كتب المطرب أحمد سبايدر ومذيع قناة الفراعين والمشهور بهجومه على الثورة والثوار تدوينة على صفحته على فيسبوك حول سعادته بعد عودته من عزا والدة اللواء الرويني أشار فيها إلى أنه ذهب للعزاء في سيارة اللواء حمدي بدين قائد الشرطة العسكرية وانه قدمه للمتواجدين في العزاء على أنه ابنه بينما قام اللواء الرويني باحتضانه عندما علم هويته وحكى سبايدر في تدوينته سعادته أثناء العزاء و ما حدث مع من قابلهم .. فماذا كتب في تدوينته : "لسه راجع من عزا والدة اللواء أركان حرب حسن الروينى قائد المنطقة المركزية العسكرية بجمهورية مصر العربية كان يوم رجعت منه مبسوط بدأ بأنى روحت العزا مع سيادة اللوا حمدى بدين فى عربيته عضو المجلس العسكرى وقائد الشرطة العسكرية باعتبره اب ليا ويشرفنى انه بيعتبرنى زى ابنه وكان بيقول لكل الناس فى العزا ان احمد ده ابنى لدرجة ان فى ناس صدقت فعلا انى ابنه داخل العزا اسلم اول واحد واقف فى الصف كان اللوا حسن كنت متردد اقوله انا مين او لا سلمت عليه وماقولتش انا مين ورايح اسلم على اللى واقف بعده راح شد ايدى وبص لى بنظرة بيشبه عليا وقالى انت مين قولتله انا احمد سبايدر راح واخدنى فى حضنه وان مبسوط بيا اوى وقالى اقف هنا جنبى يا احمد شوية بص لى لاقانى تعبان قالى مالك قولتله كنت فى المستشفى امبارح والدكتور قالى انى ضغطى واطى من الارهاق والاجهاد والتعب وقلة النوم وانى ماباكلش حلو( انا فعلا كنت فى المستشفى امبارح لانى اغمى عليا اول مرة يحصلى كده بس ماكنتش راضى اقول لحد الموضوع ده ) المهم قالى لا خلى بالك من نفسك وقالى خلاص ادخل وما تمشيش الا اما تقولى قبل ما ادخل اخدنى من ايد اللوا حسن الصحفى مجدى الجلاد صحفى المصرى اليوم ومذيع برنامج فى السى بى سى وقالى انا بدور عليك من زمان وقف اتكلم معايا شوية وقولتله انا بعاتبك على بعض المواقف انت عملتها وبعض الكلام انت قولته المهم قولتله انا ليه حاسس ان مافيش حد بيخاف عالبلد دى كل واحد خايف على مصلحته ومنصبه وبس ومافيش حد عاوز يقول الحقيقة للناس قولتله مثلا طرد تركيا للسفير لعبة حقيرة بيضحكوا بيها على شعبنا قالى والله كلامك صح قالى تقدر تقول الكلام ده عالهوا قولتله طبعا مابخافش من حد وقالى ايه رايك تعمل برنامج ف السى بى سى ماجاوبتوش لان فى لوا تانى اخدنى من ايده واخد رقمى واخدت رقمه دخلت لقيت فى وشى الفريق احمد شفيق سلمت عليه وهزر معايا وقالى انت صغرت كده ليه ههههه وسلم عليا الفنان حكيم شخصية جميلة جدا فضل يهزر معايا بيحكيلى على موقف حصل بينه وبين جورج اسحاق بتاع كفاية انه قابله فى مناسبة فبيقوله انا سامع انك فلول راح حكيم رد عليه وقاله انا سامع انك سلفى ههههههه لان جورج اسحاق كان مطول دقنه فى اليوم ده هههه بجد انا فعلا رايح وانا تعبان ومرهق لان الدكتور قالى حاول ماتنزلش الايام دى بس رجعت مبسوط كان موجود هناك بقى ممدوح حمزة اول مرة اشوفه ماسلمتش عليه طبعا والاستاذ احمد الشحات سبايدر مان البطل المزيف بتاع العلم كان قاعد قصادى احترمت فيه تواضعه لانه كان الوحيد اللى لابس شبشب بس ماحترمتش فيه كدبه لانه قال انه هو اللى نزل مش مصطفى كامل وكلنا عرفنا حقيقة مين البطل وكان هناك مصطفى بكرى ومحافظ القاهره والحمد لله اول مرة اشوف مدى احترام الناس كلها ليا لذلك اى حد بيشتم عالنت او بيقل ادبه مابفكرش احط كلامه فى دماغى لان الشارع هو اللى بيخلينى احكم على تعامل الناس معايا مش شوية عيال بيئة قاعده ورا شاشة بتشتم زى الفيران سورى ع الاطالة بس حبيت احكيلكم على يومى لانى عارف ان اى حد عمل لايك لصفحة باسمى يبقى مهتم يعرف اخبارى اول باول وانا بنفسى اللى بقولكم اخبارى وبحكيلكم على يوم عارف ان فى ناس كتير كانت تتمنى تشارك فيه."
