مصر منورة

(المواطن الغلبان حسن حصاوي يغشى عليه من حين لآخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشى عليه).
كان الوقت مساء عندما دخل حصاوي المقهى يحمل في يده كتابًا وجلس في ركن مضيء، ثم فوجئ بالجرسون يأتيه مسرعا على غير العادة.
الجرسون: أهلا بالبيه.. طلباتك يا عسل؟
حصاوي: قهوة ع الريحة من فضلك.
الجرسون: عشرة جنيه والدفع فوري.
حصاوي: أفندم؟ أشمعني؟
الجرسون: بلا قافية عشان قاعد في النور.
حصاوي: أمال أقعد في الضلمة؟
الجرسون: بص نحوك.. كل الناس قاعدة في الضلمة، عشان يدفعوا حق الشاي والقهوة بس، لكن أنت عايز تقعد في النور يبقي تدفع حق الكهربا.
حصاوي: من امتى الكلام دا؟
الجرسون: ما هو الحكومة هتغلي سعر الكهربا.. عايز تقرا أو تذاكر، تقعد في بيتكم وتقرا زى
ما يعجبك بس مش على حسابنا.
حصاوي: لا يفتح الله.. أنا أطلع بيتنا وأقرا إن شالله على نور شمعة.
الجرسون: ما أنصحكش أنت ساكن في السطوح والكهرباء عندكم مقطوعة يعني الأسانسير
متعطل وهتطلع على رجليك يا جميل.
المثقف: (متدخلا) ما هو لازم يبقي فيه وسيلة قدام الحكومة عشان ترشد الطاقة الكهربائية يا حصاوى.
حصاوي: هو ما فيش حل تاني.. خلاص أنا أقف تحت عمود النور اللي في الشارع وأقرا على نوره.
الجرسون: عمود النور إحنا اللي منورينه. ولا أنت فاكر أنه هبة من الحكومة؟
حصاوي: وهو كان عمود أبوك.. ولا أنت بتدفع حق النور اللي ساحبه من العمود؟. دا عمود عمومي يعني بتاع الشارع كله.
الجرسون: بس أنا الوحيد اللي بدفع تمن التحويلة اللي باخدها منه للقهوة.
حصاوي: طب ورينا وصل الكهربا.
الجرسون: أنا بدفع لمباحث الحكومة لما تيجي تعاين، لكن ما بيرضوش يدوني وصل.
المثقف: تبقى برضه سارقه من الحكومة.
الجرسون: ما هو الموظف مرتبه مش بيكفيه وأنا بتعاون معاه ثم دا حقي، لأننا في منطقة عشوائية يبقى تستحق الدعم.
المثقف: لا في دي عنده حق يا حصاوي.. المفروض الحكومة مسئولة عن دعم الفقراء.
حصاوي: لكن دا اسمه سرقة مش دعم.
الجرسون: خلاص اشتكينا للحكومة لو عرفت توصل لحاجة أبقي تعال تف في وشي.
المثقف: بس دا أنت نفسك يا معلم معترف أنك سارق التيار.
حصاوي: جرب تقول كده عشان المظاهرات تقوم ضدك.
المثقف (مستدركا): يا نهار أسود على كده مش هنشوف البرنامج اللي طالع فيه الليلة دي.. يا دي المصيبة.
حصاوي: بالعكس دا ترشيد للطاقة لأن ما حدش هيستفيد حاجة من اللي هتقوله.. ثم عندك
في بقية القنوات أفلام مليانة رقص أو حتى إعلانات ودي الناس بتفضلها عن كلامك.
المثقف: فكرتني أنا بنتي قعدت تكتب في رسالة الماجستير بتاعتها ييجي عشر ساعات.
حصاوي: هايل.. يعني مش طالعة لك.
المثقف: بس المصيبة أن النور انقطع فجأة.
حصاوي: وماله؟ تكمل بكره.
المثقف: ما هي المشكلة أنها نسيت تخزن اللي كانت بتكتبه.. يعني هتضطر تعيد كل اللي كتبته من أول وجديد.
حصاوي: ما هي غلطتها أنها ما خزنتش اللي بتكتبه أول بأول.. ومع ذلك هي مش حافظة
اللي كتبته؟.
المثقف: للأسف لا، لأنها ناقلة الكلام من ماجستير قديم مش بتاعها.
حصاوي: ولك عين تدافع عنها؟
المثقف: المهم تاخد الشهادة، ما كله دلوقت بيعمل كده؟ اشمعني هي اللي وقعت من قعر القفة؟ ولا عشان ما هي بنتي ودي بلد بتكره المثقفين؟
الجرسون: ما تعطلنيش يا حصاوي.. يا تدفع حق الكهرباء يا تورينا عرض اكتافك.
حصاوي: أنا قايم وهشوف أي رصيف ولو ضلمة وأقرا الكتاب ولو على ضوء القمر.. سلامو عليكم.
المثقف: استني، إيه الكتاب اللي جايبه عشان تقراه؟ مهم قوي يعني؟.
حصاوي: أبدا لا مهم ولا حاجة.. لكن يمكن نلاقي فيه حل ينفعنا في مشكلة الكهرباء.
المثقف: يعني بيتكلم عن إيه؟
حصاوي: كتاب عن أديسون.. بيتكلم عن إزاي اكتشف الكهرباء وأخترع المصباح الكهربائي مع أنه كان بيشتغل على ضوء شمعة.
(المثقف يغشى عليه)
585
هرش مخ
الأحد 4 مايو 14
1 منتهى القسوة
وزارة الأوقاف تخصم شهرين من إمامين لدعمهم الإرهاب.. يا حرام!.
11
2 الدعم
إخوان بلا عنف تدعم صباحي.. فاضل 6 أبريل لتدعمه فيكسب الانتخابات، ودقي يا مزيكة!.
14
3 غرامة ظالمة
بدأ حمدين حملته قبل موعدها وستغرمه اللجنة العليا للانتخابات.. الظاهر فلوسه كتير!
13
4 الصلح خير
نفت وزارة الخارجية أن وزيرها شبه علاقة مصر وأمريكا بالزواج، لكنها علاقة مثل الزواج تحتاج الكثير من الجهد.. ظلمنا الراجل.. شد حيلك يا دكر!
21
5 للإسلاميين فقط
صرح وزير خارجيتنا في أمريكا أنه يريد تحقيق ديمقراطية تضم جميع الإسلاميين ولا تقصي
أحدا منهم.. نسي أن يقول وجميع المسيحيين. مع أنه كان في أمريكا!.
25
6- المحكمة الجنائية
المحكمة الجنائية الدولية ترفض طلب الإخوان في تجريم مصر.. مش كان الأولى يحربوا مع المحكمة الجنائية لمنظمة حماس الفلسطينية!
20
7 المنشورات معلش
حظر الشعارات الدينية والكتابة على الجدران خلال الانتخابات الرئاسية.. يعني ممكن يكتبوا منشورات
دينية أثناء الانتخابات وبعدها؟!
16