هي عين الملاحيس مفيش غيرها.. عين الإخوان.. وعين الموكوسين، الأمريكي أبو قفا ضارب أسود على أحمر، والتركي الأهطل.. وعيون كتير مِلي بيشفوكي ولا يصلوش ع النبي.. ورقيتك يا مصر يا غالية من كل شر.. من كل نَفْسنة.. من كل لسان طويل وزالف وسايب.. من كل حاقد وجاحد.. وأدي شكة إبرة في عين مرسي الإستبن.. وواحدة في عين بديع مكسور الجناح.. وخمسة ستة سبعة قولوا مية في عيون كل نسانيس طرة.. نسناس نسناس.. من امبارح للنهاردة والكوارث نازلة ترف.. استر يا ستار.. انهيار كوبري بالدقهلية.. اصطدام مترو بالعباسية.. حريق قطار برمسيس.. انقلاب أتوبيس بالشرقية.. وتلاتة في البحيرة والإسماعيلية والدقهلية.. و19 مصيبة وحادث وكارثة.. وضحايا وجرحى وصويت ودموع على اللي راح.. يا سواسي.. طبعًا طبعًا دى عين شاردة وحاردة.. ويا حسود يا حسود زُق عجلك اوعي تعود.