بيسقط، من غير ما نراعى مشاعر الغير، بيحصل!!! بنقعد نكلم ونقول لازم يكون فى نقاش حضارى لازم نسمع بعض، لازم منكونش متعصبين ونقعد نقارن بالغرب شوفوا الغرب الحوار بيكون يا تقنعنى يا اقنعك، اول ما نيجى لساعة الجد لو رايك مخالف لرايى هتعصب وهقفش وممكن اتقمص واقوم واخاصمك واقول عليك متخلف، الله، والكلام اللى فات ؟ بلح، كلام، فى كمان نوع من الازدواجية بس عند الستات اكتر، زى مثلا لو عند صاحبتها مشكلة مع خطيبها او جوزها، مثلا شريك حياتها عصبى اوى او شكاك او بتاع بنات، ترد عليها على طول وايه اللى هيصبرك على ده انفدى بجلدك، انتى عبيطة هتستمرى، انتى معندكيش شخصية وتستاهلى انه يعمل معاكى اكتر من كده، وأول ما المشكلة تبقى عندنا وخصوصا فى بداية المشكلة، عادى بكرة يتغير، ما انتى لسه قايله انه مش هيتغير ومافيش حد بيتغير، ، لالالا، شريكى غير اى راجل فى الدنيا دا بيحبنى، ما صاحبتك اللى انتى نصحتيها كانت بتقول نفس الكلام لا تعليق، فى نوع تانى من الازدواجية منتشر اوى الايام دى بين الولاد والبنات، اول لما يرتبطوا على الفيس بوك الحالة الاجتماعية تتغير وتبقى على علاقة بفلان او فلانة ؟؟؟؟؟ والناس تبارك وتهنى ويتقلب على الفيس بوك فرح العمدة، دى على علاقة يعنى ماشى او ماشية معاه، ولما تيجى تتكلم، يقولوك انت بلدى، طيب بلاش دى، اول ما يحصل خلاف، ويتخاصموا او يبطلوا مشى مع بعض، البلوكات تشتغل، ، وتشتغل أغنية عايز جوابتك خدها أرجوك متعطلنيش !!!ايه علاقة البلوك بااننا انفصلنا، ودا يخلينا نتنقل لنوع اخرى من الازدواجيه، هو طالما انا وانت (مش مهم انا وانت دى ايه بنحب بعض مخطوبين متجوزين، بنتين اصحاب، زمايل فى الشغل، ، الخ) اول لما نختلف يشتغل التلقيح على الفيس بوك، منشورات عن الخيانة والغدر والصديق الجبان وقسوة القلب ووشوش حزينة تنزل، ولا تأسفنا على غدر الزمان، واربط حبيبك باستك لو رجع كان بها لو مرجعش سيب الاستك خلية يلسعه، فى اية يا جماعهدا غير بقى الاهالى مسموح للولد يتاخر لكن البنت لا مسموح للولد يصاحب بنات لكن البنت لا، على فكرة غير مقبول البنت او الولد يتاخروا، غير مقبول ان الولد يمشى مع بنات ونقول عليه ده فتك، فتك ايه بس، انت كده بتدمره وبتربيه على الحرام، لما بتتريق على حد ازدواجيتك دى بتكسره بدل ماتكون انت سبب قوته بوقوفك جنبه، مش صح انى طول الوقت اقول انا طيب انا مابغيرش انا ما بزعلش حد انا بتمنى الخير لكل الناس وساعة الجد بكرة اللى نجح، بغير لما القى علاقة زوجية ناجحه، بتغاظ واحقد لما القى ناس بتضحك من قلوبها، واقول اشمعنا انا اللى كدة ابقى مستنى ذل الناس وكسرتهم وفشلهم وقاعد مستنى عشان افرح ونارى تبرد، تبرد ليه هما عملولك حاجة، لا، امال، مش عارف، بنقول كلام عشان نجمل نفسنا فى عيون الناس واحنا مشوهين قدام نفسنا، بنقول شعارات فاهمنيها غلط، الجمال جمال الروح، طيب يعنى ايه ؟! الرد يعنى الطيبة خفة الدم، لا يا أستاذ مش ده بس، جمال الروح انك تزرع السلام النفسى جواك انك تبقى من جوه ومن بره واحد انك تبقى قدام الناس زى من وراهم، ان اللى لسانك بيقوله هو هو اللى قلبك بيقوله، ونرجع نقول ان اى مشكلة فى مجتمعنا حتى المشاكل الاقتصادية والسياسة مش الاجتماعية بس، اساسها التربية، انا لما بربى جيل صح ويكبروا ويبقوا مسئولين عن البلد او الامن او على بيتهم وعيالهم يبقى جيل متصالح هيطلع جيل صالح، اقعد احسبها حسبة بسيطة اوى، هتلاقى ان الكوارث والمشاكل اللى بنعشها حتى الازدواجية احنا سببها، عشان نشأتنا غلط، عشان اتربينا على عيب الناس، مش حرام ربنا، ربنا رب قلوب، رب رحمة، رب عدل، من الاخر كل حرام عيب بس مش كل عيب حرام، الازدواجية حرام عشان بتوصل لخطايا وممكن توصل لكبائر، اقف مع نفسك وقفة صح، وشوف ايه الصح وأعمله، حياتك اختيارتك، الازدواجية صنعة بس ممكن تغير صنعتك عادى يعنى.