يوميات دكتور متعذب.. أنا اللي طلعت مريض!

يا حبيبي افتح بقك عشان اعرف اشتغل!
= نؤ نؤ.... بيجز على سنانه جامد جدا
** أبوه في الخلفية... بطريق ابني مشكلته أنه عنيد جدا... ومبيسمعش الكلام.. بس ذكي جدا يا دكتور والله بالرغم من عنده 10 سنين.
** وانا مالى ببطريق ابنك!! بتشرحلي مميزاته وعيوبه ليه؟! أنا عاوزه يفتح بقه عشان أعرف اشتغل.
يلا يا بطروقه حبيبي افتح بقك عشان نموت السوسه ونخلع الضرس... عشان يطلعلك واحد جديد بشوكه... طب يلا عشان اققولك نكتة البطريق عارفها؟!
** أبوه بلهفة شديدة!! إلا هي إيه يا دكتور نكتة البطريق... إيه هي؟!
وانت مالك انت يا حاج.. المهم احنا جايين نهرج ولا جايين نشتغل.. ممكن بعد إذنك تطلع بره عشان أنا هتصرف مع الطفل بطريقة علمية حديثة... اسمها "واجهه بالحقيقة".
** اللي انت شايفه يا دكتور... بيخرج الأب وبيقفل الباب وراه
بابا طلع... يلا افتح بقك عشان اققولك النكته... عارفك هتموت وتعرفها
=عارفها... ومبحبهاش... وسخيفة زيك
يابني منتا هاتفتح بقك وهتاخد الحقنة... وهنخلع الضرس... لو فاكر غير كده تبقي عبيط!!
= بيجز على سنانه... مششش فاتح حاجة
يا ابني أنا عاوزك تبقي كويس... انت فاكر إنك كده بني آدم كويس؟! يبني انت فيه منك في المجتمع كتير جدا... أعند منك... وأذكي منك... انت فاكر أن أنت في يوم من الأيام ممكن تبقي شخص محترم؟!
بالعكس هتفضل طول عمرك بطريق مبطط...هتدخل إعدادي وهتاخد دروس في كل المواد عشان درجات أعمال السنه ومش هتحضر الحصص... وهتنط من على السور عشان تجيب كشري في كيس أو تلعب كوره وتقطع بنطلوناتك من عند الركب... هتنجح بالعافية... وهتدخل ثانوي... أبوك هيبقي نفسه يدخلك هندسة عشان يتفشخر بيك قدام أهله... ويتمنظر بيك... المهندس راح المهندس جه... وهتجيب مجموع مش هيدخلك غير تربيه نوعيه شبين الكوم.. هتتخرج وهتبقي شاب عاطل عالة على المجتمع.
كل اللي هتعمله هتجيب بدلة سودا وبدلة رمادي عشان تروح بيهم انترفيوهات...هتحفظ امتحانات ال IQ وهتجيب 160 مع أنك متخلف ولا تعرف حاجة!!
هتحفظ أسئله روتينيه عشان تدخل تبخها لبتاع ال HR......هتترفض عشان معكش خبره ولا شهادات... هيجيلك اكتئاب... وهتقعد على القهوه... هتتعرف على النمر والضبع وهيدخلوك في سكه الترامادول والأفيون والحشيش والبيسه...وبعد كده هتدمن...وهتبيع انبوبه البوتجاز عشان تسكور بالفلوس دي...ابوك هيعرف وهيتشل... وامك هتغضب عليك... وهيجلها السكر وسنانها هتتلخلخ... وهتجيلي عشان اخلعهملها...انت عارف أن السكر بيلخلخ السنان وبيبوظها.
ترضي أمك تركب طقم بعد ما خلعلها كل أسنانها بسببك؟! لو ترضي قوم افتح الباب وامشى
= بيغمض عينه وبيفتح بقه... بياخد الحقنة... وبيخلع ضرسه.
-برافو عليك يا بطريق.... أنت فعلا ولد ذكي... شوفت بقي أقنعتك إزاي!
= انا هقولك على حاجة يا دكتور... أنت أوفر مووووت... أنا فتحت بقي عشان أخلص من خيالك المريض ده.
جتهم خيبة اللي دخلوكم طب!