مشوار باند: راجعين لجمهورنا بأغانٍ جديدة

"أرحل لكني بعود" .. هكذا تصف أحد أغانيهم ما مروا به خلال الفترة الماضية، من غياب عن جمهورهم، ولكنه لم يكن غيابًا عاديًا، حيث جهزت الفرقة للعديد من الغاني الجديدة التي ستفاجئ بها جمهورها قريبًا، بأجدد حفلاتها خلال شهر يونيو المقبل، إضافة إلي أعضاء جدد بالفرقة، سيضيفون لها الكثير.. (مشوار باند)
وفي حوارنا مع فوكال الفرقة، أحمد يوسف المعروف ب "جو" قال في تصريح خاص ل "بوابة الأندرجراوند" عن أسباب غيابهم "الغياب كان غصب عننا، لأن كمان (توني) أحد أعضاء الفرقة سابنا، وحبينا نجرب ناس تانية، بس للأسف مكنوش حاسين المزيكا، وده طبعاً عطلنا كتير، ده غير إننا مكناش لاقيين مكان نعمل فيه حفلة، وأصحاب الأماكن خايفين من العدد اللي ممكن يجي ومن التأمين للحفلة، عشان كده ما عملناش حفل عيد ميلادنا، لأننا عايزين مكان يليق بالجمهور اللي هيجي".
جديد مشوار باند..
ويتابع جو "إحنا بنحاول نشوف مكان عشان حفلتنا الجاية، لأن زي ما قولت قبل كده الناس خايفة من العدد، ده غير إن حالياً مفيش أمان".. ويضيف أن مشوار باند ستقدم قريبًا حفلًا لجمهورها، يضم العديد من الأغاني الجديدة، وإن أهم ما يميز تلك الأغاني هو موضوعاتها.
الأعضاء الجدد ..
وأشار أحمد يوسف أن فرقة مشوار باند ضمت لها حديثاً كل من فوزي عازف الجيتار- ومحمد يوسف عازف الكي بورد – و وليد عازف الإيقاع، واصفاً إياهم بالأتي "دول أكتر ناس شبهنا"، وتابع لافتاً "لازم لما نجيب فنان بيلعب مزيكا يكون حاسسها وقادر يتواصل مع الناس".
الألبوم الأول..
ويضيف جو "الألبوم بتاعنا كنا بنسجل فيه من شهرين بس دلوقتى وقفنا شويه عشان الحفلة اللى حصلت فى مرسى علم والحفله اللى هتبقى هنا إن شاء الله بس هنرجع نكمل بعدها".
"بيت صغير جوه حارة" و "أيوب"..
تعد هاتان الأغنيتان الأكثر طلباً من قبل جمهور مشوار باند، وبرر أحمد يوسف الأمر قائلاً " أغلب أغاني الفرقة بتلمس حاجه بعينها عند الجمهور، ده غير إنها بتأثر فينا إحنا كمان كأعضاء الفرقة، بس فعلاً دول اكتر أغنيتين أتعرفنا بهم، وفي أغاني غيرهم كمان لو الناس سمعتهم هيحسوها أكتر".
الأولتراس ..
وجهت للفرقة العديد من الإنتقادات عقب غنائهم لأحد أغاني أولتراس أهلاوي وهي "حرية"، ويرد يوسف علي ذلك الأمر قائلاً "والله ساعتها كان حاصل موقف كلنا أتأثرنا بيه وحبينا نهديها للناس، هى أغنيه حلوه الأولتراس عاملها بس وقعنا فى مشكله بسببها فعلاً.. لأننا لاحظنا إن الناس بتطلبها على طول وبعد كده حسينا إن بقى فى عنف فى الحفلات، بس أهى تجربه والواحد بيتعلم منها".
الريجي العربي شبه بعضه !..
وأنهي أحمد يوسف حديثه إلينا قائلاً "لكل اللي بيقولوا الريجي العربي كله شبعه بعضه، أحب أقولهم، مفيش حاجه بتشبه بعضها، لأن المزيكا اسمها السهل الممتنع حاجه سهله جدا بس مش أى حد يعرف يعملها، ولو إنتوا شايفين إنها شبع بعض أحب أقولهم انتوا فاتكو كتير جداً المزيكا دي هى البوابة إننا نفهم باقي انواع المزيكا،نفسي يسيبوا نفسهم ويحسوا المزيكا وقت ما يسمعوها هيتبسطوا جداً جداً".