يوميات دكتور متعذب.. اغسلي أسنانك يامدام

مش هينفع كده على فكره!!
=معلش انا اسفه... بس انا فعلا بخاف
-طب بعد اذنك افتحي بقك عشان اعرف اديكي الحقنه واشتغل
=هو لازم حقنه يعني! مينفعش تبخلي أو ترشلي أي حاجه كده وتشتغل
-ابخلك وارشلك بس برضه هتاخدي حقنه....
=طب بالله عليك هتوجعني؟
-اكيد يعني دي حقنه لازم توجع... يلا بقي انا تعبت ياريت ننجز
=انا اصلي بكره دكاتره الأسنان اوي.... ومبحبش اروحلهم
_وعلي العموم هما كمان بيكرهوكي انتي واللي زيك ومبيحبوش يشوفوا وشكوا اصلا
=نعم!
-مستغربه من ايه... دي الحقيقه....حطي نفسك مكاني.... يعني انا طلع عينى في سنتين ثانويه عامه... اخدت درسين فيزيا... جبت كتاب الافضل في العربي وذا بست في الانجليزي... حليت امتحانات ثانويه عامه من ايام جون مجدي عبد الغني في كأس العالم 90... ودخلت الكليه واتعاملت مع دكاتره معقدين بيجبوا امتحانات من بره المنهج وبينجحوا ولادهم وولاد اخواتهم...دفعت دم قلب أهلي على عيانين زيك ومن نوعيتك دي.... دخلت امتحانات شفوي لدكاتره مجانين... اتسألت اسئله من نوعيه ايه الفرق بين الكمبوزيت والطعميه....
=طعميه!!
-صورت ورق كتيير... جبت كتب كتييير.... ابتسمت في وش دكاتره وقولت حضرتك وبعد اذنك وعرضت كتير عشان اتعلم........ وقفت معا دكاتره كبيره ب 300 جنيه في الشهر كنت بكنس واغير نابكن واعقم واجيب خضار للبيت.... واذاكر ماس لمودي.... واضحك على نكت سخيفه... وبعد ده كله معلمونيش حاجه.....
وفي الاخر بتعامل مع ناس من عينتك.... مبتغسلش سنانها وكل بقها بايظ.... عاوزين المقاولين العرب مش عياده سنان وفي الاخر اسمع منكم
انا مابحبش دكاتره الأسنان.... انا بقرف منكم....ا! بلاش حشو عشان بيقع..... هو فعلا البكتيريا بتتجمع في الجير وبتسبب الريحه الوحشه اللي في بقي
للاسف انتوا ظالمين البكتيريا معاكم... معتقدش أن في كائن حي ممكن يعيش في الوسط إلى جوه بقكم ده... أي بكتيريا هتموت من الريحه دي للاسف
يلا اتفضلي
=بتفتح بقها على الاخر
-لا انتي فهمتي غلط....... اتفضلي بره... اطلعي بره مش هشتغلك
=ايه.
-ولا اقولك خليكي انا اللي همشي
**بيرمي الجوانتي... ويخلع البالطو..... بينزل يركب توتوك ويروح البيت..بينوي يغير الكارير.... بيفكر يشتغل كول سنتر في فودافون UK..... بيفتكر أن الانجليزي بتاعه أي كلام... من نوعيه ثانك يو بنك مصر... بيزعل.... بياكل بيض وجبنه..... بيغسل ايده... بيكسل يغسل سنانه..... بينام... البكتيريا بتموت في بقه من الريحه....