لو نفسك تخسي اتبعي التعليمات؟!

أي بنت عاوزه تعمل دايت.. لازم تحط في دماغها الآتي:
1- الدايت ممكن يبدأ في أي يوم مش لازم أول الشهر أو أول الأسبوع.
2- الدايت مش بيبسي دايت بعد نص صينية مكرونة بالباشاميل.
3- مش معنى أنك بعد ماكلتي محشي وممبار وحليتي بكنافه بالنوتيلا... وضميرك أنبك وندمتي... إن ربنا هيرفع عنك السعرات الحرارية دي ..لا هتتخني.. وضميرك هيموت.
4-مفيش حاجه اسمها أكل بيخسس ... يعني البروكلي والكيوي مبيخسسوش ..هما بس سعراتهم الحرارية قليلة...فمبيتخنوش أوي ...بس لو ضربتي كيلو بروكلي وحليتي ب30 وحدة كيوي هتتخني برضه.
5- الميه في نص الأكل مبتطلعش كرش ولا حاجة ... لأنك اولردي عندك كرش... وإلا مكنتيش عملتي دايت..
6- في الجيم ... متقعديش نص ساعة على جهاز كريزي اللي بيهز جسمك كله ..ومتخيله انك بكده هتخسي ...انتي جسمك هينمل مش اكتر من الرجرجه ...او تجيبي حزام مش عارف ايه اللي بينزل منطقه الورك والارداف اللي علي قناه تايم سينما ومتخيله انوا هيخسسك وانتي نايمه بتتفرجي علي الشيف شربيني ...عاوزه تخسي يبقي تجري يا ختي
7 - البوم فري ... ممكن اللي خسيتيه في أسبوع تتخنيه واكتر في اليوم ده.
8- قبل ماتعملي دايت ...شوفي خطيبك أو جوزك أو صحبك بيحب ايه ... في رجاله بتحب الكلبظة... ودول بدأوا يبقوا كتير في مجتمعنا ...عشان بيحسبوها المتربي علي الغالي تمنه فيه.
9- لو حصل نصيب وخسيتي - ابقي قابليني يعني - .. ياريت متحطيش صورتك قبل وبعد على الفيس بوك ...عشان أصحابك المنفسنين ...هيقروا عليكي وهترجعي اسوأ من الأول ... الحاجات دي بتتنظر وخصوصا البنت التخينه لما بتخس بتبقي وايلد .
10- لو عاوزه تخسي لازم تقطعي مع أمك الفتره دي ...عشان هيبقي أكلها هو هو بس هتقولك.. أقسم بالله حاطه نقطة زيت بس مع أنها دلقت نص علبة السمنة في الحلة!!.
أو أنتي "اتمقتي" يابنتي هتروحي فين بعد كده...
إيه ده عضم وشك بان وبقى شكلك وحش!!
أو دوقي بس هي قطمة هتخنك!!!
احذري قطمة واحدة زي شمة واحدة!