شعبان عبدالرحيم يمتدح "السيسي" ويسخر من باسم يوسف فى أغنية جديدة

أطلق الفنان الشعبي شعبان عبدالرحيم، أغنية جديدة بعنوان "بقينا ع الحديدة" من كلمات إسلام خليل، وصف فيها الوضع السياسي والاجتماعي الصعب الذي تمر به البلد، كما امتدح الفريق أول عبد الفتاح السيسي، وانتقد الحكومة والإعلامي باسم يوسف والدكتور محمد البرادعي.
وتقول كلمات الأغنية:
بقينا ع الحديدة والناس تعبانة موت.. عايزين حكومة شديدة متخافش وليها صوت
الشعب عاوز حكومة تحميه وتقوته.. مش ناس بسلاح وشومة سايبنها تموته
في ناس قاعدين يخونوا الشعب ويقسوا عليه.. عشان حكومتنا نونو مش عارفة بتعمل إيه
يا أما قولنا على البرادعي غدار وملوش أمان.. وبيلعب لعبة جامدة لحبايبه الأمريكان
دي مشاعري ودي أحاسيسي والكل بعينه شاف.. لو كله زي السيسي احنا مكوناش نخاف
دايمًا تفكيره مبتكر والناس كلها عاشقاه.. صحيح ده راجل دكر والشعب كله وراه
في ناس ملهاش ملامح أشباح في كل عصر.. قال إيه عايزينا نسامح اللي قاله طز في مصر
يا حكومة فيكي وفيكي وماشية كده بالزق.. الرحمة الله يخليكي الناس خلاص هاطقّ
الجامعة بقت ميدان والطلبة نازلة حروب.. وهايبقى الامتحان مولوتوف وازاز وطوب
ملكومش رأي حاسم وناس ليها العجب.. ما كفاية علينا باسم وقلة الأدب
في ناس إيديها مرعوشة نايمة ومش عايزة تبص.. وناس كتير مهروشة ماسكة العصاية بالنص
وحيات حزني وجراحي ودم كل شهيد.. الشعب كله صاحي وحينزل من جديد
اسأل يالي انت ناسي مين هما المصريين.. من العدوان الثلاثي لحرب 73
يا أوباما اللعبة اتفقست والمستخبي بان.. فهّم قطر حبيبتك وعرف أردوغان