افرحى ياعروسة.. أنا العريس

من اهم الجُمل اللى بتسمعها البنت من امها والناس اللى حواليها مع بداية سن العشرين "وف اقوال اخرى" من سن 15 سنة لحد بعد ما تقابل الفارس الهُمام ابو العيال في ميكروباص ابيض اصل الحصان بقى وسيلة مواصلات قديمة شوية
- "الرجالة كلهم شبه بعض" .. مبدأ مؤمنة به كل الامهات مع اول خناقة بين بنتها وجوزها تسمعها الجملة دى وتمصمص شفايفها وتتحسر على حالها مع جوزها (اللى هو ابو البنت يعنى ) .
- " الراجل زى العيل" يعنى لو اللعبة معجبتهوش هيدور على لعبة تانية .. انتى وشطارتك ف اللعب بقى ياحلوة .
- "متخليهوش يزهق منك " جددى كده وغيرى ف شكلك" هى تسمع الجملة دى من هنا وتروح تعبى اكل من هنا علشان تتخن وشكلها يتغير .
- "خبى عليه الحمل في الاول" ده على اساس انه من الاعداء وممكن يحسدك كده الامر مايسلمش .
- "حوشى من وراه .. خبى مرتبك عنه " ويكأن الراجل ده برضه مش هو اللى صارف عليكى دم قلبه وممكن يسيبك وانتى نايمة ويسرق فلوسك .
- "يامأمنة للرجال يامأمنة للمية ف الغربال" لا تعليق بصراحة .
- الرجالة عينهم فارغة" القول ده بالذات على جانب كبير من الصحة .
- "اتقلى عليه" عملا بمبدأ الراجل زى طابع البوسطة كل ما تفى عليه يلزق اكتر .
- "جوزك على ما تعوديه" افرضى ياطنط هعوده على حاجات وحشة ذنبه ايه الراجل بس .
- "ضل راجل ولا ضل حيطة " ودى تتقال لواحدة عايزة تتطلق او سنها كبر وفاتها القطر .. رغم ان ضل الحيطة احسن ف الحر ده .
- "خدى اللى يحبك مش اللى انتي تحبيه" على اساس ان لو انتوا الاتنين بتحبوا بعض الجوازة هتبوظ .. مش عيب ولا حرام والله .
- "يغلبك بالمال تغلبيه بالعيال" يعنى هو مش ماتش كورة يعنى مش كل ما يجيله فلوس تخلف هى عيل .. مصر مش مستحملة زيادة سكانية ربنا يكرمكم .
- "الراجل ميعبيوش الا جيبه" يعنى ممكن يبقى فيه عيوب كتير عادى بس تغاضى عنها طالما جيبه مليان .
- "لما تتجوزى جوزك ي .... على حسب الطلب اللى تطلبيه بقى " وكأن كل حاجة نفسك فيها هتفضل حلم مؤجل لحد ما يجى حيلة امه ويحققها .. ويجى حيلة امه وابقى قابلينى .
- "شوفتى بنت طنط شفعات جالها شبكة بكام" حسرة قلبى عليكى يابنتى ودى من اشهر اسباب الفركشة ف مصرنا الحبيبة .
هو بصراحة الموضوع ده بالذات الجواز والخطوبة والحب موضوع متشعب ومحتاج كلام كتير وبجد يعنى رفقا بالبنات شوية مش كده .. اكيد حياة البنت مش متوقفة على العريس واحلامها وطموحاتها مش مشكلة ويوعدوها ويرسموا حياتها على مزاجهم على امل انها ف بيت جوزها هتعمل اللى هى عايزاه وتروح هناك تكتشف الحقيقة المُرة وتكتشف كمان ان دى حياتها هتكمل فيها سواء عجبتها ولا مُتمردة عليها ... الواحد بيعيش مرة واحدة بس ف احسنوا الاختيار اعزكم الله وسيبكم من كلام الناس مابيأكلش عيش حاف .