الرئيس الأب

كل ما أكلم على واحد على الرئيس الأب يقوللي إنت نسيت انجازاته؟
حبيت بئه أعمل حصر للإنجازات و الفساد
نبدأ من سنة 73
1 - قائد الضربة الجوية
دي أكتر حاجه بتحرق دمي يعني هوه جاب سينا لوحده؟ طيب فين قائد الناس اللي عدت القناة طيب واللي عدى القناة ذات نفسه ملوش لازمه؟ طيب واللي رفع العلم أول مره , اه برضه ملوش لازمهو طيب وواضع الخطط؟ اه صح ملوش لازمه
يبقى حسني مبارك بطل الحرب الوحيد
2 - مشروع توشكى العظيم
ده بئه مسخرة المساخر أولاً المشروع اتصرف عليه 6.5 مليار جنيه
وسعر الفدان اتباع مستصلح لرجال الأعمال بخمسين جنيه يعني أقل من سعر كيلو لحمة, طيب اضحكوا شوية؟ اتباع لرجال الأعمال بالتقسيط والله العظيم عايزين تضحكوا أكتر؟ الدولة اتكلفت استصلاح 18 ألف جنيه للفدان وباعوه بخمسين ايه رأيكم في دي؟ أنا عارف واحد عبقري حيطلع يقول دي أعمال خيرية
3 - رصف الطرق وانشاء الكباري
يا سلام يعني لما الطرق تترصف يبقى انجاز؟ وعلى فكره مش بتترصف كويس أصلاً وكلها نقر واللي معاه عربية يعرف ويقولي بيربط عفشة كل قد ايه, وبعدين في كام طريق اترصف غلط وفي كام طريق حتى ميعرفش يعني ايه اسفلت؟
نيجي على الكباري دي بئه جميلة جداً, يا فرحتي كبري معمول علشان في الاخر ينزل على نفس الشارع بس من الناحيه التانية طيب ما هو الشارع واقف أصلاً يعني النتيجه ناس واقفة في الشارع وزيهم في الهوا حل الكباري ده حل موقت وغير مجدي وعروف الموضوع ده من زمان
يبقى كده انجازاته أهي والله مفيش في دماغي غيرها
نبدأ بقى على الفساد اللي حصل , واللي وراه حاجه ميكملش علشان حطول شوية
1 - جهاز شرطة مسخر ومدرب ومؤهل نفسياً وجسدياً لضرب وإهانة المواطن, وإسأل أي حد وقف في كمين قبل كده
2 - أمن الدولة لغاية دلوقتي أنا مش عارف وظيفة أمه ايه غير إنه ياخد واحد مبنى أمن الدولة يختفي جوه وعندك تلات احتمالات
ميرجعش ومحدش يعرف مكانه
يرجع متعذب ومتبهدل وفي الاخر يموت
يرجع سليم بس مكسور وتلاقيه شخص تاني حصل في ايه جوه متعرفش
3 - مشروع توكشى
واحد يقوللي إنت اتكلمت عليه قبل كده أقوله اه هوه ينفع هنا وهنا وأرجع و أقرأها حتعرف إنها فساد ومش حعيد تاني بس حضيف نقطة إن الشاب حديث التخرج لو حب ياخد فدان استصلاح يدفع عشرة آلاف جنيه في حين رجل الأعمال خمسين بس وعلى أقساط
4 - رغيف العيش
لاتعليق
5 - ايه هيا أرخص أكله بياكلها الشعب المصر؟
ايوه ايه؟ صح الفول
والنبي انزلوا شوفوا كيلو الفول بكام وارجعوا ردوا عليا
6 - مش عايز بئه أفضل أعد في أنواع الأكل اللي محدش يقدر يدفع تمنها بس عدوا إنتوا
7 - أسعار الشقق للشباب محدود الدخل
دي بئه تقريباً مقصود بها شباب المليونيرات محدودي الدخل يعني أقل شقة بيكون قسطها 1200 جنيه ده غير دفعة التعاقد والدفعة اللي في النص ومش عارف اسمها ايه ودفعة الاستلام ,طبعاً قصدي شقة من غير واسطه حد سألني على مساحتها؟ 60 متر يعني أتجوز فيها على الواقف
8 - مستوى التعليم
الشاب من دول يخلص الكلية ويقول والله معرفش أي حاجه طيب لما هوه ميعرفش عدى ازاي؟ أقولك أنا امتحان واحفظ كلمتين ولامؤأخذه أطرشهم في الورقة من غير ما تفهم ينجحوك.
9 - حد يسمع عن الضريبه العقارية؟
شوف يا سيدي دي ضريبه تدفعها لو إنت غني وعندك شقة أو عقار تمنها أكثر من 500 ألف جنيه
طيب ايه رأيك في اللي عنده شقة من 30~50 سنة أو عنده بيت قديم ومؤجر كل الشقق ايجار قديم ده أكيد غني وحيدفع ومعرفش ازاي "ايجار الشقة لن يتعدى 20 جنيه في الشهر ده لو غالية
10 - أظن كفاية كده ولا ايه؟ أصل ايدي وجعتني