الناس دي بتسألك: "ليه تلف العالم وانت لسه مالفتش مصر؟"!

عرفوا نفسهم بأنهم شباب بيحبوا بلدهم وشايفنها حلوة وفيها حاجات أحلى المصريين مايعرفوش حاجة عنها.. وبقى هدفهم يعرفوا الناس على بلدهم، بدءوا يجمعوا الشباب عشان يعرفوهم على بلدهم وبدءوا رحلتهم الطويلة بالأقصر وأسوان والبحر الأحمر ودهب وطابا ونويبع وشرم ورأس محمد والداخلة لحد مرسي علم.. اعرف قصة محمد شوقى ويحيى البحيرى وأحمد مصطفى وقصة لAmazing trips (أميزينج تريبس) في السطور الجاية.
اكتشفتوا إيه جديد لما بدأتوا الرحلات؟
حاجات كتير أوي.. مثلا في حاجات ماكناش نعرف عنها حاجة زى إن في مرسي علم في محمية طبيعية بتضم 5000 دولفين وكائنات بحرية مش موجود منها إلا في مصر، وفى دهب موجود بيج بلو من أكبر مراكز الغطس عالميا، وإن في ناس من جميع أنحاء العالم بتيجي دهب عشان تمارس الرياضات المائية لأنها من أكتر الأماكن وأحسنها اللي الهوا فيها موجود طول السنة، ولما روحنا سانت كاترين وشوفنا التلج في الشتا اللى هو من أحد الأسباب اللى كنا عايزين نسافر عشانها أتاريه موجود عندنا في مصر.
أميزينج تريبس (Amazing Trips) بتقدم إيه مختلف؟
إحنا بنقدم للناس فكرة إنهم ممكن يسافروا ويلفوا مصر ويتبسطوا أوى بفلوس قليلة، مثلا عملنا رحلة لدهب 4 أيام ب350 جنيها شاملة كل حاجة، وبدل ما بنزل في فندق بننزل في كامب والكامب بتلاقي فيه تكييف وتلاجة وتليفزيون، الكامب مرفه يعني.
ما مدى تفاعل الناس معاكم؟
في الأول بدأنا نعمل صفحة على «فيس بوك» ونرفع صور من رحلتنا، بعد كده أول رحلة ننظمها ك«كاميزينج تريبس» Amazing Trips كان كلها أصحابنا ماطلعش غير تلاتة بس من برة أصحابنا ففرحنا بيهم جدا وبقوا عملاء مميزين عندنا جدا، وبعد كده بدأ أصحابنا يقلوا في رحلاتنا ويزيد عدد الناس اللى عرفوا الصفحة بتاعتنا مع بداية انتشارها بشكل أوسع، وإحنا عندنا ميزة إن إحنا بنوصل لشرائح المصريين المختلفة على عكس 6000 شركة سياحة مهتمة بالحج والعمرة والأجانب، نتيجة إن هما شايفين أن المصري متعب في التعامل معاه، لكن إحنا بنتعامل مع المصريين كعملاء بطريقة مختلفة، بنعمل مجتمع في رحلة الترحال وبنخلي في روح وبنعمل صحوبية كلنا مع بعض، بنعمل ألعاب بسيطة ونشارك بعض فيها واللى عنده موهبة زى الغنا مثلا بيغنى وإحنا مولعين نار وقاعدين بالليل، فالناس بتتبسط بالجو ده.
عايزين توصلوا لإيه؟
من الحاجات اللي نفسنا نوصل ليها إننا نغير ثقافة المصريين وننشر بينهم فكرة السفر، السفر بيخلي الواحد ينتج ويشتغل ويبدع بعد أما يرجع من رحلة، وأن الواحد عشان يسافر مش محتاج فلوس كتير بس محتاج إنه يقلل مصاريفه على القهوة والكافيهات.
من النسخة الورقية