قصة على شرف المهندس شريف إسماعيل رئيس الحكومة

أعلم جيدًا أن أشياء كثيرة فى الوطن تحتاج لتدخل سوبر مان وليس مجرد وزير أو رئيس حكومة، أو حتى تدخل رئيس جمهورية لينصلح حالها، قطاع الصحة فى مصر من القطاعات التى تحتاج إلي معجزة سماوية، لينصلح حالها، ليذهب الدواء لمن يستحق، ويعالج على نفقة الدولة من هو فى احتياج لهذا القرار، لا من يمتلك وساطة أو معرفة ليحصل عليه، ولا لمن يمتلك حق الرشوة ليدفعها للحصول على قرار بالعلاج على نفقة الدولة، قد تسمع يوميًا عن عشرات القصص، أبطالها من البسطاء، الذين لم يتمكنوا من الحصول على سرير داخل مستشفى حكومى، وماتوا على أعتاب مستشفيات رفضت استقبال حالتهم الحرجة، الكاتبة سلوى محسن، قامت بتعرية الحكومة والنظام، بقصة أسرة من صعيد مصر، فشلت فى الحصول على حضانة لإنقاذ رضيعها، أعلم أن القصة تتكرر كل يوم مئات المرات، ولكننى قررت أن أعيد نشرها، لعل المهندس شريف إسماعيل رئيس الحكومة، يشعر بالمواطن الذى كان يدفع رئيس الوزراء السابق المهندس إبراهيم محلب، لعدم الجلوس فى مكتبه يوميًا، فى محاولة منه لإنقاذ ما يمكن إنقاذه، أرجو أن تصل الرسالة لرئيس الحكومة أو حتى مكتب رئاسة الجمهورية، ليخرج لنا بمبادرة يعلن عنها الرئيس تفيد البسطاء، بدلًا من المبادرات المجتمعية العبثية التى لا تسمن ولا تغنى من جوع.
«فى يوم إجازة، قلت أنزل أمشى، مشيت على النيل فى اتجاه اتعودت عليه عمرى كله، الجيزة. شدنى الحنين لكليتى وللميدان عديت قريت الفاتحة فى سرى ورجعت للكورنيش، وصلت كوبرى المنيب مشى وأنا باعدى، التفت شفت ثلاثة، رجل ومراته فى سن الشيخوخة، وشابة على إيدها لفة تشبه رضيع، التلاتة شكلهم تايهين، قربت وكانت نظراتهم كلها توسل مشفوع بسؤال، قربت أكتر وسألت: بتدوروا على مكان ولا شارع معين؟ رد الرجل: يا بنتى عايزين نوصلوا مستشفى أبو الريش. نظرت للفة على دراع الأم الشابة ومنطقتش، حاضر: أوقف لكوا تاكسى؟
- هم ميروحولهاش إلا بتاكسى؟
- لا طبعا ممكن بالأوتوبيس أو الميكروباص، لكن..بصيت للفة القطن مرة تانية وقلت أنا أروح معاكم المستشفى.. دعوات ورجاء متعطليش روحك اوصفى لنا بس وإحنا نروحوا. وقفت تاكسى: أبو الريش لو سمحت؟ ركبت جنب السواق. بصيت له وبص لى وسكتنا، وسمعت سكات التلاتة اللى ورانا. وصلنا المستشفى حسيت إنى زى الغرقانة، اتمنيت السواق يفضل معانا لأنى حطيت احتمال أنهم يمشونا مجرد هاجس دايما بيكون صح للأسف، السواق شاف اللهفة والاستعطاف فى عينى، قال أنا معاكم قلت فى سرى شكله هيُعْكُم مبلغ وقدره سلمت أمرى لله... الحقيقة السواق كان ابن بلد وحِرك جدًا ولسانه حلو وهادى استغربت بعد مداولات عرفنا أن مفيش حضانة، خدت الممرضة على جنب وقلت لها ينوبك ثواب دول شكلهم غلابة قوى ومش حمل بهدلة قولى لى بالأمانة فعلا مفيش ولا حضَّانة فاضية؟ خدتنى من إيدى وأنا شاورت للسواق بإيدى التانية وقلت له تعالى نشوف، دخلنا نشوف، كمامات الأكسجين، رُضع فى حالة موت، النبض طالع بالعافية من بطون هزيلة نحيلة جدا، قلت لها وأنا تايهة:
- فعلا مفيش مكان؟يعنى مفيش حضّانة واحدة للطوارئ؟
- فيه طبعًا. شميت نفسى وقلت أفرح.
- فيه 20 حضّانة.
- يا كرم الله عايزين واحدة بس.
- دول طوارئ علشان لو جالنا تليفون من الحكومة.
- الحكومة بتعوز حضانات؟ ليه؟ هم نسوان الحكومة بيجيبوا عيال ناقصة؟ ضِحكِت بصوت عالٍ.
- وكتاب الله ما قصدت أضحكك، أنا بتكلم جد.
- دول حضانات التوصيات اللى بتبقى من وزراء أو ناس كبيرة فى البلد، لو حد منهم طالب خدمة من المستشفى. عليت صوتى:
- يا نهار أسود؟ 20 حضّانة احتياطى خدمات واللى جايين من سوهاج ميلاقوش حضّانة؟ بان عليها الحرج، واترجتنى أوطى صوتى، والسواق ابتدى يولع سيجارة من سيجارة، خد الممرضة على جنب يتفاوض معاها- ما هو أنا بعصبيتى ضيعت فرصة التفاوض.
بعد حوالى 10 دقايق كلام مسمعتش منه حرف رجعوا وجهت لى الكلام وقالت:
- شوفى ياستى إحنا لقينا لكم مستشفى تانى يقبل الرضيع اللى معاكم، بس عشان نطلع من هنا لابد ناخد أنبوبة أكسجين ودى عهدة ورهنها 150 جنيه، وأنا أجرة إيدى 200 جنيه عشان أروح معاكم أعرفكم المستشفى وأحجز لكم وأجهز الرضيع للحضّانة. بصيت للعجوزين وبنتهم الشابة، قال الجد: الأمر لله. ركبنا التاكسى طبعا أنا اتحشرت ورا مع الجدين والأم ولفة القطن على دراعها، والممرضة والأنبوبة جنب السواق. قالت: ساقية مكى يا أسطى، وصلنا ساقية مكى قصاد المترو قالت له استعدل وقفتك واركن هنا. نزلنا دخلنا عمارة 12 دور، الممرضة شكلها رجلها واخدة على المكان ومعروفة وذائعة الصيت من أول باب العمارة لغاية باب الحجز. الليلة 1200 جنيه، والرضيع (عمره 6 أيام) محتاج 35 يوم عشان يبتدى يعيش، يعنى الحسبة 42000 جنيه طبعا ده بخلاف الأكل والشرب والمواصلات والإكراميات والذى منه - المستشفى دى تبقى ملك مدير مستشفى أبو الريش، أيون ملك مدير مستشفى أبو الريش اللى حاجز 20 حضّانة للحكومة، رجليا لفت حوالين بعضها، بصينا كلنا لبعض ومن غير كلام خرجنا من المستشفى، لا أنا سألت ولا السواق سأل ولا حد نطق، فجأة انفجرت 10 عيون، والله العظيم بكينا بقهر، قعدنا على الرصيف، خدت الأم فى حضنى، ومديت إيدى أطبطب على الجد والجدة، والسواق أخيرا نطق:
- إيه رأيك يابا الحج؟ من غير ميرفع عينه المليانة دمع زى الحجر.
- يموت يا بنى يموت.. جريت بسرعة أبعد من المكان، قلت للسواق أنا راجعة هدور على مكنة صرف قريبة متمشيش، استنانى.
رجعت وقلت نوصلكم لمحطة القطر، طلع الجد محفظته يدى فلوس للسواق اللى حلف ميلزمه مليم، بدى أنا السواق فلوس إكراما للتلاتة حلف برضه وقال جملة متتقالش غير فى عزا الشهداء والأطفال: قهوته متتشربش يامدام. وصلناهم القطر.... وصلناهم القطر. وصلنى السواق لبيتى وكان الحوار بينى وبينه كلام مقطع غرقان حزن - بيشتغل فى دولة فى الخليج ونزل من 9 شهور بس- بدى له فلوس حلف ما ياخد، ساب لى تليفونه وقال:
- بكره أنا طالع على السفارة أملا أبليكيشن عودة، لو عُزتى حاجة لكى أو لولادك تليفونى معاكى، أقدر أساعدكم.
وكان البُكا نَجدَة.
42000جنيه و20 حضّانة محجوزة خدمة للحكومة؟.