حنفي ابن الناس الكويسين

يستحق خالد حنفي وزير الأسعار النار في حكومة الطبطبة المرحلية، جايزة الأوسكار عن دور "الملسوع" في فيلم "قلب حُنين"، جانبه ماعرفش يمسك دمعته وهو يتحدث بشفقة عن السادة البهوات قضاة مصر، قائلًا: "القضاة فئة متوسطة الدخل يا جماعة".. وإيه كمان يا عم حنفي؟ وتستحق الدعم زيهم زي باقي فئات الشعب، لا يا شيخ، والنبي إيه!، هو حنفي ده من هنا؟، واضح إن جنابه من كوكب المساطيل، شِرب ميه بايتة وقوم إيه خبط التصريح المناخولي ده، يمكن جنابه يقصد فئة القضاة في بلاد القطب الشمالي الجنوبي اللي في الحتة اللي ف النص اللي ف الضل التي تتسول لوح البسكويت وشربة البيبسي، ويمكن كان بيحلم واداها هذا الكلام اللى مش تمام، عم حنفي راجع دعمك، ودوّر في دفاتر فئاتك المستهدفة، وقول توبة النوبة من زلات اللسان والتوهان، والتائب من الغلط في حارة الدعم كمن لا توهة له.. وآخر الكلام: تحب تسمع إيه؟ خد دي.. وحوي يا وحوي إيوحه.