منك لله يا بن الحاجة موزة

أشوف فيك يوم أحمر على أصفر يا تميم ... منك لله يا بن الحاجة موزة .. مراتي جالها لطف، تأثرا بحالة كرم تميمية بزخية .. جنابه اشترى قصرا لزوجته التانية المدعوة : « العنود بنت مانع الهاجري » بميت مليون يورو خبط لزق بتركيا .. طب واحنا مالنا.. ؟ .. إزاي .. ؟؟ .. ده مالنا وعيالنا وصداعنا .. الست زوجتي المصون ، شافت الخبر ع النت ولسعت .. أيوه زي ما بقولكم كده : « ل س ع ت » .. عقلها طار .. خف .. شط .. ونون : " بأة يا راجل عيد ميلادي يعدي ولا حتى عود فجل تجبهولي .. أسفُكس ع الشح وقُصر الإيد والرِجل يا بنأدمين .. هيّ : شوفت تميم ..؟؟ أنا باستعباط : « مين تميم » ؟؟ هىّ : تميييييم .. تميم يا راجل .. الواد أبو شبشب .. أيوه هو ده ، الواد اللي جه القمة بشبشب ، يجيب لمراته قصر بالشىء الفلاني وأنا اللي هي أنا و شريط المدام يبدو علق .. سَفْ .. خِرب ، وخدوا على أنا « دي » خمسين واحدة لما بِضت من الأننة صارخا : وبعدين يا خالتي .. ؟؟ هىّ بنرفزة واحمرار وش : «أنا .. أنا ما أتعبرشي يا مؤمن » ، ثم وصلة نهنة طويلة ، يعقبها هدوء لثوانِ بدون تراشق لفظي وشد هدومي .. يقطع الصمت صريخ وصويت حياني : « يا ل اااهوي على جملي اللي ما حصلش عَنزة » .. ثم انتقال إلى مرحلة الولولة : « وهاتوا الدفاتر تنقرا .. جوزي طلع مسخرة » .