حصاوي ووزارة الثقافة

( المواطن الغلبان حسن حصاوى يغشي عليه من حين لأخر.وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه).
( حصاوي يدخل المقهى فيجد المثقف جالسا مهموما منشغلا ويتحدث في الموبايل فيذهب ويجلس بجواره ليتحرش به كما تحرش به المثقف في الأسبوع السابق !)
جصاوي إيه الأخبار بيقولوا الوزرة هتتغير صحيح؟
المثقف أيوه وعشان كده مبسوط.دا كان منتظر من مدة.أنت إيه رأيك ؟
حصاوي وإحنا لسه شفنا حاجة؟
المثقف بس لسه محتارين في منصب وزير الثقافة. دي أهم وزارة عندنا.
المثقف أه فعلا دي مشكلة.طب محدش عرض عليك المنصب؟
المثقف الحقيقة لسه.لكن فيه كلام يعني.
حصاوي طب لو عرضوها عليك توافق.
المثقف لكل حادث حديث.
حصاوي بيقولوا فيه كلام إنهم مرشحين الممثل الفكاهي إياه.
المثقف ما تصدقش.دي إشاعة كل واحد طمعان في المنصب بيروج لنفسه.
حصاوي بس أنا سمعت أنهم رشحوه فعلا وهو اللي رفض.
المثقف ما أظنش.
حصاوي ليه ؟
المثقف أولا هو له فيديو علي النت وهو بيمدح في صدام حسين وبيقول له يا ريت
كل الرؤساء العرب يعملوا زيك. ما كنش دي بقي حالنا.
حصاوي زيه في إيه ؟
المثقف في الصمود والتصدي.
حصاوي وصدام صمد فعلا تصدي فعلا ..بس للكويت عشان يحتلها.
المثقف وعشان كده الخليج كله ضده. لكن هو راح كمان للقذافي وأيده.
حصاوي طب ومصر إيه رأيها فيه ؟
المثقف المثقفين بينظروا له باحتقار شديد وبيقولوا إنه تافه.لكن عدد من الناس العادية
بتأيده.بالذات الشباب وبعض الثوار علي الفيس بوك كأنه مفكر.
حصاوي وهما مش عارفين تاريخه؟
المثقف يعرفوا منين هما مش بيشوفوا اللي ع النت! ثم أشمعني هو ؟ يعني لو عبد الوهاب كان عايش كانوا رشحوه للثقافة؟.لو كان الشاعر الشعبي اللي مات قريب لسه عايش ورشحوه، كان يبقي معلش.
حصاوي عشان شاعر يعني؟
المثقف طبعا وكان شاعر ثوري.
حصاوي بس دا أدي صوته في الانتخابات لمرسي العياط.
المثقف معقوله ؟ لا يمكن.بطل إشاعات.
حصاوي بس أنا شفته في قناة مصرية سألوه في الحكاية دي وقال أنها صحيحة ولما
سألوه عن السبب. قال اصلي كنت حمار!
المثقف أنا ما عنديش خبر.
حصاوي والممثل اللي رشحوه ما قبلش المنصب لأنه خاف يتفقس مش بس عشان الفيديو ده، ولا عشان المثقفين شايفينه تافه، لكن لو خد المنصب هيضطر يكتب القرارات وهو بيغلط في الإملاء.لكن أنت عمال تبص في الموبايل كل شويه
ليه؟
المثقف منتظر مكالمة مهمة.
حصاوي لكن أنت مش شايف أن كل الوزراء مفروض يكونوا مثقفين.
المثقف بس دا مش شرط.
حصاوي ولما أي وزير يكون عمره ما قرا شعر أو روايات أو تاريخ ولا بيسمع مزيكة
مزيكا مش يبقي جاهل وبس ومش ممكن أي قرار يصدره يبقي له معني؟
المثقف دي فكرة غريبة.
حصاوي ألحق الموبايل بتاعك بيرن.
المثقف طب هس لما أرد ( و ينهض ويبتعد عن حصاوي) ألو ..أيوه أنا يا فندم
صوت ( من خلال الموبايل ) حضرتك مثقف ؟
المثقف طبعا يا فندم؟
الصوت أنت متأكد ؟
المثقف أكيد يا فندم.أنا شاعر وقاري تاريخ وبسمع موسيقي كلاسيكية ومطلع علي كل تاريخ الوطن العربي وملم بكل اقتصاديات المجتمعات الأوربية.
الصوت عظيم .بس دا مش كفاية. لازم تكون بتعرف تمثل؟
المثقف طبعًا أنا أكفأ واحد أمثل مصر الغالية في كل الندوات الثقافية داخل وخارج مصر وأقدر كمان ..
الصوت ( مقاطعا ) مش التمثيل دا ، أنا بتكلم علي التمثيل الحقيقي. يعني تعرف تقول نكت تضحك الناس وتعرف تقلد إسماعيل يس والريحاني.
المثقف إذا الأمر تطلب ...لكن ممكن أعرف مين اللي بيتكلم؟
الصوت إذا كنت مثقف يبقي أكيد هتقدر تخمن مين اللي بيكلمك.
المثقف سيادة رئيس الوزراء إبراهيم محلب ؟
الصوت رئيس الوزراء ما بيعملش الاتصالات مع المرشحين بنفسه.
المثقف فهمت حضرتك سكرتير رئيس الوزراء.
الصوت لا أبدا. أنا حصاوي
( المثقف يلتفت ليجد حصاوي مقبلا عليه والموبايل علي إذنه)
حصاوي ( في الموبايل) للآسف سقطت في الاختبار بتاعي، بس ممكن في تنجح في اختبار الحكومة الجديدة.
( المثقف يغشي عليه )
لينين الرملي
608
هرش مخ
الأحد 2 مارس 14
1 الحسد
قلت إننا نحتاج مرشح رئاسي من بين الإعلاميين والممثلين والراقصات وطاهر أبو زيد الذي زادت شعبيته قوي! والظاهر أني حسدته !.
22
2 فزوره أسهل
وتردد اسم ممثل لوزارة الثقافة وقيل أنه أعتذر. إما أنه خاف ينكشف جهله أو إعادة بث مقابلاته مع صدام حسين والقذافي. رغم أن الشباب لا يشاهدون النت!.
27
3 وفزورة أصعب
مع أن مرشح للرئاسة له تسجيلات أسخم من الممثل الفكاهي مع صدام والقذافي برضه, لكن ولا همه لأنه ممثل أحسن منه!.
21
4 التمثيل المشرف
الوزراء الذين مروا علينا في السنوات الأخيرة يجعلنا نفكر بإمعان في معني الفرق بين كلمة الممثل والتمثيل الوزاري!.
16
5 الوحيد
الوحيد من رؤساء الوزارات الذي لم يمثل علينا هو الببلاوي, لأنه لا يملك روح الفكاهة ولا روح الجد!.
18
6- المنطق يقول
من غير المنطقي أن نبحث عن وزير ثقافة ليثقف الشعب ونختار وزراءنا بلا ثقافة !
15
7 الشروط
قلت لأحد الممثلين أن أغلب الوزراء لا يمتوا للثقافة. فقال إن القانون لا يشترط الثقافة في أي وزير ولا حتى وزير الثقافة وهات الدستور وأقراه تاني!
26