ما هو التصنيف الائتماني ؟

التصنيف الائتماني هو باختصار مقياس دوري (بيتعاد حسابه كل فترة) بيقيس درجة المخاطرة، وبشكل مبسط: هل الشخص أو الشركة أو الدولة هتقدر تسدد القروض اللي هي بتستلفها من مؤسسات مالية مانحة؟ طب نسبة قدرتها على تسديد القروض دي كبيرة ولا صغيرة؟
الفكرة هي إن فيه مؤسسات مالية متخصصة في مجال التصنيف الائتماني بتقعد 24 ساعة في ال 24 ساعة في دراسة مختلف العوامل السياسية والاقتصادية والاجتماعية لأسواق العالم عشان تطلع نتيجة نهائية عبارة عن تصنيف علشان المستثمر اللي عايز يعرف يستثمر فلوسه فين وايه العائد اللي المفروض يتوقعه على استثماراته .
واحد من الأهداف الرئيسية من تقارير التصنيف الائتماني هو إرشاد المستثمر لنسبة العائد على الأموال اللي هيستثمرها في صورة قروض. كل ما نسبة المخاطرة بتزيد (عدم القدرة على سداد الدين) كل ما بالتالي أي مستثمر هيطالب إن الفوائد تكون أكبر. لأن كل ما المخاطرة بتزيد كل ما صاحب رأس المال بيبقى عايز يكون هامش ربحه أكتر لتعويض المخاطرة اللي بياخدها .
التصنيف الائتماني بيكون إما قصير الأجل وهو بيعبر عن قدرة الدولة أو الشركة أو الأفراد على سداد القروض المستحقة خلال سنة من تاريخ صدور التصنيف، أو طويل الأجل وده بيقيس الفترات الأطول .
من المؤسسات الدولية اللي بتقيس التصنيف الائتماني :
Moody's
Standard & Poor's
Fitch
طيب يعني ايه التصنيف الائتماني لأي دولة ينخفض؟ وإيه اللي يخليه ينخفض؟
انخفاض تصنيف الدولة معناه إن المؤسسة المالية اللي بتقيم الدولة شايفة ارتفاع نسبة المخاطرة في الدولة نتيجة لظروفها الاقتصادية أو السياسية، وده معناه إن المؤسسة المالية بتنصح المستثمرين إنهم يطلبوا هامش أعلى للفوائد على القروض اللي بيمنحوها للدولة دي. أو في بعض الظروف بينصحوا مانحي القروض بعدم منح الدولة أي قروض لحين استقرار الأوضاع السياسية والاقتصادية فيها .
طيب إيه درجات التصنيف؟
التصنيف بيختلف من مؤسسة للتانية، بس على سبيل المثال هناخد مؤسسة Standard and Poors:
- أعلى درجة تصنيف في ستاندرد آند بور هي : AAA ودي معناها إن المؤسسة المالية بتقول إن مخاطر منح القرض شبه منعدمة وبالتالي الفوائد على القرض هتكون منخفضة جدا. ثم يأتي بعد ذلك : AA+ ثم AA ثم A+ ثم A ثم A-.
- المستوى الثاني يبدأ ب BBB+ ثم BBB ثم BBB- ثم BB+ ثم BB ثم BB- ثم B+ ثم B وأخيرا B-. والجدير بالذكر أن أي تصنيف تحت BBB- يكون فيه الاستثمار مرتفع المخاطر .
- المستوى الثالث : CCC+ ثم CCC ثم CCC- ثم CC ثم C. والدرجتين الأولى والثانية تعني أن درجة المخاطرة شديدة الارتفاع أما ابتداء من CCC- فتعني أن المخاطرة حتمية واحتمال قدرة المقترض على سداد الديون ضعيفة جدا .
- المستوى الرابع : D وهوي مستوى الافلاس واستحالة قدرة المقترض على سداد الديون .
طيب مصر فين دلوقتي؟
بحسب التقرير الأخير الصادر من مؤسسة Standard and Poors مصر في المستوى B- وهو مستوى مرتفع المخاطر في الاستثمار. التصنيف انخفض من درجة B لدرجة B- الشهر ده، والسبب كان بحسب تقرير المؤسسة: 1) حالة الانقسام في الشارع المصري اللي نتجت عن القرارات السياسية الأخيرة ومواقف السلطة والمعارضة، 2) عدم قدرة الحكومة على مواجهة الزيادة المستمرة في عجز الموازنة (الفرق بين المصروفات والايرادات). تبعات خفض التصنيف هو إنه بالتبعية قيمة الفوائد على القروض هترتفع وبالتالي الدولة بتحتاج فلوس أكتر لخدمة الديون اللي بتحتاجها .
هل التعافي من المستوى ده صعب؟
الإجابة هي باختصار: لو فيه سياسة اقتصادية تصحيحية وفي نفس الوقت البحث عن حلول توافقية بين السياسيين لعلاج الأزمة السياسية تحسين التصنيف مش هيكون صعب، التصنيف الائتماني بيتغير كل فترة زي ما قلنا، ولتحسين المستوى اللي فيه مصر الموضوع بيتطلب استقرار سياسي وفي نفس الوقت سياسة اقتصادية أكثر اقناعا للمستثمر والمؤسسات المانحة على إن الدولة قادرة على تحسين نسبة العجز في ميزانيتها .
رابط يحوي التصنيف الائتماني للدول من مؤسسة Standard and Poors:
http://bit.ly/W7UCFw
التقرير الكامل لمؤسسة Standard & Poors عن تخفيض التصنيف الائتماني لمصر :
http://bit.ly/TpzEVS