المالية تطلق خدمة "حقك تعرف الضريبة العقارية" على موقعها

أطلقت قبل أيام وزارة المالية علي موقعها الإلكتروني خدمة تعريفية بالضريبة العقارية تحت عنوان "الضريبة العقارية.. سؤالك جوابه عندنا! وتم اطلاقها - باللغة العامية - من أجل توصيل المعلومة بشكل مبسط وبنفس لغة الشارع للمواطنين.
وجاءت بعض الأسئلة والأجوبة من قبل المواطنين والمصلحة:
س1: ما هي الضريبة العقارية على السكن؟
ج: هي ضريبة قديمة كان اسمها زمان "العوايد".. ودلوقت اسمها الضريبة العقارية وبيتم فيها اعفاء السكن الخاص لغاية 2 مليون جنيه وكمان المساكن المملوكة قبل 1996 معفية إلا إذا كان تم التصرف فيها بعد 2008.
س2: يا ترى أنا هدفع ولا هاخد إعفا؟
ج: لو انت ساكن فى شقة انت وأسرتك وتمنها أقل من 2 مليون جنيه مش ها تدفع ولا مليم.. الضريبة حتبقى على الوحدة الإضافية بس
س3: لو عندي بيت ومتأجر إيجار قديم هادفع إيه فى القانون الجديد؟
ج: كمالك ها تدفع نفس اللى كنت بتدفعه فى العوايد.. يعني مفيش أى حاجة زيادة عليك ومركزك القانونى بدون تغيير، والمستأجر طبعا فى الحالة دى مش حيدفع لأن دفع العوايد على المالك.. أما الوحدة اللى ايجار جديد وتم تقييمها ب2 مليون جنيه فاكتر فمالكها سيدفع عنها الضريبة العقارية كاملة لأنها وحدة إضافية بالنسبة له.
س4: لو أنا ساكن أنا وولادي فى بيت كذا دور فى البلد أو المدينة وكل واحد فى شقته وكل شقة تمنها أقل من 2 مليون جنيه.. إيه الموقف؟
ج: هاتروح المأمورية انت وكل ساكن في وحدة بالبيت وتقدموا بطاقة الرقم القومي اللى بتثبت إن عنوانكم على البيت ده.. وكل الشقق في الحالة دي معفية ومعلهاش أي حاجة.
س5: لو فى شقة لسه مستلمتهاش أو مش متشطبة.. إيه حكم القانون فى الحالة دى؟
ج: لو مستلمتهاش وهيه لسه ملك البائع أو الشركة هما اللى حيدفعوا لو متشطبة لأنه حيبقى عليها ضريبة، أما لو مش متشطبة يعنى غير تامة مش حيدفعوا، ولو انت استلمتها بس مش متشطبة مش حتدفع لكن لو سكنتها وهي لسة غير تامة يبقى حتدفع.
س6: أعمل إيه لو فيه خلاف مع مأمورية الضرايب العقارية حوالين قيمة شقتي وإيه حكاية الخمسين جنيه رسوم الطعن دول؟
ج: لو فيه خلاف تروح المأمورية وتطعن على القيمة والخمسين جنيه اللى هاتدفعها فى الحالة دي هاتتردلك تانى لو عندك حق.. ولو ثبت إن عليك ضريبة دي محلولة.. ممكن تقسطها على مرتين والتقسيط مش مجاملة من حد ده القانون بيقول كده !
س7: إيه حكاية الإخطار اللى جالى وأنا سكني الخاص أنا وأسرتي شقة بسيطة؟
ج: متقلقش.. ده إخطار مش للدفع لكن علشان يوضح اللى ليك واللى عليك وانت مش هاتدفع طول ما الشقة أقل من 2 مليون جنيه .. لكن نرجوك تروح المأمورية عشان تاخد جواب الإعفا وده ببلاش.. بس حضرتك لو عندك شقة تانية أو شقق تانية غير سكنك انت والأسرة هنا هاتدفع الضريبة بعد ما توافق على القيمة، ولم تطعن عليها، ودى ضريبة بسيطة يمكن واحد فى الألف وخلى بالك عندك 60 يوم مهلة للطعن من ساعة استلامك للإخطار.
س8: يا ترى بقى الضريبة دي بيحسبوها إزاى؟!
ج: فيه لجنة محايدة من 3 أفراد.. فيها مواطن زيك صاحب بيت وواحد تانى من المحافظة وواحد بس من مأمورية الضرائب.. ودول شغلهم مش بالمزاج لأن عندهم قواعد وجداول ماشيين عليها.. وعلشان نريحك الضريبة من الآخر واحد فى الألف من قيمة الشقة .
س9: وياترى هاتاخدوا على المحل أو الدكان الصغير كمان؟
ج: المحل أو الدكان الصغير اللى انت بتاكل منه عيش له تقييم تاني وعلشان كده بالتأكيد مش هاتدفع عليه ضريبة عقارية.
س10: طيب لما كل ده معفي.. مين اللى هايدفع الضريبة والفلوس دي هاتودوها فين؟
ج: اللى هايدفع هو اللى سكنه الخاص ب 2 مليون جنيه وأكتر، واللى عنده أكتر من وحدة وكمان المشروعات السياحية والصناعية والتجارية وغيرها هما دول اللى هايدفعوا. والفلوس دي نصها بيروح مباشرة – بحكم القانون - لتطوير وتنمية العشوائيات، ولرصف وتجهيز الشوارع ومد المرافق وبناء مدارس ومستشفيات وإقامة مشاريع لخدمة المواطنين ومحدودي الدخل والغلابة.. الباقى بيدخل خزانة الدولة ويعود برضه للمواطن.