حاجات لازم تعمليها في أول مقابلة مع حد متقدملك

- مش لازم تخفى ملامح وشك بالفول ميك آب.. عادي خليكي طبيعية..
لأنه هيشوفك كتير لو فى نصيب وهيقفشك فى يوم من الأيام.. خليه يتعرف على ملامحك.
- بلاش بهرجة فى اللبس.. انتى مش رايحة فرح أختك.. انتي في نادي يا حبيبتي ملوش لازمة السوارية خالص.. ولا الموضوع بيستدعي جليتر وترتر وخلاخيل.. البسي لبسك العادي.
- ملهوش أى داعي من أول لحظة تحكيله أن 500 واحد اتقدملك، ايشى مهندس وطيار ودكتور جراحة ورائد فضاء وأستاذ جامعي مهاجر لأمريكا ورغم ده كله انتى رفضتيهم كلهم.. عشان يبان إنك جامدة أوي.. بتبقي مفقوسة أوى إنك أوفر ومش هيصدقك فى بقية الكلام اللي هتقوليه طول القعدة.
- بلاش سهوكة.. خليكي عادى برضو.. مش لازم تقولى «مش تزعل منى.. مش تبطل تكلمنى.. مش زحلانة.. مش قمصانة» الشباب ملهومش خلق للجو ده.
- بلاش كدب من نوع:
إحنا فى الويك إند بنروح عزبة بابى وبنركب خيل ومش بيغمضلي جفن إلا لما بقعد على البيسين لحد ما أروح فى النوم والدادا بتيجي تطلعني أوضتي.
وفي الصيف بركب الجيت سكى بتاعنا فى الفيلا بتاعة دادى فى سيدى عبدالرحمن كل أربع وخميس.. ياريت بلاش عشان بتتهرشي بسرعة أوي..
وهو لو جه وخطبك من شقتكوا اللى أوضة وصالة ولقى كل ده سراب مش هتشوفى وشه تانى.
- بلاش تبربشي 500 مرة عشان يبان إنك طيبة وغلبانة.. وعشان الرموش المتلزقة ما توقعش.. خليكى واعية.
- ملوش لازمة تقوليله أنا طيبة وغلبانة وعسولة ومسمسمة وربة بيت هايلة وبحب الاستقرار الأسرى.. هو هيكتشف ده بنفسه.. بس إديله مساحته.
- بلاش تقعدي تتكلمي عن نفسك طول القعدة وما تديش فرصة للراجل إنه يتكلم أو يعلق حتى على جملة قولتيها.. الأيام جاية كتير وهتاكلي دماغه براحتك بس براحة عليه فى الأول.
- لو قالك اختاري مكان نتقابل فيه.. مش لازم تختاري مكان المينى مم فيه 200 جنيه، دى مش بتدل إنك بنت ناس يعني.. خصوصًا لو كان مكان أول مرة تروحيه.. هيبان إنك تايه ولا عارفة حاجة.. اختاري نادي أو كافيه عادي.. كوستا مش بيئة على فكرة.
- مش من أولها طلبات.. وعايزة وهاتلي.
لو قالك أطلبلك إيه؟ كفاية عصير وقوليها ممكن جوووس، بتبقي حلوة..
مش لازم تاكلى نجرسكو وفاهيتا وسيزر سالاد من أول طلعة.. اهدي شوية.. ممكن يحس إنك ما صدقتي.
- مش لازم كل كلامك على «منة وعلا وهالة وإيمان...» هو مش جاى عشان يسمع آخر أخبارهم وهو ما يعرفهمش أصلا ولا فارق معاه يعرف إن علا صبغت شعرها ولا إن هالة بتعزف أورج.. خليكى فى نفسك.
- بلاش تسأليه أسئلة مستفزة من أولها زى هو انت عصبي؟؟ انت بتضرب اللى هتتجوزها؟؟ انت مبذر؟؟؟ ما تصدريلوش العيوب فى وشه...خليكى فى الإيجابيات أول مرة معلش.. تعالى على نفسك.
- لو سألك كنتى مرتبطة والا لأ.. قوليله إنك كنتي مخطوبة بس مش لازم تدخليه في تفاصيل هتضرك أكتر ما هتنفعك.. قوليلي السبب بالمختصر لو حبيتي من غير لت وعجن.. بلاش تقوليلو آه كنت ماشية مع محمد ومصاحبة عمرو شهرين وفركشت مع عبدالرحمن بعد ما كنا بنحب بعض من أيام ابتدائى وسيرتنا كانت على كل لسان.
- لو ما استريحتيش للشخص بلاش تلبسى وش الكلب.. حرام ده بشر برضو.. بلاش نفخ أو بص فى الساعة كل ثانيتين.. هي كلها ساعة استحمليها بالطول ولا بالعرض.
مش لازم بقك يتعوج وتقوليله ماما كلمتنى وعايزاني أروح دلوقتي عشان أنضف معاها الشقة.. مش منطقي أصله.
- ونصيحة أخيرة ما تتدلقيش عليه.. لو عجبك هدى أعصابك بلاش ضحك أوفر أو تسبيل أوفر وما تقوليلوش هااااا هشوفك تاني إمتى.. اتقلي كده وخليها تيجي منه.
ونزغرطلكوا قريب إن شاء الله.