أنا مش جليس أطفال.. وكفاية فصال!

قولها تبطل تضرب أخواتها يا دكتور.
-بطلي يا حبيبتي.
قولها تبطل تلعب وتسيب المذاكرة.
-ماتلعبيش يا بنتي.
قولها تبطل تاكل شيبسي وكراتيه يا دكتور.
-ماتطفحيش زفت ونيله.
قولها تبطل تاكل شوكلاته يا دكتور.
-ماتقولها أنت يا عم ماهي قدامك أهي؟
عارف يا دكتور !! والله كل يوم بتجيب كادبوري الكبيره دي اللي ب 5جنيه !! ممكن تاكل اتنين في اليوم...والله
- بألف هنا حضرتك..تعيش وتجيبلها.
يلا افتحي بقك على الآخر للدكتور؛ لحسن هيديكي حقنة
- ماهي فعلا هتاخد حقنة... متضحكش عليها...لازم نصارحها بالحقيقة
أنتي هتاخدي حقنة يا حبيبتي... وهتحسي بالشكة... وهتحسي بلسعة البنج...وهتحسي بضغط وبوجع...ومش هتعرفي تاكلي شوكلاته من أم 5 جنيه اللي أبوكي بيجبهالك كل يوم....
ها نشتغل ولا تغوروا ؟!
يا دكتور دي طفلة...ماتقولهاش كدة
حضرتك دي مجموعة أطفال في بعض..وبعدين دي مش ممكن تحس إلا لو بلعت الحقنة...شايف الخدود قد إيه ماشاء الله ؟
بعد نص ساعة...
خلاص يا حبيبتي قوموا من على الكرسي يلا... كده الضرس اتحشي
-حشيت إيه يا دكتور؟
حشو عصب للأطفال.
بكام ؟
-ب 50
ليييييييه ؟ مينفعش 40 ؟!
ينفع طبعا... بس لما تبقي تروح تجيب الكادبوري ام 5 جنيه...ب 4 جنيه...اعتبرني واقف في سوبر ماركت وببعلك تموين 5 ايام للكلبوظه دي