لمجرد أنك تخينة!

فى مجتمعنا لازم تعرفى شوية حاجات عنكِ فى مجمتعنا اللطيف اللى عايشين فيه ده:
1-لازم نفهم إن «مليانة» مش شتيمة، مليان زى طويل، زى قصير، زى رفيع مش معنى موازى للشتايم.
2-وهى صغيرة كل صحابها هيعاملوها على أنها أقوى واحدة، ولو زقت حد هيموت!
3- هتحاول تلعب رياضة، بس هتكتشف إن الشيبسى والشيكولاته بيفرحوا أكتر من تعليمات الكابتن.
4- فى المدرسة غالبا كانت بتتكسف تاخد ساندويتشات، وغالبا مكانتش بتشارك فى حفلات نهاية السنة.
5- البنت المليانة حساسة جدا لأى تعليق أكتر من اى بنت فى سن المراهقة.
6-دايما الناس بتفتكرها أكبر من سنها، وبيتقال لها يا مدام!
7-بتبدأ تتلقى نصايح متجيش على بال حد أبدا زى مثلا.. إنها تعمل ريجيم!
8-أول ما بتبدأ تعمل ريجيم فجأة أصحابها كلهم بيقبلوا على الأكل بشكل مخيف!
9- فى عز معاناتها مع الرجيم هتلاقى شخص لذيذ جدا بيقولها ما تفكرى فى عملية زى الشفط ولا التدبيس ولا أى حاجة.. الرجيم مش هيجيب نتيجة.. الناس دى عايزة رصاصة بين حواجبها.
10-وهى ماشية فى الشارع هتسمع تعليقات من نوعية «يا عِجلة».. «إيه ده كله!».. «يا بت يا تخينة»! على اعتبار إن تخينة شتيمة.
11-الطنطات هتبدأ تنصح.. مفكرتيش تخسى شوية يا حبيبتى إنتِ صغيرة.. حرام!.. وشك حلو خسارة!
12-هتلاقى ناس بيقولوا.. هى حلوة بس مليانة!
13-لما هتدخل محل هدوم هتلاقى البياعة بتبصلها بيأس وأى حاجة هتختارها هتقولها لأ مفيش منها مقاسك.
14-لما هتدخل محل لا مؤاخذة جزم هتلاقى البياع بيقولها لأ مفيش مقاسك.. بردو! طب على فكرة مقاس رجلى بيتناسب مع طولى مش عرضي!
15-لو مليانة وطويلة بقيتى «أتوبيس» أما لو مليانة وقصيرة بقيتى «كورة» فى عرف المجتمع.
16-لو فشلت أى قصة حب هتلوم نفسها إن أكيد سابها عشان مليانة!
17-على غير المعتقد.. البنت المليانة بتحسب كل حاجة بتاكلها فيها كام سعر حرارى وهتخنها كام كيلو!
18-هتلاقى ناس لطيفة كده ينصحوها بدكاترة دايت متجربين، أو أماكن بتبيع هدوم xxxxxL عشان لو مش عارفة تعمل دايت.
19-أى دكتور هتروحله هيقولها لازم تخسى شوية، حتى لو بتشتكى من اللوز!
20-أسوأ مكان فى الجحيم محجوز للى بيتريق على بنت عشان تخس وفاكر إنه كدة بيشجعها.
21-موضوع إن المليانة طيبة ودمها خفيف مبيهونش الواقع على فكرة، بالعكس بيحسس البنت إنها معاقة وبيحاولوا يحببوها فى الإعاقة!
22-طنط وبنتها هيقنعوكى إن الرجالة مبتحبش البنت المليانة، رجالة اليومين دول عايز واحدة يعلقها فى دراعه! أنا مش ميدالية للأسف!
23-الدكاترة ولاد الحلال هيقعدوا يرصولك أضرار السمنة وأنها بتجيب السكر والعقم والسرطان وحبس البول والاكتئاب والتهاب المفاصل.. اضربونا بالنار أحسن.
24-لو حبيتى تفتخرى بأى موديل overweight وتحطى صورتها وتتكلمى عن ثقتها فى نفسها هتلاقى ولاد الحلال اللى بيعلقوا ويقولوا «إيه النص نقل دي؟» «بكبوظة».. إلخ.