كيف تبنى مستقبلك؟.. بالفهلوة!

ماذا تعنى كلمة مستقبل؟
المستقبل هو الشئ المتوقع حدوثه، والذي يسعى الجميع إلى تحقيقه بأفضل صورة ممكنه، فالاباء حريصون على بناء مستقبل مأمون لأبنائهم للاطمئنان عليهم، وفى الماضى كان يرى الاغلبية أن تحقيق مستقبل جيد منوط بالتعليم، نظرا لما يحمله التعليم من عوامل أمان، فبعد التخرج وظيفة وبعدها شقة وممكن عربية وكمان عروسة وعيال ووارد رصيد في البنك، ولكن بعد مرور عدد من السنوات وارتفاع معدلات البطالة وخاصة بين حملة الماجستير والدكتوراة – اللى هم صفوة التعليم- اختلفت معايير بناء المستقبل المضمون
*أولا: سيبك تماما من التعليم لأنه تضييع وقت على الفاضى..كفاية تتعلم تفك الخط.. إنما مدارس ودوروس خصوصية وجامعة الكلام دا.. كله مجهود على الارض لا هيقدم ولا يأخر
*ثانيا: حوش على قد ما تقدر وعيش على حساب الوالد اوعى تصرف مصروفك لأن داه يكون رأسمالك اللى هيحقق لك أحلامك
ثالثا: أوعى تعرف بنات..ولو عرفت أوعى تضيع فلوسك عليهم وكل يوم عزومات وخروجات والكلام دا..خليها هي تعزمك وانسى دايما المحفظة في البيت
رابعا: اقعد مع نفسك وفكر كويس في المشاريع اللى ممكن تحقق المكسب السريع واعمل بيهم جدول، مثلا عربية كبدة..دى مش عربية والسلام.. لازم تختار المكان اللى هتوقف فيه لأنه هيحدد نوع الزباين وقدرتهم على الدفع..نصيحة اختار ديما موقف الميكروباص..كل السواقين بيحبوا الكبدة وبياكلوا كتير.. وممكن كشك سجاير..سجاير بس مش حاجة تانية.. مصر كلها بتدخن والتدخين عندهم أهم من الاكل.
*خامسا: ممكن تأسس لاكتر من مشروع في نفس الوقت.. لو قدرت تعمل دا اعرف انك خلاص بقيت رجل أعمال.. يعنى ممكن تشترى ميكروباص وتفتح قهوة للسواقين.. كدة بقى هتقدر تشترى الميكروباص التانى في ااقرب فرصة
* خليك فهلوى وطبق المثل الصينى.. لاتضع البيض في سلة واحدة.. يعنى قلب عيشك في كل اتجاه ووسع مشروعات على قد ماتقدر.. ولما تتقدم لبنت متعلمة وتقولك مؤهلك إية؟.. قولها..رجل أعمال!