حصاوي الحالم

) المواطن الغلبان حسن حصاوى: يغشى عليه من حين لآخر.. وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذى يغشى عليه(..
) الشاب السلفى: يعاود زيارة المقهى الذى يرتاده حصاوي).
السلفى: أنا مش فاهم الجرايد بتكتب على متحف فرعونى أتخرب وأتسرق، طب وإيه يعني، ما المحلات بتتنهب والقصور والعربيات وحتى دكاكين الغلابة بتتسرق كل يوم.
أشمعنى يعنى زعلانين قوى على المتحف دا أو اللى زيه؟
حصاوى: على رأيك دا حتى مصر ما فيهاش أكتر من التحف والمتاحف والآثار والأصنام.
السلفى: دا غير المعابد استغفر الله العظيم، وراسمين عليها صور بنات لابسين جونلات قصيرة وشفافة تبين رجليهم من تحتها.
حصاوى: يمكن كان عندهم أزمة قماش.
السلفى: إزاى دول كانوا أغنيا وعندهم كل شيء، لكن الفجور بقى بعيد عنك تقول إيه؟
تستنى إيه من ناس ما يعرفوش ربنا.. إحنا اللى دلوقت لا عارفين ناكل ولا نلاقى متوى ولا حتى هدمة نلبسها.
حصاوى: ياه هو أنت فقير للدرجة دي؟
السلفى: لا ربنا مسهلها.. لكن أنا بتكلم على المسلمين اللى مش لاقيين ياكلوا.. هنا وفى بلاد كتير من بلاد المسلمين.
حصاوى: ولا عارفين يتعالجوا.
السلفى: طب قول العلاج ما فيهوش مشكلة لأن الشفا من عند الله وحده.
حصاوى: أه طبعا.. ولو أن المؤرخين بيقولوا إن الفراعنة كان عندهم علاج لأغلب الأمراض، وحتى عملوا عمليات فى المخ.
السلفى: ما تصدقش.
حصاوى: دا مش أنا العلماء بتوع العالم اللى بيقولوا كده.
السلفى: كذب وأفك وتهويل، ما كنش حصلنا دلوقت اللى إحنا فيه.
حصاوى: بس العلماء بتوعنا قالوا كدا زيهم.
السفلى أبدا أنا ما سمعتش عالم واحد مننا قال الكلام دا.
حصاوى: بس أنا قريت وسمعت من علماء مصريين بيقولوا عكس كلامك.
السلفى: وأنت بتعتبر دول علماء؟ دول مصريين بس كفار زى الأجانب.
حصاوى: ما هو الحضارة دى أندثرت تقريبا لما غزانا الهكسوس والفرس والليبيين واليونان والرومان والفرنساوية والإنجليز.
السلفى: لحد ما جه الفتح الإسلامى ودا من رحمة ربنا علينا .
حصاوى: فعلا، بس إحنا بعد كده احتلنا الأتراك.
السلفى: لأ دا ما كنش اسمه غزو دا كان تكملة للفتح الإسلامي، لأن الأتراك مننا وعلينا.
حصاوى: بس بعد كده رجعنا ورا.
السلفى: ما هو دا بسبب الفرنجة الكفار.
حصاوى: والفرنجة مالهم ومال المماليك اللى حكمونا مع أنهم عبيد؟
السلفى: بس كانوا مسلمين.
حصاوى: يقوموا ينهبوا الشعب واللى ما يدفعلهمش اللى عايزينه ينزلوا فيهم تقتيل ؟
السلفى: يعنى عاجبك اللى إحنا فيه؟ دى الناس مش لاقية اللقمة، وقربنا ندخل على مجاعة.
حصاوى: وأنت عندك حل؟
السلفى: طبعا، أمال إحنا عاملين حزبنا ليه؟
حصاوى: ليه ؟
السلفى: عشان ندخل الإسلام الحقيقي.
حصاوى: طب ما أنا عندى حل سريع عشان ما يبقاش عندنا مجاعة.
السلفى: إزاي؟
حصاوى: إحنا ما يلزمناش كل الآثار والأصنام والمتاحف وأوراق البردى والتوابيت وباقى الخزعبلات اللى عندنا.
السلفى: يسلم فمك.
حصاوى: ودى حوالى تلت الآثار اللى فى العالم، والخواجات الأجانب الهبل نفسهم فيها وبيتنافسوا عليها مع بعض وكل ما يقدروا بيسرقوها.
السلفى: تمام، ما هم متخلفين بعيد عندك.
حصاوى: عظيم، يبقى الحل نعمل مزاد كبير على كل الآثار دى والدهب اللى فيها.
السلفى: الله. ربنا يفتح عليك يا شيخ.
حصاوى: وبالشكل دا هنبقى عندنا ثروة أكتر من كل بلاد العالم، وممكن فى الحالة دى نبادلهم كل الحاجات دى وناخد منهم قصادها مدافع وصواريخ وطائرات وقنابل وأقمار صناعية.
السلفى: دى فكرة عبقرية، أنت لازم تخش الحزب بتاعنا، وبعدين؟
حصاوى: لسه ما عرفتش؟ لما يكون عندنا أسلحة زى اللى عندهم وأكتر، نبدأ بقى ننشر ديننا الحنيف فى كل بقاع الأرض، وما حدش يقدر يقف قصاد قوتنا.
السلفى: الله أكبر، هو دا الكلام.
حصاوى: وبعدها نهجم عليهم ونكسر كل الأصنام اللى اشتروها مننا، مش كده وبس، وكمان كل الآثار اللى فى الهند والسند والصين، وبقية الكفار والملحدين فى العالم زى روسيا واللى زيها.
السلفى: بس نبدأ بإسرائيل.
حصاوى: طبعا، ودى فيها شك؟ بس فيه عيب واحد فى الفكرة دي.
السلفى: إيه هو؟
حصاوى: يخترعوا أسلحة جديدة لسه ما نعرفهاش وأول ما ياخدوا آثارنا يهجموا هما علينا ويحتلونا.
السلفى: طب وإيه الحل فى الحالة دي؟
حصاوى: ما فيش حل، ساعتها نفوق من الحلم ونبطل هرتلة.
السلفى: يغشى عليه.
لينين الرملي
622
هرش مخ
18 أغسطس 14
1 الجديد جدا
وفد عربى سيتوجه لنيويورك وجنيف لإجراء مباحثات بهدف فضح الجرائم الإسرائيلية.
وهو ما يثبت أننا نتبع سياسة جديدة جدا... جدا!
19
2 عدو ولا حبيب
اتهمت الدعوة السلفية أعضاء فى تنظيم الإخوان بالاعتداء على مسجد تابع لهم وحطموا بعض أجزائه. معلش عدوك ابن كارك!
19
3 كفالة
تجار الحديد يدفعون كفالة مائة مليون جنيه للإفراج عن عز.. مؤكد طبعا سيسجلونها في دفاتر الضرائب كمصروفات العام الحالي!
19
4 الشارع لهم
الباعة الجائلون يرفضون الانتقال إلى جراج الترجمان.. السؤال... لمن يدفعون إيجار
الأرض الآن؟ أم هم يغنون (الشارع لنا(!
17
5 دكتوراه
حملة الماجستير والدكتوراه يتظاهرون أمام رئاسة الوزراء ويطالبون محلب بتعيينهم.
والحمد لله أنهم لم يطالبوه بتزويجهم!
16
6 النصاب المطلوب
مصر تنجح فى تهدئة غزة لخمسة أيام جديدة.. الغريب أن عدد القتلى والمصابين فى
غزة لم يصل بعد إلى خمسة آلاف حتى الآن!
22
7 فسحة
وزير الخارجية الأسبق صرح بأنه لا يتوقع شيئا من مفاوضات الفصائل الفلسطينية .
يعنى جايين يتفسحوا كالعادة.