يوميات دكتور متعذب.. المريض المثقف

-يا دكتور الحقنا..المريض في الطوارئ مبيتنفسش ومش قابل أي أكسجين وعمال يقول "أنا بتنفس حرية".
-المفروض طيب نخدره ونبدأ تدخل جراحيًا عشان يتنفس.
-بنقوله كدة بيقول "كل المفروض مرفوض"
-همم..الواد ده أسمر وشعره منكوش وتحسيه مضروب في وشه بمحمد منير كدة؟
-آه يا دكتور.
-لابس الكوفية اللي هيا بتاعت فلسطين دي ومعاه شنطة ضهر كلها دبابيس مكتوب عليها نفس الحاجات اللي بيقولها؟
-آه يا دكتور عرفت منين؟
-لا ولا حاجة..أفتحي شنطته هتلاقي كتاب اسمه هيبتا..تمسكي الكتاب وتضربي بيه الواد على دماغه هيغمي عليه. وبعد كدة تاخدوه ترموه في ساقية الصاوي أو أي حاجة..أظن هينفع..لو منفعش اطلبوا الفنان رامي عصام ييجي يعمله تنفس صناعي.هيفوق..بعد كدة سمعوه قصيدة الحلزونة ياأما الحلزونة
-حاضر يا دكتور.