اللي يتجوز خسيسة مصيره إيه؟!

يا ترى الجواز بيمثلّك إيه؟ الجواز بيمثل للعبد لله بطيخة كبيرة جدًا! وإنت ونصيبك فلو كنت ناصح وخدت البطيخة ع السكين – حَمار ونقاوة - يبقى ياسعدك وهناك هتعيش عيشة فل اللهم لا حسد.. لكن لو استعجلت وصدقت كلام بائع البطيخ واشتريت البطيخة على عماك وهي مقفولة يبقى ربنا يكون في عونك وكلنا لها وأقدر أقولك شدة وممكن تزول بما انها طلعت – قرعة – البطيخة دماغك متروحش لبعيد !! واللي قبلينا قالوا في الأمثال اللي " يتجوز خسيسة عمره ما يلاقي منها غير الدسيسة " طبعا المثل واضح ويشرح نفسه بنفسه.. وخسيسة مشتقة من الخسة وتعني الندالة، أما الدسيسة فجمعها دسائس وتعني أن جنابك مش هتشوف من مراتك غير الإيقاع في المشاكل بكل أنواعها والنذالة والخيانة والغدر وان شاء الله سيرتك هتكون على كل لسان!
فيها ايه لم تختار البطيخة قبل ما تشتريها ياريت نركز واحنا بنختار ولازم تكون - حَمار ونقاوة - والجمال مش في الشكل بس وان كان مطلوب ولكن الجمال الحقيقي جمال الخلق فالمرأة الفاضلة كنز إذا وجدته احتفظ بسر إكتشافه لنفسك.