عبده: ''لف مصر بالموتسيكل والحكومة دعمته ب''بيان'' (حوار)

من 3 سنين، كان حلم بالنسبة له يرجع يحقق حلم الطفولة، "يسوق موتسيكل"، وبعد كام يوم هيحقق حلم تاني وهيستعد لكسر رقم قياسي في موسوعة جينيس ويسجل "أطول مسافة قيادة داخل حدود بلده مصر"، "علي عبده" صاحب مبادرة "حول مصر بالموتسيكل" مش مجرد هاوي، لكن شغوف بالدرجات النارية، ومحب أكتر للاكتشاف، الموتسيكل فتح آفاق أنه يعرف بلده ويوصل لناسها من الإسكندرية محافظته لأسوان مرورا بالواحات وسيناء، ورغم أن عمره 32 سنة لكن بالسفر داخل مصر قدر يعرف أكتر وأكتر عن بلده، وبيحلم أن الدرجات النارية تبقى سياحة نشطة تساهم في دعم اقتصاد وصورة مصر.
كيف بدأت مبادرتك "حول مصر على الموتسيكل"؟
كنت بروح أنا وأصحابي أماكن كتير بالموتسيكل، وقررت إني أبدأ المشروع من حوالي 6 شهور، ألف مصر كلها بالموتسيكل، كان نفسي من زمان اركبه، لكن خوف أهلى منعني.
إزاي بتستعد للرحلة قبل الذهاب؟
فيه استعداد شخصي باللبس المناسب للمكان اللي رايح ليه، حاجة تحميني من الشمس في الطريق والفلوس والأكل والشرب، واستعداد للموتسيكل بقطع الغيار والزيت والبنزين، وأدوات التصوير للرحلة.
كلمنا عن أول رحلة عملتها؟
كانت إلى الواحات البحرية، يومها طلعت لوحدي وكانت أول مرة أروح الواحات في حياتي.
هل بتروح لأمكان زرتها بالفعل سابقا؟
كل الأماكن اللي روحتها بالموتسيكل كانت أول مرة أروحها، "ومعنديش استعداد اروحها بالعربية"، وللأسف عشان أنسق في أماكن بيكون محتاج معلومات، وإحنا معندناش أي معلومات كافية للأسف على الانترنت للسياحة الداخلية.
إيه احساسك وأنت سايق مسافات طويلة؟
قمة المتعة، مش زي العربية ممكن تنام أو تنشغل بأي حاجة، إحساسي أكبر بالطبيعة اللي بسوق فيها، بستمتع بالمناظر الموجودة حواليا، وبشوف أماكن عمري ما هعرف استمتع بيها بنفس القدر.
إيه مستوى الأمان في الطرق اللي مشيت فيها؟ وهل وقفك حد للمطالبة بأي تصريحات؟
طرق السفر عندنا أمان، أنا ممكن أخاف من السواقة على الدائري أكتر من السواقة في طرق سفر، ومحدش طلب منى أي تصريحات، طبعا في أماكن معينة بتكون عايزة تصريحات من المخابرات زي طرق في سيوة مثلا، لكن غير كدة لأ.
إيه أبرز المحافظات و الأماكن اللي رحتها؟
الواحات البحرية و الفرافرة وواحة سيوة ومدن الدلتا ومدن القناة، ومتاحف و مقابر الحرب العالمية التانيه العلمين، وآخر رحلة من إسكندرية لأسوان وسيناء.
وإيه رد فعل الناس اللي بتعدي عليهم؟ سواء الأكمنة أو الناس العادية؟
أغلب الناس بتتعاطف معايا لما تعرف هدفي ورسالتي، وكتير من الأكمنة بيدوني مية وشاي وبيرحبوا بيا، والبدو والعرب ناس طيبة جدا، مش زي صورة سلبية يمكن مأخوذة عنهم، وكتير بيساعدني ويدعو لاستضافتني.
هل بتأثر مغامراتك على شغلك؟
أبدا، أنا بضم أيام اجازتي الأسبوعية بالاضافة لاجازتي الأخرى، وب"طلع طلعة" كل شهرين مثلا، لإن الرحلة مكلفة وبتحتاج مجهود وشغل.
إزاي بتصور الطريق وأنت بتسوق؟
فيه كاميرا في الخوذة اللي لابسها أثناء السواقة، وكتير بثبتها أثناء الرحلة لالتقاط صور تذكارية.
هل أي موتسيكل ممكن يسافر مسافات طويلة؟
بتختلف من موتسيكل للتاني، نظريا أي موتسيكل فوق 500 سي سي يستحمل، لكن عمليا أنا أطول رحلة طلعتها كانت بموتسيكل موديل 96، واتحديت اطلع بيه عشان أقول أن أحلامك مش مرتبطة بالإمكانيات، وأنك ممكن تعمل أي حاجة مهما كان.
إيه علاقتك بالموتسيكل؟
الموتسيكل هو رفيقي الوحيد في الطريق، بحسه شخصية مش مجرد آلة بسوقها، فعليا غيرت 6 موتسيكلات، كل واحد خرجت بيه في كذا رحلة، الموتسيكلات بسميها بأسماء تليق عليها، زي الموتسيكل الحالي اسمه "فيروز" لإن لونه فيروزي، وموتسيكل تاني كنت مسميه "شهاب" لإن لونه شبه الشهب، وواحد تاني أصفر كنت مسميه "حمص"، كتير بكلم الموتسيكل، ده صاحبي اللي بينام معايا في الصحرا وبيفضل معايا في أيام لوحدي.
إزاي مبادرتك أثرت في الناس؟ في مصر وبرة؟
في مصر ناس كتير بتسألني على صور أمكان برفعها على صفحتي، وبيسألوني نروح إزاي، مش بيصدقوا إن مصر فيها أماكن كتير رخيصة ومناسبة للعائلات، الصور كمان بتكون ملحقة بمعلومات عن الأماكن، وده هدفي إني أروج للسياحة بالموتسيكل. من برة ناس كتير بيسألوني على رياضة الدرجات النارية في مصر وأفواج كتير تواصلت معايا عشان يمارسوا الرياضة في مصر.
بتسمع إيه من الناس برة لما بتشوف صورك؟
كتير منهم بتفاجئ وبيسألني "إزاي بتروح الأماكن دي من غير ما يعترض طريقك مسلحين ومتشددين من الإسلاميين؟"، بضحك وبقولهم يا جماعة مفيش الكلام ده، أنا بروح كل الأماكن من غير أي متشددين، بالعكس الناس يتساعدني بزيت للموتسيكل أو بالاستضافة.
مش شايف مبالغة في أن الطرق كلها آمنة وأن محدش اعترض ليك؟
أنا راجل بتاع IT "تكنولوجيا معلومات"، يعني عمري ما هنقل للناس معلومات ناقصة ومش مصلحتي أعمل كدة، وطالما أنا ماشي صح ومعايا رخصي ليه حد يضايقني أو يعترض طريقي، وأكيد إحنا مش عايشين في جنة وعندنا مشاكل.
إيه أطول مسافة سوقتها؟
أطول مسافة قيادة كانت في 7 أيام حوالي 7 الاف كيلو، كانت تقريبا في كل مصر.
إزاي بتسعى أنك تنضم لجينيس؟
قدمت للموسوعة في شهر يونيو واتوافق علي المشروع ك "أطول مسافة قيادة داخل حدود دولة"، الإجراءات بتاخذ وقت لأنهم بيطلبوا تسجيل الرحلة بالكامل بالإضافة إلى شرط عدم المرور على نفس النقطة في الطريق، لأني هسجل رقم قياسي، وفيه مجموعة شروط للرقم وهو 40 ألف كيلو داخل حدود مصر، والمفترض أني هبدأ في الرحلة في 5 ديسمبر القادم.
إيه هدفك غير الانضمام لجينيس؟
إني أصمم موسوعة إلكترونية لخريطة مصر، يكون فيها معلومات كاملة جمعتها من الأماكن، عن الخدمات المتوفرة مثلا محطات البنزين والفنادق وأماكن الإعاشة وغيره، وتكون بعدة لغات للسائحيين، وهتوفر مجهود لكل السائحيين والمصريين، بالإضافة إنها هتساعد رجال الأعمال لو عايزين يعملوا مشروعات على الطرق.
إزاي بتتواصل مع السياح وتروج لجولاتك؟
من خلال الانترنت، ومن خلال الشبكة الدولية لقائدي الدراجات البخارية، وطلبنا في مرة أن سياح يزوروا مصر، وقتها قالوا إنهم مش هيجيو بسبب الأعمال الإرهابية في مصر، وقررت أني اخرج في رحلة مخصوص لإثبات أن مصر أمان، من الاسكندرية للسد العالي مرورا بالواحات، ومنها الى سيناء مرورا بالبحر الأحمر ودخلت السويس وسيناء، منها لمدن القناة ثم الاسكندرية مرة أخرى، كانت في شهر يونيو ومدتها 16 يوم، وقطعت ما يقارب من 5500 ألف كيلو متر.
تفتكر إن مبادرات فردية ممكن تنشط السياحة؟
جدا.. الحكومة ممكن تصرف مليارات على إعلانات محدش يشوفها، لكن التواصل الشخصي والدعاية من وسائل التواصل الاجتماعي، خاصة من ناس بيحكوا تجربتهم الفعلية شديدة التأثير في جذب السياح، خاصة إن التواصل الشخصي بيكون ليه مصداقية عالية، زي فرق من مجموعة "bikers" لسائقي الدرجات النارية حول العالم شافوا تجربتي بعد تواصل معاهم لاني عضو في الفريق.
هل وزارة السياحة قدمتك لك أي مساعدة؟
"ببيان صحفي" طلعوه بيشجعوني على تجربتي، أنا مش عايز بيان ولا تكريم لكن نفسي يهتموا بمبادرات كثيرة عن تنشيط السياحة، وتواصلت معاهم أكثر من مرة، وعرضت عليهم مشروع الخريطة الإلكترونية، لكن مفيش أي رد، وأكيد لو عندي فلوس أكثر كنت رحت أكثر.
بتحكي لأولادك عن التجربة؟
عمر 4 سنين وجودي لسة طفلة، عمر مهتم جدا بالموتسيكل، وبيطلب إني اركبه معايا، صعب طبعا يسافر وهو صغير لكن بحكلهم، وأسوأ شئ في السفر انه بيبعدني عن ولادي.
أنت بتسمع كمان للناس أثناء جولاتك؟
طبعا.. بتعامل مع أنواع كتير من الثقافات، وبركز في كل زيارة إني اسمع من الناس مشاكلهم، زي مشكلة كانت في أسوان لأحد العاملين لما شاف سائح رمى هدية في الزبالة ولما سألته ليه، قالي لأنه اتضحك عليه بسعر غالي، تجربة زي دي ممكن توصل رسالة سلبية عن السياحة في مصر، وللأسف التاجر المصري مش بيقدر قيمة السائح، وأن السياحة صناعة مستديمة والتعامل بأمانة مع السائح هتخليه يجي أكثر من مرة.
فيه تعليقات سلبية وصلت لك عن مبادرتك بالموتسيكل؟
ناس بيتقول "معاه فلوس كتير" أو "الفاضي يعمل قاضي"، لكن أنا مؤمن برسالتي، لما تعمل حاجة زي ما تزرع شجرة وتشوف نتايجها، ومؤمن إني مش بتفسح وبس لكن نفسي أعمل كتير لبلدي وللسياحة، واتعامل مع ثقافات مختلفة.
إيه أكتر حاجة متعود تاخدها معاك في كل رحلة؟
علم مصر دايما متثبت على الموتسيكل، وده للمصريين مش للصور بس، لإني فخور إني مصري.
إزاي أثرت الرحلة على شخصيتك؟
مريت بمراحل تحول كثير من أول رحلة لآخر رحلة، يمكن الأول كنت منبهر وبتفسح لكن بعدين اكتشفت إن بلدي معرفش عنها حاجة، وإن عندي حلم كبير إني أغير مصر، من قطاع معين وهو السياحة، وخصوصا سياحة الدرجات النارية، بستمتع لما اعدي مثلا في طريق واشم ريحة الخضرة، أو أخد راحة وأشرب قهوة.
الرحلات مكلفة؟
الرحلة نفسها لأ، البنزين والأكل والشرب مش مكلف إنما مكلف صيانة الموتسيكل، ممكن يوصل سعر الكاوتش ل4 الآف جنيه، بالإضافة أن أسعار الاقامة في الفنادق بيختلف.
قابلت قصة مش بتنساها أبدا؟
قابلت واحد مسن طلع على المعاش في سيناء، عامل زي "كامب" خاص بيه، ومجتمع سياحي صغير، وبيعلم أولاد البدو مجانا، وبيستضيف الناس بأسعار زهيدة.