لحظة يا كابتن!

لحظة يا كابتن معلش عندي كلمة بسيطة ليك! ايوة انت ياللي فاكر اني مفيش بنت تقدر على سحر عنيك! لا أنا مش بعاكس أنا بس عايزة أقلك كلمة.. يعني شايفاك مش عاتق دي ولا دي. وواخد الدنيا براح أوي ومش هامك ولا في بالك ربنا!
لا متفتكرش اني داعية دينية ولا حاجة! بالعكس أنا واحدة عادية جدا! بس من واجبي أنصحك نصيحة لوجه ربنا. أي بنت ضحكت عليها ولا بتفكر حتى انك تضحك عليها دي أذية وشوف يا معلم بقى ربنا اما يردلك الاذية دي تاني ليك.
أحسبها معايا كده , ضحكت على مريم ونهى وليلى ولسه معاك رشا وشغال عليها وفي بعدها منمر على ندى! ياه ده انت حسابك فل اوي! وبما اني مقدرش افتي طبعا فمقدرش اقلك ربنا هيحاسبك ازاي! لان ده شيء في علم ربنا وحده وبس.
لكن ربنا قال كما تدين تدان, وانت ديونك كترت اوي فحبيت يا كابتن أنصحك! ده غير لسانك اللي عاوز القطع! ايه زعلت؟ لا متزعلش يا كابتن , بس انت فعلا لسانك عاوز القطع ! ايوة بكررها تاني! مش عيب ولا حرام اما اقلك لسانك عاوز القطع. عشان كل بنت بتأمن ليك وتطلع اسرارها لبرة يبقى لسانك يستاهل القطع! لما تخليها تفضفضلك بكل حاجة وتفتكر انك راجل وبعدها تلاقي أسرارها بتوصلها بالمجان من ناس تانية! يبقى تستاهل ولامؤاخذة لانك مكنتش قد لقب الرجولة اللي بتحمله ده لو لسه معاك ومضعش!
أنا حبيت يا كابتن أنصحك وانت حر! اضحك على دي واتكلم على دي وافضح دي ومتنساش تعند وتزود في العيار لان ده كله في مصلحة اي بنت انت خدعتها , او اتكلمت عنها او حتى فضحتها. لان يا معلم ربنا يمهل ولا يهمل..