صدمت وتعجبت ودهشت وبلمت عندما فتحت التليفزيون ففوجئت بأحد الموقرين من نواب المجلس ياعيني كان رايح في دنيا غير الدنيا.. أنا الحقيقة اتخضيت علي الراجل، لأني افتكرت ولأول وهلة إنه ياحبة عيني مسورق يعني مغمي عليه.. أتاريه ويالهوي نايم ورايح في سابع نومة، واللي خلاني اكتشفت أنه مش مسورق إني شوفت صورة تانية وتالتة ورابعة وخامسة لناس نايمة في القاعة.. اللي حاطط إيده تحت دماغة واللي حاطط دماغه علي إيده وغيره وغيره وكلها أوضاع نوم صريح.. أنا الحقيقة لقيت نفسي بقول يادي النيلة يا محروسة.. إيه اللي بيحصل فيكي ده. فجأة لقيت ابن اللذينه المخرفاتي بيزغدني في جنبي وبيقوللي بص بص.. فوقت وبصيت تاني، لقيت يا مبارك واحد من الموقرين بيصور موقر تاني بالموبايل بتاعه والموقر التاني باصصله ومبتسم وفرحان.. لأ وياريت اللي كان بيصور زميله واحد بس ده كان فيه واحد تاني بيصور واحد تاني وتالت بيصور تالت.. الله الله.. وأنا لسه مذهول من العجب اللي أنا شايفه لقيت ابن الإيه المخرفاتي بيزغدني تاني وبيقوللي الحق الحق يا ابو خليل، ولحقت وبصيت ولقيت يا مبارك اتنين من الموقرين شابطين في خناق بعض.. وعدد تاني من الموقرين واقفين بيخلصوا بينهم، الله الله دي خناقة وضرب بالإيدين، أنا قلت لأ بأه دي ضروري بعض مشاهد كوميدية من مسلسل أو من فيلم من الدراما اللي دايما بتطلع الموقرين في صورة يعني واللي الموقرين قارشين ملحتها اليومين دول.. المخرفاتي قاللي مشاهد كوميدية إيه، اللي انت شايفه ده حقيقي وفجأة صرخ فيه تاني وقاللي طب بص بص بص يا ابو خليل عشان تصدق، وبصيت وياريتني ما بصيت، وسألني المخرفاتي قاللي عارف مين ده، قلتله قاصدك علي مين قاللي بيقزقز، بصيت تاني كويس وفجأة صرخت وقلتله آه عارفه والله عارفه ولقيت نفسي بقول يا نهار اسود، ده بيقزقز، يلاهوي يا دهوتي ياخرابي، يادي النيلة يادي الجرسة اللي حنتجرسها في العالم، المخرفاتي بصلي بغضب وقاللي لاهوك إيه ودهوتك إيه وخرابك إيه، هوه فيه إيه، قلتله انت لسه بتسألني فيه إيه، قاللي أيوه انت شايفه ده عادي، إيه يعني كام موقر تعبانين من المناهدة وبيريحوا شوية مش أحسن مايسيبوا الجلسة ويخرجوا بره، فيها إيه يعني لما يسلوا نفسهم بقزقزة اللب والسوداني وهمه بيسمعوا لهلفطة المعارضة اللي ما بيعجبهاش العجب ولا الصيام في رجب واللي نازلين اعتراض عاطل علي باطل علي بيان الحكومة، فيها إيه لما كل موقر بيحتفظ في الموبايل بتاعه بصورة زميله للذكري، حصل إيه يعني لما اتنين موقرين مسكوا في خناق بعض وهات ياشتيمة لبعض وبعضهم مرة رفع الجزمة علي بعض، فيها إيه، ما خروشوف عملها قبلهم، ما هو كله لمصلحة الشعب، يا أخي انتم كده يا شعب ما بترحموش وكل همكم تنتقدوا وتعملوا من الحبة أبه، سايبين مصر بتتباع وبتضيع ومسكينلي في شوية لب اتقزقزوا، قلتله جرالك إيه يا مخرفاتي، دا أنا يا راجل ما اتجرأش وأنا باكتب في بيتي إني أحط علي مكتبي شوية لب وسوداني، قاللي أهو ده اللي بيقولوا عليه قصر ديل يا أزعر، أهو انت يا أبوخليل زي كل واحد في الشعب، تنتقدوا وبس، انت يا أبوخليل ما بتعملش كده عشان حاجتين، إما لأنك معاكش فايض تشتري بيه لب، أو انك بتخاف من الحاجة مراتك أحسن تعنفك وهي بتنضف مطرح قزقزتك، يا راجل حرام عليكم بأه ارحموا، لقيت نفسي باصرخ في المخرفاتي بغضب وبقوله: يعني انت موافق علي اللي حصل ده، موافق علي المهزلة والفضيحة دي، المخرفاتي قلب وبان علي وشه الغضب بعد ما كان حاطط تعبير اللامبالاة علي وشه وقاللي، علي فكرة اللي عملوا كده مش غلطانين، قلتله اومال مين بأه اللي غلطان، قاللي ارجع لمقالة الأسبوع اللي فات، همه اللي بيناموا واللي بيصوروا واللي بيقزقزوا لب دول مين، مش مننا يعني مننا احنا يا شعب، قلتله للأسف أيوه، قاللي يبقي الحق علينا احنا، ما هو احنا اللي اختارنا اللي بيناموا واللي بيصوروا واللي بيتخانقوا، قلتله طب واللي بيقزقزوا؟.. المخرفاتي طب ساكت.
