الفيروس المعتق

كنت فى العيد فى منزل والدى بمسقط رأسى بإحدى قرى صعيد مصر حيث قام العديد من أهالى البلدة بتقديم المعايدة لوالدى كعادتنا... وكان من بين هؤلاء بعض من مرشحى مجلس النواب المقبل... فقمت بتقديم واجب الضيافة لهم... ولكن أصبت بالإحباط عند رؤيتى لهم لكونهم من الوجوه العتيقة.
وأنا جالس معهم نشرب الشاى وكلهم ثقة فى الفوز نادانى أخى فقمت بالاستئذان منهم.. وتوجهت له فقال لى... شوفت اللى حصل فى الكمبيوتر بتاعى قلتله خير... ده وقته.
قالى كان عندى كمبيوتر إمكانياته معقولة بالنسبة لباقى الكمبيوترات اللى فى البلد بس للأسف هجمت عليه كمية فيروسات من النوع العتيق أوى...ودخلت فى كل مكان فيه لحد ما هنج منى... وكان خلاص على وشك أنه يبوظ... قلتله وبعدين.. اتفقنا أنا ومجموعة من أصحابى اللي فاهمين شويه فى التكنولوجيا وقمنا باختراع برنامج قوى جدًا ضد الفيروسات لدرجة أن بعض الناس عملوا زيه، وبالفعل كانت نتائجه مذهلة... طرد كل الفيروسات من الجهاز تماما قلتله طيب وبعدين حصل إيه ؟ وبعدها فرحنا شوية لكن يا فرحة ماتمت ؟
اتفاجئنا أنا وأصحابى بعد ما الكمبيوتر رجعلنا زى الأول وعمت الفرحة وجوهنا جميعًا أن مجموعه من الهاكرز دخلوا على كل البرامج الموجودة فى الكمبيوتر وسرقوها دون علمنا، ورجع الكمبيوتر على حالته الأولى.. مش كده وبس.. لا ده زرعوا مجموعة فيروسات بتنخر فى الجهاز من الداخل لحد ما كان خلاص على وشك الانتهاء بس الحمد لله مكنتش معتقة للدرجة.. لأنها لو معتقة كان الكمبيوتر هيولع بكل ما فيه.. قلتله بصراحة حاجة عجيبة كلامك ده !!! بس أنا يا أخى ما سكتش رحت لراجل متعلم ومتنور وشرحتله الموضوع وفهمه كويس وصعبنا عليه... وطمنى وقالى متخافوش.. وفعلًا جاب شوية برامج قوية جدًا.. قضت على كل الفيروسات الجديدة فى الجهاز وكمان بلغ عن الهاكرز واتحقق معاهم واتسجنوا كمان.
قلتله طيب الكلام كده كويس أمال إيه المشكلة؟.. قالى يا أخى المشكلة فى الفيروسات العتيقة.. قلتله العتيقة يا ابنى ما دى خلصنا منها فى الأول !!!
.. قالى لا يا أخى.. المشكلة أن البيه إلا واقف معانا طول الوقت بدماغه العالية علشان الكمبيوتر يرجع زى ما كان... معملش تحديث للبرنامج.. فقامت الفيروسات العتيقة القديمة بالهجوم على الكمبيوتر بكل قوة والله يا أخى أنا خايف على الكمبيوتر والراجل اللى متنور ده طيب أوى وحاسس إن مش هيقدر على الفيروسات المعتقة دى والكمبيوتر هيبوظ تانى.. قلتله متخفش دى كائنات ضعيفة أوى..لا تمتلك حاجة بالنسبة للبيه المتنور بتاعك.. بس أنا خايف يا أخى من أن الكائنات دى لما تتلم مع بعض ترجع لأصلها وتقوى وتاكل الكمبيوتر من جوه تاني أصل دي فيروسات عتيقة وعندها خبرة كبيرة أوى فى النخر.... قلتله حمى الله الكمبيوتر من كل فيروس سواء معتق أو جديد أو هاكر وطول ما احنا بنفكر وبنحدث من نفسنا وبرامجنا محدش هيضحك علينا تاني ويبوظ حاجتنا.