ألا دونا .. .. ألا ترى .. فُتح المزاد .. قررررب .. كرسي برلماني للبيع

طرح كراسي مجلس النواب الجاي في صالة مزدات . البقاء للأقوى وأصحاب المليارات .. لا عزاء للمفلسين .. ولا وجود للمنكسرين .. رجل الأعمال التقيل أوي نجيب ساويرس ، الشهير " بزيرو اتناشر " يتصدر الصالة .. ساويرس داير الأيام دي على رجل واحدة ع الدواير بعربة نص نقل شايلة مصاري بالجنيه والدولار واليورو .. فاتح صدره النجيب .. ناويها وحالف براس أبوه القديس أنس ما يطلع م المولد البرلماني إلا بتلت الكراسي ع الأقل .. يتباهى جنابه دايما : "فلوسي وف جيبي والحبابيب والعنين المكسورة ف الدواير بالشكاير وعاوزة اللي يحملها ناقص إيه تاني ! " .. محمد عبد العليم القيادي بحزب الوفد يرد ، : " لأ يا سوسو لا .. حسبتك غلط .. ناقص كتير.. ناقص القبول والرضا .. إنت مش مقبول يا سوسو .. كله بالخناق إلا البرلمان بالرضا والاتفاق .. افهمها ياسوسو .. تضربها زيرو اتناشر تجرب زيرو عشرة أو حتي زيرو احداشر .. هتبص هتلاقي الرد زاعق وصاعق : " هذا البرلمان بعيد عن شواربك يا سوسو .. لِمْ ملاليمك وحاول الهرس ف حته تانية " . ..