يا خرابي أزرق في أزرق

عزمتني إحدى صديقاتي على حفل زفاف ابنه اختها
- انا قولتلها بس انا معرفهاش
- قالتلي يا بنتي يعني ايه متعرفيهاش انتي صحبتي وانتيمتي والعيلة كلها عرفاك من كلامي عليك وانا اللي بعزمك لو ما حضرتيش حازعل منك جدااا
و طبعا أمام إصرار صديقتي العزيزة مقدرتش ارفض بس قولت لازم اعمل الواجب معاها دي صحبتي المقربة ليا.. المهم ذهبت إلى إحدى المحلات الغالية الثمن و اشتريت فازه كريستال بالشيء الفلاني ما انا لازم اجيب حاجه محترمه تليق بمقام صديقتي العزيزة.
عملت كل ترتيباتي للذهاب الى الفرح و قولت اروح متأخر شوية أجامل صحبتي و امشي
ذهبت للمكان اللي المفروض الفرح معمول فيه و انا لا عارفه اسم العروسة ولا اسم العريس كل اللي اعرفه اسم صحبتي و بس .. لاقيت قاعة فيها اصوات ضجيج ورقص فدخلت .. وفضلت ادور على صديقتي العزيزة لكنى وسط الزحام الرهيب فشلت في اني الاقيها حاولت اكلمها على الموبايل لكن طبعا مع كل هذه الضجة هيهات أن تسمعه.
و علشان مطولش عليكم لاقيت واحده ست كده لابسه بيلمع وملعلع خبطت على ضهرها بصيتلي اوي قولتلها
مساء الخير
مساء النور يا حبيبتي
الف مبروك حضرتك والدة العروسة
الله يبارك فيكي يا ختي لأ انا حماتها مامتها هناك اهيه
و شاورتلي على واحده ست واقفه بعيد روحتلها وباركتلها وعطيتها الهديه الغاليه اللي قولتلكم عليها قبل كده وسالتها عن صحبتي بصتلي باستغراب اوي و كأني بسألها سؤال في اللوغاريتمات و دورت وشها ومشيت
قولت ما علينا .. شوفتلي جنب كده و قعدت فيه لغايه ما الاقي صديقتي العزيزه وعلى الحظ قعدت جنب اسطول من السيدات الكبار في السن و اللي طبعا لم يسكتوا ولو لوهله
- بصي ياختي شوفي العروسه رفيعه ازاي
- اه والنبي انا مش عارفه ايه اللي عجبه فيها ولا فستانها وحش اوي ( دي واحده تانيه بترد عليها )
دخلت التالته في الكلام
- مش كان اخد بنتك يا سعاد على الاقل حلوه و متختخه و العز باين عليها
- خلاص والنبي يا نوال متفكرنيش انا كل ما افتكر دمي بيفور ( دي سعاد بترد على نوال )
و انا قاعده عماله اقول في سري" فيه ايه ماتخليكم في حالكم يا ساتر يارب بجد عواجيز فرح "
المهم كررت الاتصال بصديقتي مرارا و تكرار لكن دون فائده .. اخدت بعضي و مشيت و قولت يا بت اهو انتي عملتي الواجب و خلاص اكيد اختها حتبلغها .. صحيت تاني يوم الصبح على صوت تليفون البيت المزعج .. كانت صحبتي قولت اكيد حتعتذر علشان ماشفتنيش و سابتني لوحدي و تشكرني على الهديه .. لاقيتها زعلانه مني و بتعتب عليه و بتقولي:
- كده برضه ماحضرتيش الفرح
- لأ ازاي ياقمر وانا اقدر انا جيت و شوفت اختك وسلمت عليها
و بصراحه اتكسفت اقولها على الهديه
- جيتي ازاي الكلام ده لا انا ولا اختي شوفناكي
لأ جيت و حتى اختك كانت لابسه فستان ازرق وطبعا مرديتش اقولها على قصيده المدح بتاعت عواجيز الفرح
- ازرق هههههههههه انا اختى كانت لابسه تايير اسود انتي قعدتي فين؟؟
رديت : انا قعدت في القاعه اللي تحت اللي في وش الباب
- ههههههههههههههههه
دي صحبتي بتضحك بصوت عالي جدا وانا مستفزه لابعد الحدود
انتي بيتضحكي على ايه يا بنتي؟
اصل الفرح كان في القاعه اللي في الدور التاني
انا سكت و معرفتش انطق كلمه وااحده
اااه رااااحت الهديه لصاحب نصيبها وطبعا ده في سري
و من ساعتها حرمت اروح أي فرح من غير ما اسال على بيانات العروسه و العريس كامله و القاعه و مواصفاتها لأ و القرار الأهم كان اني حرمت اجيب هدايا