رمضان صبحي يكشف سر وقوفه على الكرة.. ويؤكد: طموحي كبير

كشف رمضان صبحى، نجم المنتخب المصرى، ولاعب ستوك سيتى الإنجليزى، كواليس رحلته الاحترافية، موضحًا: "تمرنت جيدا وعملت اللى عليا والباقى على ربنا، ولكننى أكون حزينا حينما استبعد عن اللعب، وكنت بتمرن مليون فى المية، والجهاز الفنى والنادى يقدروننى جيدًا".
وقال "صبحى" فى حواره مع الإعلامى معتز الدمرداش، ببرنامج "90 دقيقة" المذاع عبر فضائية "المحور": "طموحى ألعب.. وهما عارفين امتى هينزلونى والحمد لله قدرت أثبت أنى قد الفرصة وطموحى أكبر من كدا بكتير ولسه بدرى جدا".
وحول وقوفه على الكرة، قال: "مجربتهاش فى انجلترا ومفيهاش أى حاجة خالص، بس المباريات مشدودة وتفكيرى مع الفريق بشكل جماعى وكل تركيزى فى المباراة"، مضيفًا: "الحركة دى بعملها انا وصحابى من زمان جدا لإظهار مهاراتى والناس فهموها بشكل غلط".
وعن وقوفه على الكرة فى مباراة الزمالك، قال: "لم أقصد استفزاز أحد، فأنا أحترم جمهور مصر وخاصة الزمالك والحركة لم تكن لإهانة أحد، فنادى الزمالك ولاعبوه كبار وجمهوره محترم ولم أقصد الإساءة لأحد ونفكر فى اللى جاى.. والمفروض مفيش مشكلة فى الكورة وبقولهم خدوا الصورة بشكل كويس هتلاقوا الدنيا سهلة جدا".