المزة ما تعملش كده (حلقة 11)

ماشية اتمختر فى وسط المحلات وكل الألوانات الجديدة عاجبانى إشى فسفورى وإشى أحمر وإشى أخضر والصيف دخل بقى وهتبقى هيصة ..دخلت محل اقيسلى بلوزتين لقيت واحدة واقفة والدمعة هتفر من عينها.
سالتها مالك ..قالت : سيبينى فى حالى ولا جاية انتى كمان تاخدى دورك فى التريقة
قلت : يا حبيبة قلبى انا ولا هتريق عليكى ولا حاجة بس انتى شكلك حد مديكى دش رخامة مش تتبسطى كدة ده احنا بنعمل شوبنج يعنى
قالت : جوزى بيقولى انى تخينة وكل ما اقيس حاجة تطلع صغيرة علياا كانى باقيس مقاس اطفال وكل اللى شغالين فى المحل والزباين بقالهم ساعتين بيتفرجوا عليا وانا مش لاقية ولا حتى شراب مقاسي
قلت : يا عينى .. وانتى ايه اللى يخليكى تعدى كل ده تقيسى وتحسسى نفسك بالاحباط .وتفرجى عليكى الناس واللى شغالين فى المحل
قالت : انا دخلت اسالهم فيه حاجة مقاسى ..قالوا لا .. ففضلت ادور لوحدى لحد اما رجلى ورمت من الوقفة واللف
قلت : مهما كنتى حاسة انك تخينة او هما شايفين كده ما كانش المفروض تديهم فرصة يتريقوا عليكى .. المُزه ما تعملش كده
انا اقولك المزه تعمل ايه
زمان لما كنت مليانة شوية من الخلفة واللى بيخلفوها رحت اشترى لبس وافتكرونى حامل عشان عندى كرش مع انى ما كنتش حامل ولما بنت فى المحل بتقولى ..مش هتلاقى حاجة مقاسك يا مدام
قلتلها مقاسى ..اكبر من مقاسك بنمرتين اصل انا بنت عز واكل وز ثم ان مقاسى ده مقاس عالمى .. شفتى ملكة هولندا ؟! البنت تنحت
رحت ملاحقاها وقلت لها ..شفتى ملكة جمال بلاد الوراور ؟!! قالت لا .. قلت لها انا بقى وصيفة ملكة جمال الوراور و ده الوزن البطابيطى المطلوب .. وخليكى فريش يا مزة احنا فى شوبنج والشوبنج يحب الخفية !!