علقة ساخنة للعطاط بسبب مرسى العياط !

أعرفكم بنفسى.. أقسم بالله العظيم أننى لا أمت بأى صلة قرابة أو نسب أو صداقة أو أعرفه إلا من تسع شهور بس زى بقية الشعب المصدوم.. فالمدعو محمد مرسى العياط هو آخر اسمه العياط.. أما أنا فاسمى "العطاط" نسبة إلى العط الذى اتميز به عن غيرى.. وسبب القسم موقف لا يمكن أن أنساه مدى حياتى إذا لم أمت بالضغط أو بالسكر أو الرعاش مما يفعله الإخوان فينا حسبى الله ونعم الوكيل.

من غير فزلكة ولا كلام كتير اللى حصل إنى كنت فى يوم كعادتى "بعط " فى حارة شعبية وتعبت من كتر "العط" قلت اريح شوية قعدت على "غرزه" يعنى حاجة كده زى القهوة بس فى مكان شعبى قحط ..المهم قعدت على كرسى "ليف" حاجة فخمة قوى وطلبت شاى المشروب المفضل بتاعى ..القهوجى لابس حتة جلابية وجاب معاه كوز ميه مخروم وقال: لا مؤاخذة الأخ جديد علينا
-ابتسمت وقلت: أخوك العطاط
القهوجى ضحك ضحكة حلوة قوى وقال فى صوت زى الرعد ابن العياط اهو واللى على الغرزه كلهم هلوا على وهات يا ضرب مفيش واحد شتم كله ضرب
العطاط: يا جماعة إيه اللى حصل طب أنا عملت إيه الحساب معاى
القهوجى: حساب لا يا خويا الحساب علينا وهات يا ضرب
العطاط صارخا: حرام عليكم أنا أعزل من السلاح والكترة غلبت الشجاعة أبدا طيب خدو راحة وفهمونى إيه الحكاية وبعدين اضربوا زى ما انتم عايزين
واحد محترم: نسمع يا جماعة ونفهم وبعدين نضربه تانى هو هايروح فين
توقف الضرب
العطاط: مفيش فى جسمى كله حتة سليمة قعدت على الأرض
القهوجى: هى دى عزبة أبوكم إيه مش شايفين حد غيركم فى البلد
العطاط: أيوه احنا مين؟
القهوجى: انت مش قريب محمد مرسى العياط
العطاط: بعد تنهيدة الله يسامحك أنا العطاط
القهوجى : وبتقولها تانى هجوم
العطاط يصرخ: يا ناس أنا العطاط مش العياط يعنى بعط كتير لا مؤاخذه يعنى فى الشوارع الحوارى فى كل مكان بعط
الضاربين : اه اه يعنى مش قريب ال....العياط
العطاط : أقسم بالله أبدا لا من قريب ولا من بعيد
القهوجى : معلهش يا عم العطاط سامحنى الضرب كان تقيل عليك والنعمة لو مسكنا العياط لاناكله باسنانا اه اه لو اطوله
العطاط: اه يا جنبى اه يا رجلى اه يا جسمى كله
-وسط آهات العطاط صوت من بعيد ينادى يا عطاط
العطاط : عايز إيه انت التانى _ ويقرب منه العطاط _ مين .. ثم يضع يده على بقه ويشير عليه ..مش العريان ..أوعى تقول اسمك العريان
العريان : دى منطقتى كلهم عارفنى أنا ابن الحتة إيه اللى حصل معاك وليه الضرب ده كله أنت سرقت منهم حاجة؟
العطاط : ده انا اخدت حتة علقة ما أخدهاش حرامى جزم فى جامع كبير القهوجى سمع العطاط وعينى ما شفتش حاجة تانى
العريان : هما افتكروك قريب مرسى والقهوجى سمع غلط فاكرك بتقول العياط
عشان كده انا روحت النهارده السجل المدنى وغيرت اسمى لابوالقمصان يعنى من النهاردة تنسى العريان خالص ماتروح السجل وتغير اسمك لحد ما يرحل جار السوء
العطاط: والله ما أتنازل عن اسمى أبدا ده على اسم الغالى جدى الله يرحمه بس ممكن بعد علقه محترمة زى دى أغير اسم العيلة كلها
أبوالقمصان العريان سابقا: هتعط فين النهاردة
العطاط : هو انا فى حيل اعط ولا اتحرك خطوة من مكانى الله يجازى اللى كان السبب
أبوالقمصان : اسمع فيه حتة عطة النهاردة بصراحة من غيرك ولا ليها لازمة
العطاط : ابوس على ايدك ..العلقة دى هتقعدنى فى البيت سنة يافرحة مراتى فى.
وهم بالمشى وهو يتوجع
أبوالقمصان بصوت عالى: اوعى تقول العطاط تانى وعيال الحارة سمعوا كلمة العطاط وبالطوب وهات يا ضرب والعطاط يجرى انا العطاط .مش العياط .أنا العطاط .مش العياط .أنا العطاط .