أزمة دبلوماسية بين مصر والإمارات وإنجلترا بسبب "قطة"

القطة الصغيرة اللى في الصورة دى مصرية عندها شهر ونصف تقريبًا، من أقل من أسبوع فات اتسللت كده زى أي قطة مشردة أصيلة، لمطار القاهرة، في منطقة الشحن.. شوية بشوية دخلت جوه طائرة الخطوط الجوية الإماراتية اللى رايحة برمنجهام، في إنجلترا، من القاهرة.
إتحركت الطيارة والقطة جواها من القاهرة.. طول الرحلة 3000 ميل تقريبًا.. وصلت الطيارة لإنجلترا، وعمال المطار لقوها وسط الشنط، سلموها للأمن هناك.. أمن المطار حولها للطب البيطرى في برمنجهام، عشان يكشفوا عليها.. هيحطوها تحت الملاحظة الطبية لمدة 14 يوم عشان يتأكدوا إنها خالية من الأمراض.
الجميل إن الإمارات عرضت إنها تتحمل تكلفة الكشف الطبى على القطة، على أساس إنها إتلاقت في طيارة إماراتية.. الجميل أكتر إن الناس ف برمنجهام سموا القطة ( كايرو ).. الجميل أكتر وأكتر إن بعد انتهاء وضع ( كايرو ) تحت الملاحظة الطبية ال 14 يوم هيتم عرضها للتبنى من أي أسرة إنجليزية وفعلًا إتعمل إيميل ل كده من دلوقتى وبدءوا يستقبلوا عليه الطلبات.