رسالة من ثائر لمبارك: إحنا إللى بعتنا الشيكولاتة

إلهامي عزيز: عزيزي الرئيس المخلوع محمد حسني مبارك:إن جيت للحق أنت وحشتني جدًا، أكيد اللي وحشني مش السحل في المظاهرات والجو البوليسي وكل القرف اللي كنت معيشنا فيه.. أصل بصراحة كل اللي حلوا محلك عملوا الواجب وزيادة، أنا عارف إن حوار موتك كل شوية ده فشنك.. وإن إحنا بس واحشينك وبتحاول تقرب لنا أو تفكرنا بيك.
عارف إن إحنا إللي مقصرين.. بس برضه العِشرة ماتهونش ..أصل إحنا مش ولاد تييييت، ده أنا حتى لسه سامع أنك رفضت طرد وصل لك من بريطانيا فيه شوية شيكولاتة وفرشة أسنان، علشان وصل من مجهول، أحب أطمنك إن إللي بعته أكيد واحد من الثوار ..
أي نعم كلنا بنكرهك ..وهنفضل نلعن عهدك ثانية ثانية.. بس الواحد ساعات كده نفسه بتهفه يفتكرك، مثلًا وأنت بتألش على كوارثنا.. في واحد من خطاباتك الناشفة المنشية.. أنا عارف إني طولت عليك.. بس أتمنى تطمنا عليك، موت مرة مثلًا كل شهرين واللا حاجة...خلينا نتسلي!