رسالة من "كلابيظ" إله الدايت!

- لو شفتك ماسكة بيبسى دايت وانتى بتضربى سندويتش حلاوة هزعلك.
- اسمه يوم ال free مش شهر ال free.. لمى نفسك.
- مافيش حاجة اسمها نوتيلا دايت وكلنا عارفين كده.. شكلك بتحبى تسمعى لمى نفسك كتير.
- ماك وهارديز وكنتاكى وأى أكل من برة بيتخن.. وانتى عارفة بس عاملة عبيطة.
- مافيش هيلثى فووود فيه بيتزا هت.. لمى الدور.
- حتة الجاتوه اللى كلتيها دى فيها 7000 سعر حراري.. مش 10 هااااه.. بالنسبة لجردل الشوكلاتة اللى كان عليها والكريم شانتيه.. ماحسيتيش ناحيتهم بأى ذنب.. عادى كده.
- ماحدش بيخس وهو قاعد على الكنبة 24 ساعة ومكسل يقوم يجيب الريموت.. اتحركى شوية.. اتمشى.. انتي في العشرينات ومش قادرة تروحى للمطبخ.
- مش كل ربع ساعة تطلعى على الميزان.. كل اللى حواليكى نفسهم يكسروه على دماغك.. مش كده.
- كلى كل حاجة وماتحرميش نفسك آه بس ليه بتنسى حتة «تظبيط الكميات».. ما انتى لو كلتى كل اللى نفسك فيه وسيباها على البحرى هتبقى قد الكرنبة مش هتخسى.. اتفاجئتى صح!!
- مش كل ما تشوفى وش حد تقوليله هااااااا قوللى إنى خسيت.. ما انتى لو خسيتى هنقولك أقسم بالله وهنفرحلك بس انتى لسه سألانى السؤال ده من 10 دقايق أظن إن 10 دقايق مش وقت كافى لحرق الدهون وشد الترهلات.
- الدوا اللى اتقالك عليه من طنط أم ميمى إنه هيخسسك 20 كيلو كل 3 أيام ده بمبة كبيرة وانتى متعلمة وواعية.. فكك من طنط أم ميمى خالص.
- مش لازم تخسى عشان اللى حواليكى بيخسوا وممرمطين نفسهم فى الريجيم وال low fat وال zero calories.
لو انتى حلوة كده خليكى كده.. ما تقلديش وخلاص.
- مش عشان تثبتلنا انك خسيتى تجيبى مقاس أصغر من مقاسك.. باين جداً إنه صغير عليكى.. مستعجلة ليه.
- تفاحة ومياه كتير وآيس كريم دونت مكس.
- هتقولولى هو فى إله دايت اسمه كلابيظ.. هقولك ده عندنا إحنا بس.. لأن غالبا اللى بيخسله شويه بيرجعهم بسرعة الصاروخ وبيكلبظ اكتر اسم الله عليه.. فى ناس بتربرب وصحتها بتيجى على الدايت..
يدخلوه 75 يطلعوا منه 90.. الدايت ملوش أمان يا بشر..
ساعات بيكون قلته أحسن أقسم بالله.
-قولي_خسيتي_بصوت_عالي_بقي