الأرصفة الباردة

---------------------------------
كان نفسى يوم يا وطن ضحكتك
تشبهنى
لكن لقيت العسكرى بالتهمة
يشبهنى
أنا إللى فارد دراعى وشوقى
سابقنى
بصيت لقيت إعلام بالزور
سابقنى
كل العيون نامت
وعيونى ما نامتشى
كل الضماير هدت
وضميرى ما هديشى
أنا اللى انكويت بالنار
وغيرى كل عيشى
عشقك وقلبك يا وطن للغريب
وسايبنى وحدانى
ع الأرصفة الباردة
وكأنى ورقة شجر
فى مهب الريح للشاردة والواردة
هات دليلك يا وطن
على إنى أشبهلك
أنا عندى ألف دليل
على إنى مش منك
أنا ابن غير شرعى
وبينكسر قلعى
من غير وجود الريح
أنا حبى لك يا وطن
من طرف واحد
وأنت حبك يا وطن
بتوهبه لجاحد
ولما تغرق مركبك
الدنيا بتلومنى
أنا اللى عايش فى نهاية السطر
فاقد عناوينى
ولما تضحك يا وطن
نكتك تبكينى
العدل هَم الناس
وأنا هَمى أكل العيش
إيه الخيار يا وطن
غير إنى أكون درويش
أنا اللى بغزل من ضلوعى وهْم
وبنسجهم وطن
وأقنع نفسى بألف كدبة
لكن خلاص يا وطن
شبعت من كدبك
هات دليلك يا وطن
على إنى أشبهلك