حصاوي منور

( المواطن الغلبان حسن حصاوى يغشى عليه من حين لآخر، وعندما يفيق لا يفهم ما حدث حوله من تغيرات، ولكن أحيانًا يجعل من يسمعه هو الذي يغشى عليه).
( النور مقطوع عن المقهى كبقية الأحياء)
( الشاب السلفي يجد حصاوي جالسا مهموما يكاد يكلم نفسه)
السلفي: ما لك ؟ يعني مش مبسوط زى عوايدك.
حصاوي: طب وانت بتضحك على عدم انبساطي ليه؟
السلفي: مش قصدي، كلنا في الهم زى بعض، طبعا أنت متضايق عشان النور أغلب الوقت
مقطوع وعايشين في الضلمة.
حصاوي: وافرض.. أنت فرحان ليه؟
السلفي: أنا بضحك عليك عشان واضح إنك بتخاف من الضلمة.
حصاوي: مش دايما، لكن أحيانا لازم نخاف لما تكون فرصة لو استغلها اللصوص أو الإرهابيين ولو أن المجتمع والدولة مسيرها تقبض عليهم وتكسر شوكتهم، لكن يا ريت الضلمة في حد ذاتها هي المشكلة، أنا بتكلم على ضلمة من نوع تاني.
السلفي: زى إيه يا فتك؟ حد تاني غير اللي قلت عليهم يقدر يعمل أي حاجة في الضلمة؟
حصاوي: أيوه، أنت وكل اللي أنت تبعهم بينبسطوا بالضلمة، ويعملوا فيها حاجات كتير.
السلفي: ازاي بقى؟ هنعمل إيه في الضلمة؟
حصاوي: تعملوا فيها الاجتماعات السرية مثلا، اللي بتتفقوا فيها على التخطيط بتاعكم.
السلفي: دا من حقنا.
حصاوي: أيوه بس دا غير اللي بتقولوه للناس وهو تقريبا عكس اللي بتخططوه، واللي ما يفرقش كتير عن أهداف الإخوان.
السفلي: لو جدع تثبت الكلام دا.
حصاوي: فيه اللي بتشرحه للناس وفيه فيديوهات متصورة لكم، لكن بترجعوا تتبرءوا منها عند اللزوم، وتغالطوا وتسفسطوا، يعني مشكلتنا الأساسية إن مافيش تنوير.
السلفي: طب ما أنت بتقول زيي أهو.
حصاوي: بتكلم علي التنوير.. مش النور.
السلفي: طب وإيه الفرق بين الاتنين؟ ما هو النور هو نفسه التنوير.
حصاوي: لا.. تفرق كتير، عندك أديسون مثلا اللي اخترع المصباح الكهربائي.
السلفي: ما له بقي؟
حصاوي: اخترعه في الضلمة على ضوء شمعة.
السلفي: طب وإحنا ما لنا؟
حصاوي: ما لنا ازاي؟ دا احنا كلنا بنستخدمه وبنعيط أهو لما النور ينقطع.
السلفي: ماشي، إيه العيب بأن كل الناس تعيش في النور؟.
حصاوي: العيب إن كلامكم كله ما لوش دعوة بالتنوير، محدش فيكم بيعمل حاجة مفيدة للبلد زى بقية العالم المتقدم عننا، كل كلامكم في الدين، ويا ريته مفيد، دا دين خصوصي بتاعكم أنتم ومش ناويين تعملوا حاجة غير كده، قولي على حد منكم عمل أبحاث
علمية، عمل ابتكارات أو دراسات تساعد على التنمية الاقتصادية وتحل مشاكل الناس، وبالمرة تحاول تحل مشكلة الضلمة اللي إحنا فيها.
السلفي: دي فعلا مش شغلتنا، إحنا شغلتنا نحض على الفضيلة ومكارم الأخلاق والدين الحنيف.
حصاوي: من منظوركم أنتم، ومين أنتم؟ مين اداكم الحق إنكم تراقبوا أعمال الناس وتقولوا دا صح ودا كخة، عاملين شغلتكم تحرموا وتحللوا حسب مزاجكم.
السلفي: إحنا مش بنجيب حاجة من عندنا، كله من المراجع المعترف بيها، وإحنا بنفسرها وبنشرحها للناس.
حصاوي: الناس كلها متدينة وبتراعي ربنا، وكل واحد متعلق من عرقوبه، أنتوا تعرفوا اللي جوه الناس إيه؟ والناس تعرف إيه اللي جواكم؟، المثل بيقول: قالوا للحرامي احلف، قال: جالك الفرج. تفرقوا إيه بقي عن الإخوان؟
السلفي: إحنا مش بنرهب حد.
حصاوي: لكن بتهددوا الناس وتخوفوهم، وتعملوا فيها رسل ويمكن أنبياء.
السلفي: إحنا بنعلمهم الهداية والتقوى.
حصاوي: واشمعني أنتم؟ كام مذهب في الإسلام بيختلف معاكم؟ وكام مذهب في المسيحية نفس الشيء، ما تسيبوا الناس تختار من غير تأثير عليهم، كأن معاكم انتم بس مفاتيح الجنة والنار، وإيه حكاية الدقن اللي بتربوها، علامة ودليل الصلاح؟ ما كانش حد غلب.
السلفي: إحنا بنعمل بتعاليم الدين، وتعاليم السلف الصالح.
حصاوي: الدين بتاعنا ما كانش فيه دقون ولا اللبس اللي بتلبسوه ولا الساعات اللي في أيديكم، ما فيهوش تليفزيون ولا العربيات اللي بتركبوها، تقدر تقولي ما بتركبوش جمال ليه زي زمان السلف الصالح؟ ما بتدعوش الناس تحارب بالسيوف بس ليه؟
( النور يعود للمقهى )
السلفي: شايف جبت سيرة السيوف رجع النور في الحال، آمنت بالله بقى؟
حصاوي: لكن التنوير مش هيرجع طول ما أنتوا فوق دماغنا، ومش هيرجع النور على طول غير لما نتفق مع جماعة من الأجانب ولا مؤاخذة عشان يحلوا لنا مشكلة النور، أو نستورد منهم كهربا بالطاقة الشمسية اللي مالية بلادنا ومش عارفين نستفيد بيها.
( السلفي: يغشى عليه )
608
لينين الرملي
هرش مخ
الأحد 7 سبتمبر 14
1 كان يجرى إيه؟
لو كان الإخوان وفاروق وعبد الناصر منحوا الفلسطينيين سيناء وجنبوا آلاف المصريين كل هذه الحروب وضياع المليارات ؟!
17
2 المتهور
أكد رئيس جامعة القاهرة أنه لن يسمح بتحويل الجامعة لمكاتب حزبية ومُصرّ على قرار إلغاء الأسر الدينية والحزبية، انت قد الكلام دا؟!
22
3 الحرام
هل حقوق الإنسان ترضى أن تقصف أمريكا داعش لمجرد ذبح اثنين من رجالها؟
أين العرب؟!
15
4 الحلم العربي
هل كان المصريون يحلمون في عام 1948 أن تحل مشاكل فلسطين بأن تعطيهم مصر سيناء؟!
15
5 الخائن
محمود عباس يسلم الجامعة العربية قائمة بأنفاق جديدة سرية بين غزة ومصر على حدود رفح، بكره حماس تدبحك بواسطة داعش!.
19
6 استعجال
حكم قضائي بوقف قناتي الجزيرة مصر ورابعة، مستعجلين ليه بس؟!
9
7 العيب
الشهيد سيد قطب وحسن البنا اسم شارعين في مصر، ازاي نسيوا يسموا شارع باسم مرسي العياط، مع إن محدش واخد باله؟ والله عيب!.
21