شاهيناز: «مبحبش أظهر حياتي الخاصة على السوشيال.. والفنان مش إنسان عادي»

أكدت الفنانة شاهيناز أنها تفضل الابتعاد عن مشاركة حياتها الخاصة عبر وسائل التواصل الاجتماعي، موضحة أن هذا القرار جاء بعد تجربة طويلة اكتشفت من خلالها أن الخصوصية جزء من نجاح الفنان.
وقالت شاهيناز خلال لقائها في برنامج «ااسمعني شكرًا» مع الإعلامية سيرا إبراهيم: «مبحبش أظهر حياتي الخاصة على السوشيال ميديا، وبمرور الوقت اكتشفت إن دا فدني أنا، وأحيانًا بقول يمكن في ناس العكس، والجمهور بيكون حابب يعرف الجانب الإنساني أكتر، لكني حسيت إن لا، الفنان مش إنسان عادي، كل حرف بيتقال أو تصريح أو صورة بتتحسب عليه وبتدخل في تاريخه، فمحبتش أخلط حياتي الشخصية بشغلي».
وأضافت: «أنا وأسرتي بنستحمل بعض، خصوصًا وقت الضغط في الشغل، ولو تعبت بيقفوا جنبي جدًا. أنا أم حريصة زيادة عن اللزوم، وده بيخليني أحيانًا بخنقهم شوية لأني بحب أعرف كل كبيرة وصغيرة عنهم، لكن ده من خوفي واهتمامي بيهم».
وتحدثت شاهيناز أيضًا عن الوعكة الصحية التي مرت بها مؤخرًا، والتي تسببت في فقدانها الوزن بشكل ملحوظ، قائلة: «خسيت بسبب جهازي الهضمي، كان عندي مشاكل خلتني مقدرش آكل طبيعي زي الأول، ولفيت على دكاترة كتير، وكلهم قالولي الحل إن لازم أغير نظام الأكل، وفضلت 7 شهور أكشف وأعمل فحوصات، لحد ما اكتشفت إن في أكلات معينة لازم أمنعها تمامًا، ومكلش قبل النوم ب3 أو 4 ساعات».
واختتمت حديثها قائلة: «كنت مجبرة ألتزم، بس الحمد لله ارتحت شوية، حتى لو بلخبط ساعات لأني من الناس اللي بتحب الأكل وبتحب تتذوق كل حاجة».