سيلفاوي وافتخر !!

من المعروف عني ولعي وهلعي وحبي الشديد لأخذ السيلفي selfie بكافة الأشكال والوضعيات لدرجة تصل إلى الجنون ولدرجة شرائيselfie stick أو بالعربي عصاية السيلفي ، وكم طالبني الكثيرون بالحديث عن السيلفي باعتباري ملكة ومجنونة السيلفي ونظرا لكون السيلفي بات راعيا رسميا للتصوير في أي خروجة مناسبة فسحة جواز أعياد ميلاد خطوبة عزا حادثة والذي منه فقد قررت أن ادردش حوله !
لإخافتنا قالوا عن السيلفي إنه أحد مسببات القمل وحشرات الرأس (على أساس إن دماغنا أصلا مفيهاش حشرات الكسل والتقاعس والغباء أحيانا وعلى أساس إن الاحتكاك بين الأطفال في المدارس لا يولد الجرب) المهم لأخذ السيلفي جهز أدواتك من أجل مكافحة القمل "لاسيدك في إيدك" ولمن لا يعلم اللاسيد فهو أشهر دواء لمعالجة قمل الشعر " أكيد حد بيقول يع" !!
و حتى لا أطيل دعوني أصحبكم في جولة افتراضية عن السيلفي لما يعرف بالحقائق العبقرية للناس السيلفاوية:
نبذة تاريخية من وحي الخيال :
إذا رجعنا لتاريخ السيلفي هنقول إن أكيد فيه واحدة، الله يعمر بيتها ، فتحت الكاميرا الأمامية للموبايل كي تضبط شعرها أو ماكياجها ومن ثَم اُعجبت بنفسها فأخدت السيلفي والسيلفي مكنش كافي ففكرت كمان تضيف عليه التاتش بتاعها عبر الداك فيس أو بوز البطة ! ونحب أن نوجه عناية حضراتكم إن أول واحد أخد داك فيس هو بطوط "حقوق ملكية فكرية مش أكتر" وبعدها عينك ما تشوف إلا النور انتشر السيلفي وبقينا نعيش الغزو السيلفاوي لو أنت انستاجراوي أو فيسبكاوي..
الحقيقة الأولى : فيه بنات بتتصور 20 سيلفي ورا بعض علشان بس تختار واحدة تنزلها على الانستاجرام مصحوبة بهاشتاج كيوت فيس أو داك فيس أو ياك فيس أو sad face أو اي إيموشن بيتركب على أم الفيس.
نصيحة لتلك الفتاة لو فعلا العشرين سيلفي دول طلعوا وحشين تقبلي فكرة إنك وحشة بكل بساطة وروح رياضية ولا تكرري التجربة السيلفاوية لأن لا هتنفعك كاميرا أمامية ولا خلفية لا ب note 3 ولا ب6600.
الحقيقة الثانية : إن السيلفي كل يوم بيصغر فقد بدأ بأخذ سيلفي للوجه بالأكتاف ووصل لأخذ السيلفي لصباعي المتعور على طريقة "بوس الواوا " مرورا بتصوير الرجلين كأنها دليل على إنك ضارب الدنيا طناش ونصيحة للشباب ما تصوروش رجليكم أبوس إيديكم بتبقى بالظبط عاملة زي رجلين إنسان الغاب..وصولا بقى لتصوير عينك ضوافرك ودنك..مناخيرك ..السيلفي بدأ كبيرا وصغر "عادي الحاجة بتقل بركتها بمرور الوقت هي جت على السيلفي"
الحقيقة الثالثة : بالنسبة للبنات أو الشباب ممن يأخذون سيلفي قدام مرايات الحمامات.. فيه غيركم داخل الحمام علشان يلبي نداء الطبيعة وعليه باقترح نعمل حمام رجالي ..حمام نسائي ..حمام سيلفي زي photo booth واللي داخل يدفع رسم دخول ونتبرع بيه لصندوق تحيا سارة !
الحقيقة الرابعة : إننا انتقلنا من مرحلة "يلا نتصور سيلفي" لمرحلة "صورني وأنا باخد سيلفي" .. #مرار طافح.
الحقيقة الخامسة : إن السيلفي بقى مرض انتقل من الإنسان ليصيب الحيوان ؛ فليس لطيفا أن تدع قطتك أو كلبك يلعب في موبايلك ويتصور سيلفي لوحده زحزحه واتصور جنبه أو خده على حجرك أو على كتفك واتصوروا سوا إذ لن يفرق كثيرا بوظ البطة من بوظ الكلب !
الحقيقة السادسة : وبها عدة حقائق وتلك الحقائق تمثل أكتر طرق للسيلفي المبتذل ولازم تتجنبهم !
1. لا تجمع بين سيلفي الجيم و check in عرفنا خلاص يا أخي إنك في الجيم من السيلفي وشوفنا six packs ..بطل الأفورة اللي جابتنا ورا وبطل منظرة وكفاية أنعرة !
1. ما تستغليش زحمة كوبري 6 أكتوبر وتاخدي عشروميت سيلفي لنفسك ولعربيتك ولحزام الأمان وللهيد فون وتقولي لنا أووف الدنيا زحمة سيلفي، احمدي ربنا إنك في عربيتك قاعدة في التكييف غيرك مزنوق في مترو تحت الأرض محشور في أحضان الركاب أكتر من حضن مامته وبيشم روايح الناس بكل الأشكال والنكهات ! أين الريكسونا شلتونا !
1. ما تاخديش سيلفي blurry اللي هو ادخل تأثير بيبوظ الصور ويخليها مغششة كده إلا إذا كنتي مش حاطة ماكياج وخايفة إن Followers بتوعك ما يعرفوش يفرقوا بينك وبين أخوكي صابر!!
1. ما تاخديش سيلفي وإنت لسه صاحية من النوم فيما يعرف ب bed selfie وتكتبي لنا: لقد استيقظت أيها العالم .. صدقيني العالم ماشي وصاحي من قبل إما تستيقظي والأهم ما تاخديش سيلفي وإنتي بتمثلي إنك نايمة ما هو يا أنتي هبلة يا أنتي هطلة نايمة هتصوري نفسك سيلفي إزاي !!
1. بلاش الداك فيس أو البوز بالمصري لأنها بتقلب على بق إسماعيل ياسين.. جربوا بوز القرد ... الكارثة إما تلاقي شباب بيعملوا "داك فيس" طيب يا أخي خليها "ديك" فيس حفاظا على Gender.
1. كفاية إحداث مش لازم تاخد سيلفي مع البيتزا والأكل والشرب والمية والكوباية الفاضية والشيكولاتة الكادبوري وتنزلها عرفنا إنك جعان بلاش إعلان شيكولاتة سنيكرز يا محدث النعمة!
1. للبنات تجنبي حركة ارفع ايدي وامسك شعري واضرب بوز بروج أحمر فاقع علشان ابان كيوت وملكة إغراء كده حضرتك قالب على إعلان لريكسونا ..
1. بلاش تنزل 5 صور سيلفي بنفس الوقفة والطريقة على الانستاجرام فصورة واحدة تكفي.. وبلاش تعد اللايكات اللي بتجي هي مش مسابقة الشمعدان يا أخي جمع واكسب!
الحقيقة السابعة : خلال الشهور المقبلة أكيد هنلاقي أخبار على غرار "كشكول الأول" في كيفية أخذ السيلفي .. "الأضواء" في المراجعة النهائية لتمثيل duck face ، "سيلفي التلميذ" لسيلفي أكثر احترافا ، لمشاهدة فضيحة شاب لم يأخذ سيلفي اضغط هنا ، تعلم السيلفي بدون معلم خلال 10 أيام ، القبض على شاب يشتبه في عدم قيامه بأخذ سيلفي بعد أن أنهى مكالمته ووضع الموبايل في جيبه بسلام ..استعدادات كأس العالم للسيلفي برعاية آي فون وأولومبيات السيلفي برعاية انستاجرام..
الحقيقة الثامنة : مش بعيد يفتحوا مراكز للتدريب على السيلفي ومراكز تانية للعلاج من إدمان السيلفي وأعراض الانسحاب وبدل رواية "ربع جرام" الشهيرة هتبقى "سيلفي جرام".
الحقيقة التاسعة : إن السيلفي بات وسيلة للترحيب بالناس في البيت أو في أي مكان ؛ لو فيه ضيوف أو قابلت أصحابك أو ناس قديمة أو ناس جديدة أو ناس حبيبة لازم تقول يلا ناخد سيلفي لدرجة إنها باتت أفضل من إنك تعزم حد على كانز كوكاكولا!
الحقيقة العاشرة :
لا شك إن السيلفي هوسا ومرضا ودليلا على النرجسية الفجة وبيجيب القمل وبيجيب خناقات خصوصا إما تزعل إن أصحابك ما عملوش لايك على نفس صورة السيلفي اللي بتشيرها كل يوم على تويتر وفيس وانستاجرام أو لما تنزل صورة سيلفي وأنت شكلك حلو وأصحابك طالعين شبه المفقودين وشبه صورهم في البطاقات الشخصية وابحث مع الشرطة لكننا لن ننكر كونه ظاهرة الساعة وأنه وسيلة فعالة تسجل لنا لحظات مهمة وفاصلة .. تخلد لحظات ربما تضحكنا وقت تدافع الكآبة والهموم على أنفسنا.. المشكلة دوما لم تكن بالسيلفي أو بوسائل الاتصال الاجتماعي أو بأي مستحدث تكنولوجي المشكلة تكمن بكيفية استخدامنا لتلك الوسائل .. لا تظلموا السيلفي وsmart phone لأننا المشكلة مش هما !!
استمتعوا ..سجلوا لحظاتكم السعيدة والمميزة مع من تحبون ..افرحوا هيصوا لأن الفرحة اللي بتروح مش بترجع في زمن الإحباط والألم اليومي والحالي ولو الفرحة في إنك تأخد سيلفي خده وانبسط وانشكح بس حاول تتملك نفسك وكفاية 10 سيلفي في اليوم مش لازم 100.. ومش هاعمل لكم مصلحة اجتماعية وجو ابعدوا عن السيلفي لأنه حاجة جاية من العولمة
أصلا نص الكلام اللي أنا كاتباه من واقع مشاهداتي الشخصية ومن واقعي السيلفاوي وما افعله بالسمارت فون بتاعي !
ودمتم على خير وسيلفي وبطارية دايما مشحونة ونت سريع ..