أولتراس إسمعلاوي يصدر بيانًا عن الاشتباكات مع الداخلية

نشرت صفحة أولتراس إسمعلاوي المعروف باسم يلو دراجونز بموقع التواصل الاجتماعي، "فيسبوك"، اليوم السبت، بيانا لها عقب الإفراج عن 8 شباب من أعضاء الجروب وخلال البيان تم سرد الواقعه كما يلي:
بعد انتهاء اجتماع أعضاء الجروب خرجوا بيغنوا ويهتفوا زي العادي بعد كل اجتماع، وفي أثناء وجودهم في شارع السلطان حسين اتحركت عربية بوكس ناحيتهم ونزل منهم ظابط برتبة ملازم تقريبًا وقالهم ما مضمونه "انتوا واقفين هنا ليه يلا اتمشوا.
وبطبنجته (اللي تقريبًا كان فرحان انهم سلموهاله)، ضرب طلقتين في الهوا كده، جدع يا باشا!
المجموعة بعدت شوية وبعد كده اتجمعوا تاني وكملنا هتافات وغنا.. واتجهنا ناحية الممر، واستمرت المسيرة، وبعد نهايتها معظم الناس اتفرقوا وروحوا.. ما عدا مجموعة فضلت موجودة بتتكلم عند الممر شوية
فجأة جت عربيتين مدرعتين من ناحية نفق شارع شبين ماشيين في الاتجاه المعاكس.. وضربوا قنابل غاز على أعضاء الجروب اللي واقفين وقبضوا على 8 أعضاء من الجروب
فيما بعد عرفنا أن الموضوع ده كان علشان مطلوب من الجروب أنه يقدم اخطار للداخلية بالوقفة بتاعت بكره.. وده الجروب رفضه لأن فكرة الإخطارات والكلام ده عديمة المعنى حاليًا!
عمومًا، الموضوع ده انتهى دلوقتي والناس طلعت.. يُشكر كل من تحرك علشان الناس دي تخرج بسرعة.
للتوضيح
المنهج اللي بتتبعه الداخلية في البلد حاليًا بصفة عامة، ومع جروبات الأولتراس بصفة خاصة هيكسبها كل يوم مشكلة جديدة !
الموضوع أبسط بكتير من اللي اتعمل عليه ده كله، ومش معنى أن الجروب حط مصلحة أعضاء الجروب والنادي قدامه في القرار اللي فات أنه يحصل تمادي بالمنظر ده.
لأن بمنتهى الوضوح، احنا اسوأ وآخر خصم الداخلية محتاجة تحط نفسها في مواجهة معاه في الفترة الحالية..
بالبلدي كده، خليكم في اللي انتوا فيه أولى!
وقفة بكرة في معادها قدام النادي.. لهدفها المحدد من قبل "طرد الداخلية من المدرجات الرياضية".