إبداع| "أنا نفسي أحب".. قصيدة للشاعر عبدالله وليد

أنا نفسي أحب
نفسي أعيش
قلبي يعيش
يرجع يدق
نفسي في قمر
لا شمس تنور للقمر
تعمل حياة
حيوان إنسان
نبات شجر
حتى الحجر
من لمسة
يتحول قمر
ست البنات
أنا نفسي أحب
ست البنات
في عنيها أعيش
كل اللي فات
واللي جي والذكريات
حتى اللي بكرة
راح يصير
يصبح أنا
ليها أسير
ومش مهم
تبقى بيضا ولا سمرا
مش مهم
لون عينيها
سودا عسلي
خضرا زرقا
مش مهم المهم
تبقي جنبي
جوا فرحي
وجوا حزني
مش معايا وقت فرحي
ووقت جرحي القي نفسي
ساعتها وحدي مبقتش جنبي
نفسي ف واحدة
اكون عندها انا المهم
ما هي عندي هتكون الأهم
ولا حاجه غيرها تفرق تهم
حتي المياه حتي الهوا
اللي انا بتنفسه
مش مهم
قلبي وصدري
بهواها هي اتنفسوا
اي حاجه مش مهم
كل حاجه مش مهم
حتي حياتي مش مهم
هي عندي بميت حياه
هي جرحي وهي دواه
وتكون مطر ومش مهم
تبقي ملكة في الجمال
مش مهم سحرها
يبقي شاغل كل بال
مش دا المهم المهم
أهديها كل انواع الدلال
لو هشكي انا ليل السهر
نفسي ف واحدة املا عينها
زي ما هي مالية عيني
وإن كنت عصبي
فيوم معاكي اتحمليني
اوعي مرة اقولك امشي
تروحي ماشية وتسيببني
لا امسكي ايديا
حطي عينك جوا عيني
تهدي فيا وتراعيني
ما انا نفسي احب
نفسي ف حنانك
و ب اماني هتنعمي
حطي قلبك جوا قلبي
اوعي يوم تستسلمي
و علميني معني الحياه
ولو جديد عليكي الحب
اتعلمي
مش تبعدي
مش تهربي
لا قربي
فيا المسي
وصدقيني
لو حمايتك فيها موتي
راح اموت واكون حاميكي
حد فاهم قصدي ايه
حد يعرف واحدة فيها
اللي انا بحكي عليه
لو لقيتها هلاقي روحي
فيا تاني ترجع تدب
مانا نفسي احب
نفسي اعيش
قلبي يعيش
يرجع يدق