19 سببًا يخلوك تقعد على القهوة وتسيب الكافيه

لأن الموضة دلوقتى بقت الكافيهات والشباب بطلوا يقعدوا على القهوة أو بقوا يتكسفوا يقعدوا عليها فدول 19 حاجة مقنعة يخلوك ترجع تاني للقهوة وقعدة القهوة.
- اسمك فيها يا باشا أو يا معلم أو اسمك الحقيقي بتسمعه من القلب مش يا فندم المصطنعة اللى بتسمعها في الكافيه.
- تسافر وتغيب وترجع تلاقيها مستنياك.
- مفيش حد عامل reservation ولا ممنوع تقعد على ترابيزة.
- تجيب أكل من برة القهوة وتشرب وتحلى وتدخن ولا حد يكلمك بالعكس يقدم لك ميه ببلاش.
- بتغير الموود بأقل فلوس.
- تقعد فيها لوحدك أو لو معاك حد من غير تناحة وبص من الwaiters.
- القهوجى بيحفظ بدل الطلب 10 طلبات ويبلغه على الناصبة والطلب يوصلك زي الفل
- القهوجي عمره ما يغلط فى الحساب ولا يقولك سوري يا فندم في غلط فى الcheck.
- تحتويك لو عندك هموم الدنيا.
- محدش من أصحابك يعترض عليها، لأن الحب مش بالفلوس.
- تتخن ولا تخس، تغتني أو تفتقر، هي زي ما هى ثابتة وصامدة فى وش التغيرات الزمنية.
- جنبها مطعم أو محل تاكل منه وتتغدى.
- مبتنامش بدري ولا فيها last_order يا فندم الساعة 11 ونص.
- فى ناس تطلب على النوتة ولا فيه minimum charge.
- بتاع الشيشة ابتسامته للجميع رغم أنه مش عايز بقشيش مش يتنح وقت الحساب.
- مفيهاش تفرقة عنصرية كله جنب بعضه الغنى جنب الفقير، المحامي والدكتور والمهندس والباشا والأفندي.
- قاعد مش متكتف واخد راحتك وملك زمانك، تطلب كرسي زيادة يجيلك كرسيين من تحت الأرض.
- فيها دوشة الطاولة وصوت الناس وخبط المعالق على الكوبيات بس كله فى تناغم غريب مش مزعج.
- مشاكل الدنيا تتحل على القهوة وقعدات عرب وتصالح.
القهوة هي عالم تاني خالص لا تستطيع البنات معرفته ولا يمكن شرحه لها.. ودايمًا البقاء للقهوة.