لحد امتى هيفضل "مطلوب آنسة للعمل"

باعتذر لكل بنت افتكرته إعلان ولكل شاب ضايقه العنوان ده، وافتكر بسببه الإحباط اللى كان بيجيله وهو بيلف طول النهار والليل علشان يلاقى شغلانة.. هى يافطة أكيد قابلتك على باب أى محل استبشرت فيه خير، كانت اليافطة دايما محطوطة وكأنها بتقولك «ممنوع الاقتراب أو التصوير»، وإن مالكش لقمة عيش فى بلد لسه فيها بنات!
ليه؟ ليه مطلوب آنسة مش شاب طول بعرض! ليه فى مكتبة أو محل ملابس أو حتى أحذية مطلوب آنسة؟! ليه فى سوبر ماركت أو ورشة خشب أو مكتب اتصالات مطلوب آنسة؟! ليه فى أى وظيفة طالبين فيها حد يتعامل مع الناس مباشرة عايزين آنسة، حتى لو كانت هتقعد على كاشير فرن أفرنجى! علشان كده قررنا ننزل نعرف السر من الشباب والبنات نفسهم!
إسلام خيرى (23 سنة) بيقول: أنا عمرى ما هلوم صاحب الوظيفة اللى طالب آنسة للعمل، لا بالعكس الراجل ده «تاجر شاطر -وإن كانت شطارة رخيصة أوى- عارف الكارت الكسبان فى مجتمع بيحركه كل ما هو مؤنث! وهو مش مطلوب منه يبيع بقرشين لما يقدر يبيع بعشرة، علشان يشجع الشباب ويقف جنبهم ويرحمهم من قاعدة الحكومة!
نادر وحيد "19 سنة" بيقول أنا مش متخصص علشان أحلل الموضوع ده اقتصاديا، وإن كنت متأكد إن فى كتير هيقولولى إن الميل للجنس الآخر غريزة ربنا خلقها فينا، بس ده علشان التكاثر، التكااااااااثر يا عالم مش الشغل والبيع والشراء، ارحمووونا.
عمر الدبيس "25 سنة" قال: أكيد الراجل صاحب المكتبة ومحل والأحذية مش طالب آنسة علشان يشجع عمل المرأة أو طالبها عشان يأكد أن الكفاءة حكر على المرأة بس! وأكيد مش كلهم طالبين آنسة للعمل علشان يعاكسوها طول النهار والليل ويصطبحوا ويتمسوا بوشها النضيف!
بس أنا خلاص سامحت من زمان ونسيت الذكريات الأليمة اللى سببتها ليا العبارة دى، إلا أنها لسه بتستفزنى وبتخلى الدم يجرى فى عروقى، علشان كل مرة باشوفها ألاقيها بتصرخ فيا وتقولى «إنت كزبون هتجيلى لما أجيبلك بنت أحطهالك فى المحل علشان إنت راجل لا مؤاخذة»!
محمد الحصرى "28 سنة" بيقول: أنا باستجدع جدا البنت اللى بتنزل تشتغل، وأهلها متفهمين ده حتى لو هى مش محتاجة للشغل، أصلها ماتعلمتش كل السنين دى علشان تقعد فى بيتها تطبخ وتتفرج على المسلسل وتحط ميك آب، وتتكلم فى التليفون لحد ما تتخنق من القاعدة ويجيلها ابن الحلال لحد عندها ويكون شاري! بس مش على حسابنا يا بنت حواا المفروض يكون فى تكافؤ فى الموضوع ده بين البنات والولاد.
على مندور "23 سنة" شايف إن هو ده بقى اللى بيزود نسب العنوسة فى البلد لما هما شغالين وشاغلين معظم المناصب، وإحنا مش شغالين ومطلوب مننا إننا نحوش ونجيب شقة ومهر وشبكة.. إلخ علشان نروح نتقدم وساعتها هتترفض، لأنها شغالة بمرتب أعلى منك ومش محتاجة لسيادتك في حاجة!.